Yedisa Kikalulu na Nge ya Kutula Ntima na Lunungu ya Nzambi

“[“Mono me pesaka nge nzayilu,” NW] sambu nge tula ntima na Mfumu Nzambi.”​—BINGANA 22:19.

1, 2. (a) Sambu na inki Bambangi ya Yehowa ketulaka ntima na Yehowa? (Bingana 22:19) (b) Inki kemonisa nde bantu yankaka kele na mfunu ya kuyedisa kikalulu na bau ya kutula ntima na Yehowa?

BAKRISTU ya kyeleka mezwaka dikabu mosi ya nene: nzayilu ya Yehowa ti ya lukanu na yandi. ‘Mpika mosi ya kwikama mpi ya mayele’ kepesaka bau ‘madya ya kimpeve, na ntangu ya mbote,’ mpi na zola yonso. (Matayo 24:​45, NW) Nzayilu ya bau kezwaka kepesaka bau bikuma ya mbote ya kutula ntima na Nzambi. Yau yina, na kimvuka, yau kemonikaka na meso nde Bambangi ya Yehowa ketulaka ntima na Yehowa ti na lunungu na yandi.

² Kansi, yau kemonika nde Bambangi yankaka kele na mfunu ya kuyedisa kikalulu na bau ya kutula ntima na Nzambi. La Société kelutaka kuzwa mikanda ya kemonisa badute sambu na mambu ya kebasikaka na mikanda. Yau kevandaka badute sambu na bantendula ya mpa, to sambu na mambu ya kepesaka kyese ve na ntima ya bayina kesonikaka mikanda yango.​—⁠Fwanisa ti Yoane 6:​60, 61.

3. Inki mambu kebwilaka bantu, ata bansadi ya kwikama ya Yehowa mpi sambu na inki?

³ Mambu yai ya kele na Longi 9:11 kebwilaka mpi bansadi ya kyeleka ya Yehowa: “Mono monaka diaka kima ya nkaka na ntoto yai: Bantu yina zaba kubaka ntinu mbote na nsaka bo ke nungaka ve konso ntangu; bantu ya ngolo ke nungaka ve konso ntangu bitumba; bantu ya mayele ke zingaka luzingu ya mbote ve konso ntangu, bo ke kumaka ve konso ntangu bamvwama; bantu yina kuzaba kisalu mbote bo mpi ke bakaka kisalu ya nene ve konso ntangu. [“Sambu, ntangu ti mambu ya konda kukana ke,” NW] bwilaka bantu yonso na ntangu na bo.” Inki mutindu mambu yai lenda monana mpi kyeleka na kimpeve? Ziku nge zaba mwa Bakristu yina vandaka bantu ya ngolo na kusadila ndongisila ya Biblia, na kunwanina kyeleka; bantu ya mayele na kusadila minsiku ya Biblia, ya kikesa na kusosa kuzwa nzayilu ya sikisiki. Kansi, ntangu yai, sambu na “ntangu ti mambu ya konda kukana,” bau melembaka sambu na kimbefo to kimununu. Bau mekumaka kudiyula kana bau tafwa na ntwala, to bau takota ya moyo na inza ya mpa.

4, 5. Sambu na inki Bakristu fwete katula ve ntima na bau na lunungu ya Yehowa?

⁴ Kana Mukristu mefwila nkento to bakala, yau kevandaka mpasi mingi. Yo lenda vanda nde bantu yai sadilaka Yehowa bamvula mingi kumosi. Nkwelani ya mebikala na luzingu fwete vila ve nde lufwa kefwaka makwela.a (1 Korinto 7:39) Na yau, kana yandi kezola ve kukatula ntima na Yehowa, yandi fwete yala mawi na yandi.​—⁠Fwanisa ti Marko 16:⁠8.

⁵ Kima ya mayele ya muntu fwete sala kana yandi mefwila nkento to bakala, tata to mama, mwana to nduku ya ngolo ya Mukristu, kele kusadila ntangu yina sambu na kumonisa kikalulu ya kutula ntima na lunungu ya Yehowa! Ata na ntwala ya kigonsa ya lufwa, muntu fwete tula ntima nde Yehowa kele Nzambi ya lunungu. Beto fwete tula ntima nde: ti bayina tafwa ve na ntwala ya kubaka luzingu ya mvula na mvula, ti bayina tabaka yau na lufutumuku, bau yonso tavanda kaka na kyese. Muyimbi-bankunga tubaka mutindu yai sambu na Nzambi: “Nge ke pesaka bo bima mingi mutindu kele nzala na bo. Mfumu Nzambi kele mbote ti mawa na mambu yonso ya yandi ke salaka. Yandi kele penepene na bantu yonso yina ke bingaka yandi, bayina ke bingaka yandi na ntima ya mbote. Bantu yonso yina ke tinaka yandi boma yandi ke pesaka bo bima ya bo ke na yo mfunu; yandi ke waka kudila na bo, yandi ke gulusaka bo.”​—⁠Nkunga 145:​16-19.

Keti Nge Monaka Mpasi ya Mpamba

6, 7. (a) Sambu na inki Bambangi yankaka yina monaka mpasi na bilumbu ya meluta lenda bakisa mambu mutindu yankaka ntangu yai? (b) Sambu na inki beto lenda tuba ve nde Yehowa kele Nzambi ya kukonda lunungu ata yandi pesaka nzila nde bankaka kumona mpasi na bilumbu ya meluta?

⁶ Na bilumbu ya meluta, Bambangi yankaka monaka mpasi sambu bau buyaka na kusala mambu mingi. Kansi bubu yai kansansa na bau lenda ndima na kusala mambu yina. Yau lenda vanda nde bau buyaka kisalu mosi ya bulamatadi. Bubu yai, na kutadilaka bukatikati ya Mukristu fwete vanda na yau na ngidika yai, bau lenda mona nde kisalu ya bau buyaka vandaka mbi ve.

⁷ Ntangu Yehowa pesaka nzila nde bau mona mpasi sambu na mambu ya ntima na bau kendima bubu yai, keti yandi vandaka Nzambi ya kukonda lunungu? Mingi na kati ya bayina kukutanaka ti dikambu ya mutindu yai ke na ngindu yina ve. Nkutu bau kele na kyese sambu bau zwaka okazio ya kumonisa na meso ya bantu nde lusilu na bau kele ya kukangama na kimfumu ya Yehowa. (Fwanisa ti Yobi 27:⁠5.) Keti ya kyeleka muntu lenda bokuta sambu ntima na yandi tumaka yandi na kukangama na Yehowa? Kikalulu yina ya kusimba minsiku ya Bukristu na mutindu ya bau bakisaka yau to ya kusala mambu ya mbote ya ntima na bau songaka bau, monisaka nde bau mefwana na kuvanda banduku ya Yehowa. Ya kyeleka, muntu ya mayele kesalaka ve kima yina ya ntima na yandi kebuya, to yina tabudisa bankaka mabaku. Na dyambu yai, beto lenda yibuka mbandu yina ntumwa Polo pesaka.​—⁠1 Korinto 8:​12, 13; 10:​31-33.

8. Sambu na inki Bakristu ya Bayuda yina vandaka zitisa ntete Nsiku lendaka tuba ve nde Yehowa kele Nzambi ya kukonda lunungu?

⁸ Yau lombamaka nde Bayuda kulemfuka na Bansiku Kumi ti bansiku yankaka kiteso ya 600, sambu na kusepedisa Yehowa. Kansi ntangu Yezu kwisaka, yo lombaka dyaka ve nde bantu yonso (ti Bayuda) kulanda bansiku yina sambu na kusadila Yehowa. Bau vandaka landa dyaka ve bansiku yai yonso: luyotisu, Kisabatu, kutambika bambisi, kukonda kudya madya yankaka. (1 Korinto 7:19; 10:25; Kolosai 2:​16, 17; Baebreo 10:​1, 11-14) Bayuda yina kumaka Bakristu, bonso bantumwa, bikisaka kulemfuka na bansiku yai ya kuwakana ya Nsiku. Keti bau bokutaka nde, ngidika ya Nzambi vandaka ya kukonda lunungu, yandi vandaka lomba bau na kusala mambu ya kukonda mfunu? Ve, nkutu bau sepelaka sambu yau sadisaka bau na kubakisa balukanu ya Yehowa mbotembote.​—⁠Bisalu 16:​4, 5.

9. Inki bwilaka Bambangi yankaka, kansi sambu na inki bau kele na mfunu ya kubokuta ve?

⁹ Na ntangu na beto, Bambangi yankaka vandaka makambu ngolo na ntangu ya kupona mambu ya bau fwete sala to ya bau fwete sala ve. Yoyina bau vandaka mona mpasi kuluta bankaka. Ntangu nzayilu na bau kumaka mingi, bau kumaka kumona mambu mutindu yankaka. Ata bau monaka mpasi, bantu yai kele na mfunu ya kubokuta ve sambu bau landaka malongi ya mbote ya ntima na bau. Yau kele kima ya kyese kana bau ndimaka mpasi sambu na kumonisa kwikama na bau na Yehowa, sambu bau “salaka mambu yai yonso sambu na Nsangu ya Mbote.” Yehowa kesakumunaka bantu ya kekangamaka na yandi mutindu yai. (1 Korinto 9:23; Baebreo 6:10) Ntumwa Piere sonikaka na mayele yonso nde: “Kana bantu ya nkaka kupesa beno mpasi na mambu ya mbote ya beno me sala, ebuna beno ke kanga ntima na mpasi yina, yina kele mambu ya Nzambi ke zolaka.”​—⁠1 Piere 2:⁠20.

Dilongi na Mbandu ya Yonasi

10, 11. Inki mutindu yau kemonika nde Yonasi tulaka ve ntima na Yehowa (a) ntangu Yehowa tindaka yandi na Ninive? (b) ntangu Nzambi fwaka ve bantu ya Ninive?

¹⁰ Yehowa tulaka ntima na Yonasi mpi tindaka yandi na bwala Ninive. Yonasi buyaka mukumba yina. Ntangu kukolama na yandi natilaka yandi bampasi, ntu na yandi kukangukaka. Yandi bakisaka nde yandi mesala mbi, ebuna yandi lemfukaka, yandi kwendaka na Ninive mpi kebisaka bantu nde lufwa vandaka mfinama. Bantu ya Ninive balulaka ntima, ebuna Yehowa fwaka bau dyaka ve. Yonasi zabaka ve nde yau tavanda buna.​—⁠Yonasi 1:1–3:⁠10.

¹¹ Inki Yonasi salaka? Nitu kulembaka yandi, yandi yantikaka kubokutila Nzambi na kisambu. Tala ngindu na yandi mutindu yo vandaka: ‘Si mu zabaka nde mambu tasalama mutindu yai, yoyina mu buyaka na kukwisa na Ninive. Ebuna mpasi yonso ya mu memona ti nsoni, mbisi ya masa memina mono, mu mebasisa mutoki na kukebisa bantu ya Ninive nde bo tafwa, yonso yai memonana mpasi ya mpamba! Kana mu zabaka, mu zolaka ndima lufwa!’​—⁠Yonasi 4:​1-3.

12. Inki dilongi beto kebaka na mbandu ya Yonasi?

¹² Inki kikuma Yonasi vandaka na yau sambu na kubokuta mutindu yai? Keti kana bansumuki mebalula ntima, Yehowa melolula bau, yandi mesala mbi? Bantu mafunda kumi ya mvimba kugulukaka, kansi Yonasi waka kyese ve! (Yonasi 4:11) Na yau, kukonda luzitu ti kubokuta na yandi monisaka nde yandi vandaka tula ntima mingi ve na lunungu ya Yehowa. Yandi yindulaka ntete kaka mambote na yandi, ya bantu ya nkaka ve. Dilongi ya beto kebaka na mbandu ya Yonasi kele nde beto fwete tulaka ve mambote na beto na ntwala. Beto ndima nde mambu ya mbote ya beto fwete sala kele: kulemfuka na Yehowa, kulanda lutwadisu ya organizasio na yandi, ti kundima banzengolo na yandi. Beto kendima nde ‘kana beto zitisa Nzambi, mambu na beto yonso ta kwenda mbote.’​—⁠Longi 8:⁠12.

Yai Ntangu ya Kuyedisa Kikalulu ya Kutula Ntima!

13. Inki mutindu beto yonso lenda yedisa kikalulu na beto ya kutula ntima na Yehowa?

¹³ Muntu ya mayele fwete yedisa kikalulu na yandi ya kutula ntima na Yehowa. (Bingana 3:​5-8) Yau kele ve kaka dikambu ya kusamba Yehowa sambu yandi sadisa beto na kubanda kutula ntima mingi. Kansi, kima ya keyedisaka kikalulu ya kutula ntima kele nzayilu ya sikisiki. Na yau, beto fwete longukaka Biblia beto mosi, beto fwete tangaka yau ti mikanda yina ketendulaka yau. Yau fwete kuma kikalulu na beto. Beto fwete vanda ntangu yonso na balukutakanu, beto fwete yidika yau mpi kupesa bamvutu. Dyaka, beto fwete longa bantu yankaka kyeleka ti kununga bantembe na mayele mpenza, yau tayedisa kikalulu na beto ya kutula ntima na Yehowa ti na Ndinga na yandi. Kana beto sala buna, beto tayibukaka yandi konso kilumbu.

14. Sambu na inki ntama mingi ve, bantu ya Nzambi tatula yandi ntima na kiteso ya bau metulaka ntete ve?

¹⁴ Ntama mingi ve, mpasi ya kuluta bampasi yonso tabwila bantu na kintulumukina. (Matayo 24:21) Na ntangu yina, bansadi ya Yehowa fwete tula ntima na kiteso ya bau metulaka ntete ve na lunungu ya Yehowa ti lutwadisu ya kimvuka na yandi kepesaka. Na kifwani, bau talemfuka na ntuma yai ya Nzambi: “Beno kota na banzo na beno, beno kanga bakielo. Beno bumbana fioti tii kuna makasi ya Nzambi kumana.” (Yezaya 26:20) Bau meyitaka kukota na mabundu kuluta 85000 ya kebumbaka bau na bansi 232. Kana ke ti mambu yankaka ya beto tasala, ya ketendula ‘kukota na banzo na beto,’ beto tula ntima nde Yehowa tasonga beto yau.

15. Inki mutindu dyambu ya kutula ntima metubama mingi na 1998, ye sambu na inki yo ke mbote?

¹⁵ Yau kele mfunu mingi nde beto yedisa kikalulu na beto ya kutula ntima ntangu yai. Beto taguluka ve kana beto ketula ve ntima ntetentete na Yehowa, na organizasio na yandi, mpi na bampangi na beto Bakristu. Yoyina, yau melungana mpenza ti mukapu ya mvu 1998, yina keyibusa konso ntangu Bambangi yonso na ntoto nde: “Konso muntu yina tasamba na zina ya Yehowa taguluka”! (Roma 10:​13, NW) Beto fwete tula ntima na mambu yina. Kana dute fyoti kezo kota na ntima, sala ngolo na kufwa yau ntangu yai to bubu yai.

Yehowa Tasambisa na Lunungu

16. Inki lenda salama kana beto keyedisa ve kikalulu na beto ya kutula ntima, ye inki beto fwete sala sambu yo salama buna ve?

¹⁶ Mukapu ya Baebreo 3:14 kesyamisa Bakristu ya kupakulama mutindu yai: “Kana beto ke tula kaka ntima tii na nsuka mutindu beto tulaka ntima na luyantiku, beto kele kimvuka mosi ti Kristo.” Mambu yai ketadila mpi Bakristu yina kele ti kivuvu ya kuzinga na ntoto. Ntima ya beto tulaka na luyantiku lenda katuka kana beto keyedisa yau ve. Yau yina, beto fwete kwamina mpenza na kubaka nzayilu ya sikisiki!

17. Sambu na inki beto fwete tula ntima nde Yezu tasambisa mbote, na mpila nde bayina mefwana na kuguluka, bo guluka?

¹⁷ Kubika fyoti, Kristu “ta kabula [bantu ya nsi-ntoto] na makabu zole, mutindu ke salaka [ngungudi] ntangu yandi ke kabulaka mameme na bankombo.” (Matayo 25:​31-33) Beto fwete tula ntima nde Kristu tazenga mambu na lunungu sambu bayina mefwana na kuguluka, bau guluka. Yehowa mepesaka yandi mayele, luswasukusu, ti bikalulu yankaka sambu na ‘kusambisa bantu na nzila ya kieleka.’ (Bisalu 17:​30, 31) Beto ndima bonso Abrahami nde: “Ve, nge [Yehowa] ta fwa ve bantu ya mbote nzila mosi na bantu ya mbi. Ve, nge ta sala yo ve! Kana nge sala yo, mpidina ti bantu ya mbote ti bantu ya mbi nge me pesa bo ndola mutindu mosi. Mpila kele ve. Nge Nzambi muntu ke sambisaka bantu yonso ya nsi-ntoto, nge ta sala mambu na nzila ya mbote.”​—⁠Kuyantika 18:⁠25.

18. Sambu na inki beto fwete kudiyangisa ve sambu na mambu ya beto kezaba ve ntangu yai?

¹⁸ Kana beto ketula ntima yonso nde Yehowa kesalaka mambu na lunungu, beto takudiyangisa ve ti bangyufula ya mutindu yai: ‘Inki mutindu Nzambi tasambisa bana ya fyoti? Keti yau tavanda ti bantu yina mewaka ntete ve nsangu ya mbote ntangu Armagedoni tayantika? Inki mutindu yandi tasambisa bantu bonso biyungu ti bantu ya kilawu? Inki mutindu . . . ’ Ata na ntangu yai beto kezaba ve inki Yehowa tasala ti bantu ya mutindu yina, beto fwete zaba nde mambu ya yandi tasala, tavanda na nzila ya lunungu mpi ya mawa. Beto fwete vanda na dute ve na mambu yina. Ntembe kele ve nde beto tayituka mpi tawa kyese ntangu beto tamona yandi meyidika yau, mbala yankaka na mpila mosi ya beto meyindulaka ntete ve ata fyoti.​—⁠Fwanisa ti Yobi 42:3; Nkunga 78:​11-16; 136:​4-9; Matayo 15:31; Luka 2:⁠47.

19, 20. (a) Sambu na inki yau kele mbi ve na kuyula bangyufula ya mayele? (b) Inki ntangu Yehowa tapesa bamvutu?

¹⁹ Bambeni yankaka ketubaka nde organizasio ya Yehowa kezolaka ve bangyufula ya bantu keyulaka na masonga, na ntangu ya mbote. Yo ke luvunu. (1 Piere 1:​10-12) Kima ya Biblia kebuya kele bangyufula ya buzoba, ya ntembe. (Tito 3:⁠9) Kansi, kuyula bangyufula ya mayele ti kusosa bamvutu na Ndinga ya Nzambi mpi na mikanda ya Bukristu kele nzila ya kepesaka beto nzayilu mingi sambu na kuyedisa kikalulu na beto ya kutula ntima na Yehowa. Organizasio kelandaka mbandu ya Yezu. Yezu vandaka pesa ve mvutu na bangyufula yina yandi monaka nde ntangu ya kupesila yau mvutu melunga ntete ve. Yandi tendulaka nde: “Mono ke na mambu mingi diaka ya kutubila beno, kansi beno lenda kanga yo ntima ve ntangu yai.” (Yoane 16:12) Yandi ndimaka mpi nde, yandi vandaka zaba ve mambu yankaka na ntangu yina.​—⁠Matayo 24:⁠36.

²⁰ Yehowa kele dyaka na mambu mingi ya yandi tatendula. Yau kele mbote na kukinga ntangu ya yandi metulaka. Beto fwete tula ntima nde kana yau melunga, yandi tasonga beto balukanu na yandi, beto tazaba banzila na yandi mbotembote. Ee, beto tabaka lufutu kana beto ketula ntima kaka na Yehowa ti na organizasio ya yandi kesadilaka. Bingana 14:26 (NW) kesonga beto nde: “Kubanga Yehowa kenataka muntu na kutula ntima, ye kisika ya kubumbana tavanda sambu na bana na yandi.”

[Noti na nsi ya lutiti]

Inki Nge Keyindula?

◻ Sambu na inki beto lenda ve kupesa nzila nde mpasi kumanisa kikalulu na beto ya kutula ntima na Yehowa?

◻ Inki dilongi beto lenda baka na mbandu ya Yonasi?

◻ Sambu na inki kulonguka Biblia ti kuvanda na balukutakanu kele mfunu mingi?

[Kifwanisu ya kele na lutiti 15]

Ata na ntwala ya lufwa, beto lenda tula ntima nde Yehowa kele Nzambi ya lunungu

[Kifwanisu ya kele na lutiti 16]

Keti ya kyeleka nge ketulaka ntima na Yehowa?