“Bo Ta Longaka Nsangu Yai ya Mbote”!
1. Inki mutindu beto mezaba nde ata kima mosi ve lenda kanga kisalu ya kusamuna?
1 Ya kyeleka, ata kima mosi ve lenda kanga Yehowa nzila na kulungisa luzolo na yandi. (Yez. 14:24) Ata yo monanaka bonso nde yo zolaka kuvanda mpasi sambu na Zuzi Gedeoni mpi bantu na yandi 300 na kunwana ti basoda ya Madiani 135 000, Yehowa kuzabisaka yandi nde: “Kwenda nge katula bantu ya Israele na maboko ya bantu ya Madiani; mono muntu me tinda nge.” (Baz. 6:14) Bubu yai, inki kisalu kesalama na lusadisu ya Yehowa? Yezu kutubaka nde: “Bo ta longaka nsangu yai ya mbote ya Kimfumu na nsi-ntoto ya mvimba, na mpila nde bantu ya makanda yonso kuwa yo.” (Mat. 24:14) Ata muntu mosi ve takuka kukanga kisalu yai nzila sambu yo lungana!
2. Sambu na inki beto lenda vingila nde Yehowa kusadisa konso muntu na kati na beto na kisalu ya kusamuna?
2 Yehowa Kesadisaka Konso Muntu na Kati na Beto: Ata beto lenda tula ntima nde Yehowa tasadisa Bambangi na yandi na kimvuka na kununga, keti beto lenda vingila nde Yehowa kusadisa konso muntu na kati na beto? Na ntangu mosi ya mpasi, ntumwa Polo kumonaka mutindu Yehowa kusadisaka yandi na nsadisa ya Mwana na yandi, Yezu. (2 Tim. 4:17) Mutindu mosi, beto lenda tula ntima nde Yehowa tasakumuna bikesa yina konso muntu na kati na beto kesala sambu na kulungisa luzolo na yandi.—1 Yoa. 5:14.
3. Na nki bantangu Yehowa kesadisaka beto?
3 Keti basusi ya luzingu ya konso kilumbu kebikaka nge ti ngolo fyoti sambu na kusala kisalu ya kusamuna? Biblia ketuba nde: “Yandi ke pesaka ngolo na muntu yina me lemba.” (Yez. 40:29-31) Keti nge ke na kukutana ti mbangika to kimbeni? Biblia ketuba nde: “Bikila Mfumu Nzambi kilo na nge, yandi ta sadisa nge.” (Nk. 55:23) Keti bantangu yankaka nge kemonaka nde nge mefwana ve? Yehowa ketuba nde: “Ntangu yai kwenda. Mono muntu ta sadisa nge na kutuba.” (Kub. 4:11, 12) Keti nge kele ti kimbefo yina ketulaka bandilu na kisalu na nge ya kusamuna? Yehowa kebakaka na valere bikesa ya beto kesalaka na ntima ya mvimba mpi yandi lenda sadila yo, ata yo kele fyoti nki mutindu.—1 Kor. 3:6, 9.
4. Inki mutindu kutudila Yehowa ntima kevandaka ti bupusi na kisalu na beto?
4 Diboko ya Yehowa ‘ke ya kutandula, nani lenda konika yo?’ (Yez. 14:27) Sambu beto ketula ntima nde Yehowa tasakumuna kisalu na beto ya kusamuna, bika beto landa na kusamuna kukonda kulemba ‘na kikesa yonso’ na ngolo ya Yehowa.—Bis. 14:3.