Inki Mpila Beto Fwete Tadila Bantu na Ntangu Yai ya Kilumbu ya Yehowa Kefinama?

‘Nzambi me sukinina ve na kusala mambu yina ya yandi silaka, . . . Nzambi kekangaka ntima sambu na beno, sambu yandi kezolaka ve nde ata muntu mosi kuvila; kansi yandi kezolaka nde bantu yonso kubalula ntima.’​—2 PIERE 3:9.

1, 2. (a) Inki mutindu Yehowa ketadilaka bantu bubu yai? (b) Inki bangyufula beto lenda kudiyula?

BANSADI ya Yehowa kele ti mukumba ya “kwenda kukumisa bantu yonso balonguki.” (Matayo 28:19) Na ntangu ya beto kelungisa mukumba yai mpi kevingila “kilumbu ya nene ya Mfumu Nzambi,” beto fwete tadilaka bantu mutindu yandi ketadilaka bo. (Sofonia 1:14) Kansi nki mutindu Yehowa ketadilaka bantu? Ntumwa Piere ketuba nde: “Bantu ya nkaka ke yindulaka nde Nzambi me sukinina na kusala mambu yina ya yandi silaka, kansi mpidina ve. Nzambi ke kangaka ntima sambu na beno, sambu yandi ke zolaka ve nde ata muntu mosi kuvila; kansi yandi ke zolaka nde bantu yonso kubalula ntima.” (2 Piere 3:9) Nzambi kemonaka bantu nde bo lenda kubalula ntima. Yandi ‘kezolaka nde bantu yonso kuguluka, bo kuzaba mambu ya kieleka.’ (1 Timoteo 2:4) Ya kyeleka, Yehowa kevandaka na kyese kana ‘muntu ya mbi kubika kusala mbi, sambu yandi kuzinga’!​—Ezekiele 33:11.

² Keti beto ketadilaka bantu mutindu Yehowa ketadilaka bo? Bonso yandi, keti beto ketadilaka bantu ya bampusu ya nitu yonso mpi ya makanda yonso nde bo lenda kuma “mameme na yandi”? (Nkunga 100:3; Bisalu 10:34, 35) Bika beto tadila bambandu zole yina kemonisa mfunu ya kutadila bantu mutindu Yehowa ketadilaka bo. Na konso mbandu, ntangu ya kufwa bantu kukumaka penepene, kansi na konso mbala, Yehowa vandaka kuzabisa bansadi na yandi mambu yina yandi kanaka na kusala. Bambandu yai kele mpenza mfunu sambu na beto bantu ya kevingila kilumbu ya nene ya Yehowa.

Abrahami Vandaka Kutadila Bantu Bonso Yehowa

3. Inki mutindu Yehowa kutadilaka bantu ya Sodome ti Gomore?

³ Mbandu ya ntete kele ya Abrahami, mfumu ya kikanda ya kwikama, ti bambanza zole ya mbi Sodome ti Gomore. Ntangu Yehowa kuwaka bidilu ya ‘kufundaka bantu ya Sodome ti Gomore,’ yandi fwaka ve bambanza yai ti bantu na yo na mbala mosi. Yandi zikisaka ntete. (Kuyantika 18:20, 21) Yandi tindaka bawanzio zole na Sodome. Bawanzio yango kwendaka kuvanda na nzo ya muntu ya kwikama Loti. Na mpimpa yina ya bawanzio kukumaka, “bantu ya bwala . . . kwisaka kuziunga nzo ya Loti. Babakala yonso vandaka kuna, baleki ti bambuta.” Bo kwisaka sambu na kuvukisa nitu ti bawanzyo yina. Bikalulu ya mbi ya bantu ya mbanza yai kumonisaka pwelele mpenza nde bo mefwana na kufwa. Kansi, bawanzyo kusongaka Loti nde: “Nge ke na bampangi ya nkaka awa na bwala yai? Baka bana na nge, babakala ti bankento, baka mpi konso mpangi na nge, ebuna katula bo na bwala yai!” Yehowa kukangulaka nzila sambu na kugulusa ndambu ya bantu ya mbanza yina, kansi nsukansuka, kaka Loti ti bana na yandi zole ya bankento bantu kugulukaka.​—Kuyantika 19:4, 5, 12, 16, 23-26.

4, 5. Sambu na nki Abrahami kubondilaka Nzambi sambu na bantu ya Sodome, mpi keti mutindu na yandi ya kutadila bantu kuvandaka bonso yina ya Yehowa?

⁴ Ntangu yai, beto vutuka fyoti na ntangu yina Yehowa kusongaka ngindu na yandi ya kuzikisa kana mambu yina bo fundilaka Sodome ti Gomore kuvandaka ya kyeleka. Ntangu Abrahami kuwaka mutindu yina, yandi bondilaka Nzambi nde: “Kana na bwala yina bantu makumi tatu kumonana bayina me sala mbi ve, keti nge ta fwa bwala ya mvimba? Mpila kele ve na kuwila bo yonso mawa sambu na bantu yina makumi tanu? Ve, nge ta fwa ve bantu ya mbote nzila mosi na bantu ya mbi. Ve, nge ta sala yo ve! Kana nge sala yo, mpidina ti bantu ya mbote ti bantu ya mbi nge me pesa bo ndola mutindu mosi. Mpila kele ve. Nge Nzambi muntu ke sambisaka bantu yonso ya nsi-ntoto, nge ta sala mambu na nzila ya mbote.” Abrahami kusadilaka mbala zole ngindu yina kemonisa nde “ve, nge ta sala yo ve!” Na luzingu na yandi, Abrahami vandaka kuzaba nde Yehowa lendaka kufwa ve bantu ya mbote kumosi ti bantu ya mbi. Ntangu Yehowa kutubaka nde yandi tafwa ve Sodome kana ‘bantu makumi tatu kumonana yina me sala mbi ve,’ Abrahami kulandaka na kukulumusa ntalu ya bantu malembemalembe tii kuna yandi sukaka na kumi.​—Kuyantika 18:22-33.

⁵ Keti Yehowa zolaka kuwa mambu yina Abrahami vandaka kulomba yandi kana yo vandaka kuwakana ve ti mutindu na yandi ya kutadila mambu? Ata fyoti ve. Sambu yandi vandaka ‘nduku ya Yehowa,” yo kemonana nde Abrahami kuzabaka dibanza ya Yehowa mpi yandi vandaka kundima yo. (Yakobo 2:23) Ntangu Yehowa kutulaka dikebi na yandi na Sodome ti Gomore, yandi ndimaka na kutadila mambu yina Abrahami kulombaka yandi. Sambu na nki? Sambu Tata na beto ya zulu “ke zolaka ve nde ata muntu mosi kuvila; kansi yandi ke zolaka nde bantu yonso kubalula ntima.”

Yonasi Kutadilaka Bantu na Mutindu Mosi ya Kuswaswana Kibeni

6. Inki bantu ya Ninive kusalaka ntangu bo waka nsangu yina Yonasi kunataka?

⁶ Tadila ntangu yai mbandu ya zole: mbandu ya Yonasi. Na mbala yai, mbanza ya Nzambi zolaka kufwa kele Ninive. Nzambi kupesaka profete Yonasi mukumba ya kusamuna nde mambi ya mbanza yina “me kuma tii na meso ya Yehowa.” (Yonasi 1:2) Kana nge yika ti babwala na yo ya nzyunga, Ninive kuvandaka mbanza mosi ya nene, yina “muntu fweti sala bilumbu tatu na kuzenga yo nsongi na nsongi.” Nsukansuka, ntangu Yonasi kulemfukaka mpi kwendaka kukota na Ninive, yandi lembaka ve na kuzabisa bantu nde: “Na nima ya bilumbu makumi iya (40) Nzambi ta fwa bwala yai Ninive!” Ntangu bo waka mpidina, “bantu ya Ninive monaka nde mambu yai ya Nzambi songaka bo yo fweti bwa mpidina; yo yina bo wakanaka nde konso muntu lenda kudia kima ve ata mvwama ata nsukami. Bantu yonso lwataka mpi basaki sambu na kusonga nde bo ke na mawa.” Nkutu ata ntotila ya Ninive mpi kubalulaka ntima.​—Yonasi 3:1-6.

7. Inki mutindu Yehowa kutadilaka mabanza ya kubalula ntima ya bantu ya Ninive?

⁷ Bantu yai kusalaka mambu mosi ya kuswaswanaka mpenza ti yina ya bantu ya Sodome! Inki mutindu Yehowa kutadilaka bantu ya Ninive yai ya kubalulaka ntima? Yonasi 3:10 ketuba nde: “Nzambi . . . [ya kyeleka, NW] monaka nki mutindu bo bikisaka banzila na bo ya mbi. Yo yina yandi balulaka mabanza na yandi, yandi salaka diaka ve mambu yina ya nene ya yandi zolaka kusala bo.” Yehowa ‘kubalulaka mabanza,’ disongidila, yandi fwaka ve bantu ya Ninive mutindu yandi kanaka yo sambu bo balulaka bikalulu na bo. Minsiku ya Yehowa kusobaka ve, kansi Yehowa kusobaka lukanu na yandi ntangu yandi monaka nde bantu ya Ninive kubalulaka ntima.​—Malashi 3:6.

8. Sambu na nki Yonasi kusepilaka ve?

⁸ Ntangu Yonasi kubakisaka nde Nzambi tafwa dyaka ve Ninive, keti yandi tadilaka mambu bonso Yehowa? Ve, sambu Biblia kesonga beto nde: “Yonasi monaka kiese ata fioti ve mutindu Mfumu Nzambi balulaka mabanza na yandi, yandi waka makasi.” Inki Yonasi kusalaka dyaka? Disolo kelanda na kutuba nde: “Yandi sambaka Mfumu Nzambi nde: ‘Mfumu, keti yai kele ve mutindu mono banzaka nde nge ta sala ntangu mono vandaka diaka na bwala na beto? Yo yina mono tulaka ngolo na kutina ka mono na bwala Tarsisi. Mono zabaka nde nge kele Nzambi mosi ke zolaka bantu, ke wilaka bo mpi mawa; ntangu yonso nge ke songaka mambote na nge, nge ke bikisaka mpi nswalu mabanza na nge ya kupesa bantu ndola.’” (Yonasi 4:1, 2) Yonasi kuzabaka bikalulu ya Yehowa. Kansi, na ntangu yandi monaka mpidina, profete kusepilaka ve, mpi yandi ndimaka ve dibanza ya Yehowa kukumaka na yo ntangu bantu ya Ninive kubalulaka ntima.

9, 10. (a) Inki dilongi Yehowa kupesaka Yonasi? (b) Sambu na nki beto lenda tuba nde nsukansuka, Yonasi kutadilaka bantu ya Ninive bonso Yehowa?

⁹ Yonasi kubasikaka na Ninive, yandi tungaka kamwa-kisasa, ebuna yandi vandaka na nsi ya madidi na yo sambu na kutala “kana nki mambu ta bwa na bwala yina Ninive.” Yehowa kumenisaka mwa-nti sambu yo pesa Yonasi madidi. Kansi na kilumbu ya kulandaka, nti yango kukaukaka. Ntangu Yonasi kuwaka makasi sambu nti yina kukaukaka, Yehowa kutubaka nde: “Nge ke mona mawa sambu na mwa-nti yai . . . Ebuna mono, keti mono lenda mona mawa ve sambu na Ninive, bwala yai ya nene-nene, ke na bantu kuluta mile nkama mosi makumi zole (120 000) bayina me zaba ve kusola wapi mambu ya mbote wapi mambu ya mbi, bwala yina kele mpi na bambisi mingi? Nki mutindu mono lenda wila bwala yai mawa ve?” (Yonasi 4:5-11) Ya kyeleka, Yonasi kubakaka dilongi mosi ya nene ya metala mutindu Yehowa ketadilaka bantu!

¹⁰ Biblia ketubila beto ve kana nki mutindu Yonasi kudiwaka na nima ntangu Nzambi kumonisaka yandi nde yandi wilaka bantu ya Ninive mawa. Kansi, yo kemonana pwelele nde profete yai kusobaka mutindu na yandi ya kutadila bantu ya Ninive yina kubalulaka ntima. Beto ketuba mutindu yina sambu Yehowa kusadilaka yandi na kusonika disolo yai ya kupemama.

Inki Mutindu Nge Ketadilaka Bantu?

11. Kana Abrahami kuvandaka na luzingu, inki mutindu yandi zolaka kutadila bantu bubu yai?

¹¹ Bubu yai, lufwa kevingila ngidika ya mbi ya bima ya ntangu yai na kilumbu ya nene ya Yehowa. (Luka 17:26-30; Galatia 1:4; 2 Piere 3:10) Kana Abrahami kuvandaka na luzingu, nki mutindu yandi zolaka kutadila bantu yina kezinga na inza yai ya tafwa ntama mingi ve? Ya kyeleka, yandi zolaka kuvanda ti susi ya bantu yina mewa ntete ve ‘nsangu ya Mbote ya Kimfumu.’ (Matayo 24:14) Abrahami kubondilaka Nzambi mbala mingi sambu na bantu ya mbote yina lendaka kuvanda na kati ya Sodome. Keti beto mpi kekudibanzaka sambu na bantu yina lenda yambula banzila ya inza yai ya Satana kana muntu kupesa bo okazio ya kubalula ntima mpi ya kusadila Nzambi?​—1 Yoane 5:19; Kusonga 18:2-4.

12. Sambu na nki yo kele mpasi ve na kuyedisa mabanza bonso yina ya Yonasi sambu na bantu yina beto kekutanaka na bo na kisalu ya kusamuna, mpi nki beto lenda sala sambu na kuvanda ve na dibanza ya mutindu yina?

¹² Yo kele mbi ve na kuvanda na mpusa nde mambi kusuka. (Habakuki 1:2, 3) Kansi, yo kele pete kibeni na kuyedisa mabanza bonso yina ya Yonasi ya kukonda kudibanza sambu na mambote ya bantu yina lenda balula ntima. Beto lenda yedisa dibanza ya mutindu yina mingimingi kana beto kekutana ti bantu yina kebuya kundima nsangu na beto, kemenga beto, to nkutu kenwanisa beto na ntangu ya beto kekwenda kunatila bo nsangu ya Kimfumu na banzo na bo. Beto lenda vila nde Yehowa kele ti bantu yankaka ya yandi ke na kubasisa na kati ya ngidika ya bima yai ya mbi. (Roma 2:4) Kana beto metadila mabanza na beto mbotembote, mpi beto memona nde yo kele bonso yina ya Yonasi kuvandaka na yo na ntete sambu na bantu ya Ninive, beto fwete samba sambu na kulomba lusadisu na mpila nde mabanza na beto kukuma bonso ya Yehowa.

13. Sambu na nki beto lenda tuba nde Yehowa kevandaka na susi ya bantu bubu yai?

¹³ Yehowa kekudibanzaka sambu na bantu yina meyantika ntete ve na kusadila yandi, mpi yandi kewaka bisambu ya bantu na yandi yina mekudipesaka. (Matayo 10:11) Mu mbandu, “yandi ta sadisa bo” sambu na kumonisa nde yandi mendima bisambu na bo. (Luka 18:7, 8) Kuluta dyaka, Yehowa talungisa balusilu ti balukanu na yandi yonso na ntangu yina ya yandi mosi metulaka. (Habakuki 2:3) Yandi takatula mambi yonso na zulu ya ntoto, kaka mutindu yandi fwaka Ninive na nima ntangu bantu ya mbanza yai kuvutukilaka dyaka mambu ya mbi.​—Nahumi 3:5-7.

14. Inki beto fwete salaka na ntangu ya beto kevingila kilumbu ya nene ya Yehowa?

¹⁴ Tii kuna ya ngidika ya bima yai tafwa na kilumbu ya nene ya Yehowa, keti beto tavanda kevingila na kukanga ntima yonso, na kudipesaka na kulungisa luzolo na yandi? Beto kezaba ve mambu yankaka mingi ya metala kiteso ya kisalu ya kusamuna yina tasalama dyaka na ntwala nde kilumbu ya nene ya Yehowa kukwisa, kansi beto kezaba nde nsangu ya mbote ya Kimfumu talongama na ntoto ya mvimba na kiteso yina tasepedisa Nzambi na ntwala nde nsuka kukwisa. Ya kyeleka, beto fwete kudibanza sambu na “bimvwama” yina fwete kota dyaka na nzo ya Yehowa na ntangu ya Yandi kelanda na kufulusa nkembo na nzo na yandi.​—Agai 2:7.

Mutindu na Beto ya Kutadila Bankaka Kemonanaka na Bisalu na Beto

15. Inki lenda sadisa beto na kusepela mingi ti kisalu na beto ya kusamuna?

¹⁵ Ziku beto kezingaka na kisika yina bantu mingi ve kendimaka ntangu beto kesamunaka mpi beto takuka ve kukwenda na kisika yankaka yina mfunu ya bansamuni ya Kimfumu kele mingi. Kana nde bantu kumi lenda monika na teritware na beto na ntwala nde nsuka kukwisa, keti beto keyindula nde bantu yina kumi mefwana mpenza nde beto kwenda kusosa bo? Yezu kuwilaka bantu “mawa, sambu bo vandaka me lemba, kikesa ve, bonso mameme me konda ngungudi ya kutala bo.” (Matayo 9:36) Kana beto kelonguka Biblia mpi beto ketanga na dikebi yonso masolo yina kebasikaka na Nzozulu ya Nkengi ti na Réveillez-vous !, beto tabakisa mbote mpenza nki mutindu inza mekuma. Mpi dyambu yai tasadisa beto na kubakisa dyaka mbote mfunu ya kusamuna nsangu ya mbote. Kuluta dyaka, kusadila mbote mambu yina kele na mikanda ya ketendulaka Biblia yina “mpika ya kwikama mpi ya mayele” kebasisaka lenda sadisa beto na kusoba mutindu na beto ya kutadila teritware yina beto kesamunaka mingi.​—Matayo 24:45-47, NW; 2 Timoteo 3:14-17.

16. Inki mutindu beto lenda sala sambu na kutomisa kisalu na beto ya kusamuna?

¹⁶ Susi na beto sambu na bantu yina lenda ndima nsangu ya Biblia yina kegulusaka kepusa beto na kutadila bangunga ti mitindu ya kuswaswana yina beto lenda sadila sambu na kusolula ti bantu na kisalu ya kusamuna. Keti beto kemonaka nde bantu kevandaka ve na banzo na bo ntangu beto kekwendaka kutala bo? Kana mpidina, beto lenda tomisa kisalu na beto ya kusamuna kana beto kesoba bangunga ti bisika ya beto kekwendaka kusala kisalu na beto ya kuta kimbangi. Bantu yina kelobaka kekwendaka kuloba na ntangu yina bo lenda kanga bambisi. Keti beto lenda sala mutindu mosi na kisalu na beto ya kuloba bambisi ya kimpeve? (Marko 1:16-18) Sambu na nki beto meka ve kusala kisalu ya kuta kimbangi na nkokila mpi na telephone, na bisika yina leta mepesaka nswa? Bantu mingi memonaka nde baparking, bisika bakamio ya nene ketelemaka, bisika bo ketekaka mazuti ti esanse kele bisika ya mbote ya kukanga “bambisi.” Kikalulu na beto ya kutadila bantu bonso Abrahami kemonanaka na ntangu beto kesadilaka baokazio ya kusamuna na dibaku ya mbote.

17. Na nki mitindu beto lenda pesa kikesa na bamisionere ti na bantu yankaka yina kesalaka na bansi ya nzenza?

¹⁷ Bantu mingi mewaka ntete ve nsangu ya Kimfumu. Katula kisalu ya kusamuna yina beto kesalaka, keti beto lenda monisa susi sambu na bantu ya mutindu yina ata beto mekwenda ve kuzinga na kisika yankaka? Keti beto mezaba bamisionere to bansadi ya ntangu yonso yina kesalaka na bansi ya banzenza? Kana beto mezaba bo, yo tavanda mbote kana beto kesonikila bo mikanda sambu na kumonisa bo nde beto kesepilaka na kisalu na bo. Inki mutindu kusala mutindu yina lenda monisa nde beto kele na susi ya bantu na kimvuka? Mikanda na beto ya kikesa mpi ya kusikisa tasadisa bamisionere na kubikala na kisalu na bo, sambu na kusadisa bantu yankaka mingi na mpila nde bo baka nzayilu ya kyeleka. (Bazuzi 11:40) Beto lenda samba mpi sambu na bamisionere mpi sambu na bantu ya bansi yankaka yina kele na nzala ya kyeleka. (Efezo 6:18-20) Mutindu yankaka ya beto lenda monisa susi na beto kele yai: kupesa makabu ya mbongo sambu na kusimba kisalu yina Bambangi ya Yehowa kesalaka na ntoto ya mvimba.​—2 Korinto 8:13, 14; 9:6, 7.

Keti Nge Takuka Kukwenda Kisika Yankaka?

18. Inki Bakristu yankaka mesalaka sambu na kuyedisa mambote ya Kimfumu na bansi yina bo kezingaka?

¹⁸ Bantu yina mekwendaka na bisika yina mfunu ya bansamuni ya Kimfumu kele mingi mebakaka balusakumunu mingi sambu na mpeve na bo ya kuditambika. Kansi, Bambangi ya Yehowa yankaka yina mebikalaka na bansi na bo, melongukaka ndinga yankaka sambu na kupesa lusadisu ya kimpeve na bantu yina mekwendaka kuzinga na bansi ya nzenza. Bampangi ya mutindu yai mebakaka balusakumunu mingi sambu na bikesa na bo. Mu mbandu, Bambangi nsambwadi yina vandaka kusadisa bantu ya Chine yina vandaka kuzinga na mbanza ya Texas, na États-Unis, kuyambaka bantu 114 na Madya ya Nkokila ya Mfumu na mvu 2001. Bantu ya kesadisaka bibuka ya mutindu yina mezwaka bilanga na bo ya mbote ya kubuka bambuma.​—Matayo 9:37, 38.

19. Bo kelongisila nge na kusala nki kana beto kekana kukwenda na insi ya nzenza sambu na kudipesa mingi na kisalu ya kusamuna Kimfumu?

¹⁹ Mbala yankaka nge ti dibuta na nge, beno kemona nde beno mefwana na kwenda kuzinga kisika yankaka yina mfunu ya bansamuni ya Kimfumu kele mingi. Kansi, ntetentete, yo kele mayele na ‘kuvanda sambu na kuyindula kana mbongo ntalu ikwa beno tabasisa.’ (Luka 14:28) Yo kele mfunu na kusala mpidina mingimingi na ntangu muntu kekana kukwenda na insi yankaka. Yo tavanda mbote nde konso muntu yina kezola kukwenda na insi yankaka kudiyula bangyufula bonso yai: Keti mu takuka na kudisa dibuta na mono? Keti mu takuka kubaka mukanda ya leta (visa) ya mbote yina kepesaka nswa ya kukota na insi ya nzenza? Keti mu ketubaka dezia ndinga ya insi yango to mu kezola kulonguka yo? Keti mu metadila bansungi ya insi yango ti mutindu bantu kezingaka kuna? Keti ya kyeleka mu takuka ‘kupesa kikesa mingi’ na bampangi-Bakristu yina mu takuta na insi yina, kansi mu takuma ve kizitu sambu na bo? (Kolosai 4:10, 11) Sambu na kuzaba kiteso ya mpusa yina kele na insi ya nge kekana kukwenda, yo kevandaka ntangu yonso mbote na kusonikila biro ya filiale ya Bambangi ya Yehowa yina ketalaka kisalu ya kusamuna ya teritware yina.a

20. Mukristu mosi kusalaka nki sambu na kudipesa mingi na kusadisa bampangi-Bakristu yankaka ti bantu mingi ya insi mosi ya nzenza?

²⁰ Mukristu mosi yina vandaka kusala kisalu ya kutunga Banzo ya Kimfumu na Japon kuwaka nde na Paraguay bo vandaka ti mfunu ya bantu yina mezaba kutunga sambu na kutunga kisika mosi ya lusambu. Sambu yandi vandaka mekwela ntete ve mpi yandi vandaka kikesa, mpangi yango kwendaka na insi yina mpi yandi salaka kisalu bangonda nana. Yandi vandaka kaka yandi mosi mpamba nsadi ya ntangu yonso na kisalu yina. Na ntangu yandi vandaka kuna, mpangi yai kulongukaka Kiespaniole mpi yandi longukaka Biblia ti bantu. Yandi monaka nde mpusa ya bansamuni ya Kimfumu kuvandaka mingi na insi yina. Ata yandi vutukaka na Japon, ntama mingi ve, yandi vutukaka nswalu na Paraguay mpi yandi pesaka maboko na kisalu ya kusamuna na mpila nde bantu yankaka mingi kuvukana na Nzo ya Kimfumu yina.

21. Inki susi mpi dibanza ya ntetentete beto fwete vanda na yo na ntangu ya beto kevingila kilumbu ya nene ya Yehowa?

²¹ Nzambi tasala yonso na mpila nde kisalu ya kusamuna kusalama, na mutindu mosi ya kewakana ti luzolo na yandi. Bubu yai, yandi kesala na mpila nde kisalu ya kimpeve ya kubuka bambuma ya nsuka kusalama nswalu kibeni. (Yezaya 60:22) Ebuna, na ntangu yai ya beto kevingila kilumbu ya Yehowa, bika nde beto kudipesa na kikesa yonso na kisalu ya kukatula bambuma mpi kutadila bantu mutindu Nzambi na beto ya zola ketadilaka bo.

[Noti na nsi ya lutiti]

Keti Nge Keyibuka?

• Na ntangu ya beto kevingila kilumbu ya Yehowa, inki mutindu beto fwete tadilaka bantu?

• Inki mutindu Abrahami vandaka kutadila bantu ya mbote yina lendaka kuvanda na Sodome?

• Inki mutindu Yonasi kutadilaka bantu ya Ninive yina kubalulaka ntima?

• Inki mutindu beto lenda monisa nde beto ketadila bantu yina mewaka ntete ve nsangu ya mbote mutindu Yehowa ketadilaka bo?

[Kifwanisu ya kele na lutiti 16]

Abrahami vandaka kutadila bantu mutindu Yehowa ketadilaka bo

[Kifwanisu ya kele na lutiti 17]

Yonasi kumaka kutadila bantu ya Ninive yina kubalulaka ntima mutindu Yehowa kutadilaka bo

[Kifwanisu ya kele na lutiti 18]

Susi ya bantu fwete pusa beto na kutadila bangunga ti mitindu ya kuswaswana ya kusamuna nsangu ya mbote