‘Kutina Boma Ve’
1. Inki bampasi beto lenda kutana ti yo ya mefwanana ti ya Yeremia?
1 Ntangu Nzambi kupesaka Yeremia mukumba ya kiprofete, Yeremia kuyindulaka nde yandi mefwana ve. Kansi Yehowa kulembikaka yandi ntima na kutubilaka yandi nde, ‘kutina boma ve,’ mpi kupesaka yandi na mawete yonso kikesa sambu na kulungisa mukumba na yandi. (Yer. 1:6-10) Na bilumbu na beto, nsoni to kukonda kuditudila ntima lenda vanda na bupusi na kisalu na beto ya kusamuna. Bantangu yankaka, kuwa boma na mutindu yina bantu lenda sadila beto mambu to kutadila beto lenda sala nde beto vutuka nima. Inki mutindu beto lenda nunga boma ya mutindu yina, mpi nki balusakumunu beto tabaka?
2. Inki mutindu kudibongisa tasadisa beto na kufyotuna boma na beto na yina metala kisalu ya kusamuna?
2 Kudibongisa na Ntwala: Kudibongisa mbote-mbote lenda sadisa beto mpenza sambu na kufyotuna boma na beto. Mu mbandu, Kana beto tadila na ntwala bantembe yina bantu lenda basisa, beto takudibongisa sambu na kupesa mvutu na batembe yina beto kekutanaka na yo mbala mingi. (Bing. 15:28) Sambu na nki ve kusala bansonga na Lusambu na beto ya Dibuta sambu na kudibongisa na bampasi ya kuswaswana yina beto lenda kutanaka ti yo na nzo-nkanda mpi na kisalu ya kusamuna?—1 Pie. 3:15.
3. Inki mutindu kutula ntima na Yehowa kesadisaka beto na kununga boma?
3 Tula Ntima na Yehowa: Kutula ntima na Nzambi na beto kele kima yina kesadisaka na kununga boma. Yehowa kendimisa beto nde yandi tasadisa beto. (Yez. 41:10-13) Yai lutaninu ya nene mpenza ya beto kele ti yo! Dyaka, Yezu kundimisaka beto nde ata mambu ya kukonda kukana kubasika, mpeve santu ya Nzambi tasadisa beto na mpila nde beto ta kimbangi na mutindu mosi ya mbote. (Mar. 13:11) Yo yina, samba Yehowa mbala na mbala sambu na kulomba yandi mpeve santu na yandi.—Luka 11:13.
4. Inki balusakumunu beto tabaka kana beto kekwamina na kisalu ya kusamuna ata beto kekutana ti bampasi?
4 Balusakumunu: Ntangu beto kekwaminaka na kisalu ya kusamuna ata beto kekutana ti bampasi, beto kekumaka ngolo sambu na kununga bampasi yina beto takutana ti yo na makwisa. Beto keyedisaka kikesa—kikalulu ya bantu yina mefulukaka na mpeve santu. (Bis. 4:31) Dyaka, ntangu beto kenungaka boma na beto ti lusadisu ya Yehowa, beto kekumisaka ngolo lukwikilu na beto mpi ketulaka ntima ngolo na diboko na yandi ya luguluku. (Yez. 33:2) Beto kebakaka mpi kyese yina kekatukaka na kuzaba nde beto ke na kusepedisa Tata na beto ya zulu. (1 Pie. 4:13, 14) Yo yina, bika nde beto tina boma ve sambu na kuzabisa nsangu ya Kimfumu ti kikesa, na kutulaka ntangu yonso ntima na lusadisu ya Yehowa!