Bamvutu na Bangyufula na Beno

◼ Inki Beto Lenda Sala Sambu na Kusadisa Bapasudi-Nzila?

Na nsi-ntoto ya mvimba na nsungi ya mvula ya kisalu ya 2009, bampangi ya babakala ti ya bankento kiteso 800 000 kusalaka bonso bapasudi-nzila ya ntangu yonso mpi ya nene. Bansadi yai ya kisalu ya ntangu yonso kutambikaka bambuma ya ntete ya ntangu na bo, ya ngolo na bo mpi ya bima na bo ya kinsuni sambu na kumwanga nsangu ya mbote ya Kimfumu. (Bing. 3:9) Yo fwete vanda nde, bikesa na bo kusepedisaka mpenza Yehowa! Na nki mitindu beto lenda monisa mabanza ya Yehowa mpi kusadisa bapasudi-nzila na kuvanda na kyese mpi kukanga ntima na kisalu yai?

Yo kele kyeleka nde, kana beto kesadila bangogo ya beto mepona mbote yo lenda pesa bo kikesa na kufula kusala kisalu ya kimupasudi-nzila. (Bing. 25:11) Keti beto lenda yidika manaka na beto ya mposo sambu na kusamuna kumosi ti bo? Ntangu beto kesamuna kumosi, beto lenda pesa bo mwa mbongo sambu na kusadisa bo na kufika badepanse na bo ya transpore, mu mbandu kufutila bo tike. (1 Kor. 13:5; Filp. 2:4) Beto kemonisaka dyaka lusadisu na beto ya zola na kumonisaka kikalulu ya kuyamba banzenza mpi bantangu yankaka na kubingisaka bapasudi-nzila na nzo na beto sambu na kudya kumosi ti bo.​—1 Pie. 4:8, 9.

Masonuku kendimisa beto nde Yehowa tapesa bantu yina ketulaka Kimfumu na yandi na kisika ya ntete mambu yina bo kele na yo mfunu na luzingu. (Nk. 37:25; Mat. 6:33) Mutindu mosi yina yandi kesalaka yo kele na nzila ya zola ya kimpangi na beto ya Bukristu. (1 Yoa. 3:16-18) Ya kyeleka, bapasudi-nzila kevingilaka ve nde bantu yankaka kulungisa bampusa na bo na mambu ya metala mbongo. Mpi bo lenda vanda ve ya kuyilama sambu na kuzabisa bankaka ntangu bo kele na mfunu ya kima mosi. Kansi, beto lenda sadisa bapasudi-nzila yai ya kwikama mpi bayina “ke na kima ve” na kutudilaka bo dikebi mpi kubakisaka bampusa na bo.​—2 Kor. 8:14, 15.

Na mvu-nkama ya ntete na Dibundu ya Senkrea, ntangu Febe nsamuni mosi ya kikesa, kusalaka nzyetelo na Roma, Polo kusyamisaka bampangi ya Roma nde: “Beno yamba yandi mbote na zina ya Mfumu . . . mutindu bantu ya Nzambi fweti yamba bantu; beno sadisa yandi na konso mambu yina yandi ke na yo mfunu.” (Roma 16:1, 2) Beto kele ti dibaku ya kumonisa lusadisu ya zola ya mutindu mosi na bantu ya dibundu na beto yina kezabisaka nsangu ya mbote kukonda kulemba bayina kesalaka bonso bapasudi-nzila ya ntangu yonso mpi ya nene.​—Bis. 5:42.