Sala na Mpila nde Disolo Kulonga Bawi na Nge

SAMBU disolo na nge kulonga bawi na nge, nge fwete sala mambu mingi kuluta kutubila kaka dyambu mosi ya mfunu. Kudiyula nde: ‘Sambu na nki bawi yai kele na mfunu ya kuwa dyambu yai? Inki mu tatuba yina tapusa bawi na kudiwa mpenza nde bo mebakila disolo yango mambote?’

Na nzo-nkanda, kana disolo ya bo mepesa nge kemonisa mutindu ya kuta kimbangi, muntu yina nge tasala ti yandi devware tavanda muwi na nge. Na bantangu yankaka, yo lenda vanda nde nge ketuba na ntwala ya dibundu ya mvimba.

Mambu Yina Bawi na Nge Mezaba. Kudiyula nde: ‘Inki mambu bawi mezaba sambu na dyambu yango?’ Mvutu tasadisa nge na kuzaba nki kisika nge tayantika. Kana nge ketuba na dibundu yina kele ti Bakristu mingi ya kuyela na kimpeve, kuvutukilaka ve kaka bakyeleka ya mfunu ya Biblia, yina mingi na kati na bo mezabaka dezia. Sadila bakyeleka yai ya luyantiku bonso fondasio sambu na kulonga bakyeleka ya mfunu. Kansi, kana kele mpi ti bantu mingi ya mpa na kati ya bawi, nge fwete tadila bampusa ya bimvuka yonso zole.

Yidika vitesi ya disolo na nge na kutadilaka mambu yina bawi na nge mezaba. Kana nge kotisa mwa mambu ya fyoti-fyoti yina bawi mingi meyikanaka na yo, tuba yo nswalu-nswalu. Kansi, tuba malembe ntangu nge ketubila bangindu yina lenda vanda ya mpa na bantu mingi na kati ya bawi na nge na mpila nde bo bakisa yo pwelele.

Mambu Yina Talonga Bantu. Kutuba mambu yina kelonga bantu ketendulaka kaka ve kuvanda ti kima mosi ya mpa ya kutuba. Mitubi yankaka ketubaka bakyeleka ya luyantiku na mutindu mosi ya kukonda mpasi na mpila nde bawi kubakisa yo mbote ata yo kele mbala na bo ya ntete ya kuwa yo.

Na kisalu ya bilanga, yo mefwana kaka ve na kutubila dyambu mosi ya bo ketubila na bansangu sambu na kutendula nde beto kezinga na bilumbu ya nsuka. Sadila Biblia sambu na kumonisa kima yina dyambu yango ketendula. Kusala mutindu yai talonga mpenza muwi na nge. Mutindu mosi mpi, kana nge ketubila mambu yina ketadila bansiku yina ketwadisaka lugangu, banti to luzingu ya bambisi, lukanu na nge fwete vanda ve ya kutubila muwi na nge mambu ya kuyituka ya siansi yina yandi mewaka ntete ve. Kansi, lukanu na nge fwete vanda ya kuvukisa banzikisa yina kekatuka na lugangu ti mambu yina Biblia ketuba sambu na kumonisa nde kele ti Ngangi yina kezolaka beto. Kusala mutindu yai tasadisa muwi na nge na kumona mambu na mutindu mosi ya mpa.

Kusala disolo mosi na ntwala ya bantu yina mewaka yo dezia mbala mingi lenda vanda mpasi. Kansi, sambu na kuvanda longi mosi ya mbote, nge fwete longuka mpila ya kusala yo na mutindu mosi ya mbote. Inki mutindu nge lenda sala yo?

Bansosa tasadisa nge. Olie ya kutubila kaka mambu yina kekwisila nge nswalu na mabanza na disolo na nge, sadila bima yina kesadisaka na kusala bansosa yina kele na balutiti 33 tii na 38. Tadila bangindu yina bo mepesa kuna na yina metala balukanu ya nge fwete sala ngolo na kulungisa. Ntangu nge kesala bansosa, nge lenda mona nde dyambu mosi ya mezabanaka mingi ve ya kusalamaka na bilumbu meluta kewakana mbala mosi ti disolo na nge. To nge lenda kutana ti dyambu mosi ya bo mekatuka kutuba na bansangu yina tatendula ngindu yina nge kezola kutubila.

Ntangu nge ketanga malongi na nge, sadila bangyufula bonso inki? sambu na nki? inki ntangu? inki kisika? nani? mpi nki mutindu? sambu na kupusa mabanza na nge na kuyindula. Mu mbandu: Sambu na nki yo kele ya kyeleka? Inki mutindu mu lenda monisa yo? Inki balukwikilu ya mepanzanaka mingi kesalaka nde bantu yankaka kubakisa mbote ve kyeleka yai ya Biblia? Sambu na nki yo kele mfunu? Inki mambu kyeleka yai lenda sala na luzingu ya muntu? Inki mbandu kemonisa mambote ya kusadila yo? Inki mambu kyeleka yai ya Biblia kemonisa na yina metala kimuntu ya Yehowa? Na kuwakana ti malongi yina nge ketadila, nge lenda kudiyula nde: Inki ntangu yo salamaka? Inki mutindu beto lenda sadila malongi yai na bilumbu na beto? Sambu na kukumisa disolo na nge kitoko, nge lenda nkutu kuyula mpi kupesa bamvutu na bangyufula yai yankaka ntangu nge kesala disolo na nge.

Disolo na nge lenda lomba nde nge sadila baverse yina bawi na nge meyikanaka na yo. Inki nge lenda sala na mpila nde mambu ya baverse yai ketuba kulonga bantu? Kusuka kaka ve na kutanga yo; tendula yo.

Kutubila verse yina mezabanaka mingi lenda longa kibeni bantu kana nge tendula kitini mosi-mosi, kana nge monisa pwelele bitini yina kewakana ti ntu-dyambu ya disolo na nge mpi kutendula yo na nima. Tala mitindu nge lenda sala yo ti verse bonso Mishe 6:8 kana nge sadila Traduction du monde nouveau. “Lunungu” kele inki? Verse yai ketubila minsiku ya lunungu ya nani? Inki mbandu nge lenda pesa sambu na kutendula bangogo “kumonisa lunungu”? To “kuzola bumbote”? Kukonda lulendo kele inki? Inki mutindu nge lenda sadila malongi yai kana nge ketubila mununu? Ya kyeleka, mambu bonso ntu-dyambu na nge, lukanu na nge, bawi na nge, mpi ntangu yina nge kele na yo fwete sadisa nge na kupona bangindu yina nge tasadila.

Mbala mingi, bantendula ya pete ya bangogo kevandaka mfunu. Sambu na bantu yankaka, yo kele dyambu ya kuyituka na kulonguka ntendula ya “kimfumu” yina Matayo 6:10 ketubilaka. Kuyibusa ntendula ya ngogo mosi lenda sadisa ata Mukristu yina mesalaka bamvula mingi na kubakisa mbotembote mambu yina verse mosi ya Biblia ketuba. Dyambu yai kemonana pwelele ntangu beto ketanga 2 Piere 1:5-8 mpi kutendula na nima mambu ya kuswaswana yina baverse yai ketubila: lukwikilu, bikalulu ya mbote, kubakisa mambu, kudiyala, kukanga ntima, kinzambi, kuzola bampangi, mpi zola. Kana na kisika mosi nge sadila bangogo yina kele ti bantendula ya mutindu mosi, kutendula yo lenda sadisa bantu na kumona luswaswanu yina kele na kati ya bangogo yango. Yo kele kyeleka sambu na bangogo yina Bingana 2:1-6 kesadila, mu mbandu mayele, nzayilu, luswasukusu, mpi kubakisa.

Mambu yango lenda longa bawi na nge kana nge yindula ti bo na nsadisa ya mambu yina kele na verse. Bantu mingi keyitukaka ntangu bo kemonaka na mbala ya ntete nde na bambalula yankaka ya Biblia, Kuyantika 2:7 ketuba nde Adami kuvandaka moyo ya kezinga mpi nde mutindu Ezekiele 18:4 ketuba, moyo kefwaka. Kilumbu mosi, Basaduse kuyitukaka ntangu Yezu kutangilaka bo Kubasika 3:​6, yina bo vandaka kutuba nde bo kekwikilaka, mpi yandi monisaka nde yo vandaka kutubila lufutumuku ya bafwa.​—Luka 20:37, 38.

Bantangu yankaka bantu kebakisaka mbote verse mosi kana nge tubila mambu yina kele na kapu ya mvimba, mambu yina kusalamaka ntangu bo vandaka kusonika yo, mpi muntu yina vandaka kutuba to yina yandi vandaka kutubila. Bafarize kuzabaka mbote Nkunga 110. Kansi, Yezu kubendaka dikebi na bo na ngindu mosi ya mfunu yina kele na verse ya ntete. Yandi yulaka nde: “‘Nki beno ke banzaka sambu na Mesia? Yandi fweti vanda mwana ya nani?’ Bo nde: ‘Ya Davidi.’ Ebuna Yesu yulaka bo nde: ‘Nki mutindu Mpeve ya Nzambi songaka Davidi na kubinga Mesia “Mfumu”? Sambu Davidi tubaka nde: “Mfumu Nzambi tubilaka Mfumu na mono nde: Vanda awa na diboko na mono ya [kitata] tii kuna ya mono ta tula bambeni na nge na nsi ya makulu na nge.” Ebuna, kana Davidi bingaka yandi nde: “Mfumu,” nki mutindu Mesia lenda vanda diaka mwana ya Davidi?’” (Mat. 22:41-45) Ntangu nge kesadila Masonuku sambu na kuyindula ti bantu mutindu Yezu salaka, nge tasadisa bo na kutanga Ndinga ya Nzambi ti dikebi ya kuluta.

Kana mutubi mosi kutubila ntangu yina bo sonikaka mukanda mosi ya Biblia to ntangu dyambu mosi buna kusalamaka, yandi fwete tendula mpi mambu yina vandaka kusalama na ntangu yango. Mutindu yina, bawi tabakisa mbote kibeni mfunu ya mukanda to ya dyambu yango.

Mambu yina nge ketuba lenda longa kibeni bantu kana nge kefwanisa mambu. Nge lenda fwanisa ngindu mosi ya mepanzanaka mingi ti mambu yina Biblia ketubaka sambu na ngindu yango. To nge lenda fwanisa masolo zole ya Biblia yina ketubilaka dyambu ya mutindu mosi. Keti baluswaswanu kele? Sambu na nki? Inki yo kelonga beto? Kana nge kesala mutindu yai, nge lenda pesa bawi na nge ngindu ya mpa ya disolo na nge.

Kana bo mepesa nge mukumba yina ketubila mambu ya ketadila kisalu ya Bukristu, nge lenda pesa ngindu ya kimvuka ya kisalu yango sambu na kutomisa disolo na nge. Tubila kisalu yina beto fwete sala, sambu na nki beto fwete sala yo, mpi nki mutindu yo kewakana ti balukanu yina beto Bambagi ya Yehowa kesosaka kulungisa. Na nima tendula nki kisika, inki ntangu, mpi nki mutindu beto fwete sala kisalu yango.

Inki nge tasala kana disolo na nge kelomba nde nge tubila “mabanza yina me bumbanaka mpenza na nsi ya ntima ya Nzambi”? (1 Kor. 2:10) Kana na luyantiku nge monisa mpi nge tendula pwelele mwa bangindu ya mfunu ya disolo na nge, bantu tabakisa kukonda mpasi bangindu yankaka. Mpi kana nge sukisa disolo na nge ti ngindu ya kimvuka ya malongi na nge, bawi na nge tavanda na kyese kibeni na kuzaba nde disolo na nge melonga bo mpenza.

Bandongisila Yina Ketadila Luzingu ya Bukristu. Bawi na nge tabaka mpenza mambote kana nge sadisa bo na kumona mutindu mambu yina kele na disolo na nge ketadila luzingu na bo. Na ntangu nge ketadila baverse yina kele na disolo yina bo mepesa nge, kudiyula nde, ‘Sambu na nki Nzambi bumbaka nsangu yai na Masonuku tii bubu yai?’ (Roma 15:4; 1 Kor. 10:11) Yindula mambu yina bawi na nge kekutana na yo na luzingu na bo. Tadila mambu yango na kuwakana ti bandongisila mpi bansiku yina kele na Masonuku. Na disolo na nge, yindula na nsadisa ya Masonuku sambu na kumonisa mutindu yo lenda sadisa muntu na kununga ti mayele yonso mambu ya mutindu yai. Kutubilaka ve mambu yina kele ve ya sikisiki. Tubila bikalulu mpi mambu ya sikisiki.

Sambu na kuyantika, sadila ngindu mosi to zole ya beto metubila awa na disolo yina nge kebongisa. Ntangu nge takuma ti eksperiansi mingi, nge tasadilaka bangindu yango mingi. Na nima, nge tamona nde bawi tavingilaka badiskure na nge ti kivuvu nde mambu ya bo tawa tanatila bo kibeni mambote.