Les merveilles de la création révèlent la gloire de Dieu

Bantu mingi kezolaka kutala lugangu. Kansi bantu fyoti mpamba kebakisaka nde lugangu kemonisaka mambu mingi na yina metala mabanza mpi mawi ya Ngangi na beto ya Nene. (Roma 1:20) Na ntangu ya ntama, Davidi longukaka mambu ya metala Yehowa na nzila ya Ndinga na Yandi ya kupemama. Kansi yandi “monaka” mpi Yehowa, mpi kupusanaka penepene na yandi na nsadisa ya lugangu. (Nk. 8:4, 5) Video ya kele na ntu-dyambu, Les merveilles de la création révèlent la gloire de Dieu, tasadisa beto, bana na beto, mpi balongoki na beto ya Biblia na kutadila mbote-mbote mambu yankaka ya lugangu ya Yehowa, na kumona bikalulu ti kimuntu ya Ngangi na beto ya Nene, mpi na kupusana penepene na yandi. Na nima ya kutala video, tala kana nge lenda pesa mvutu na bangyufula yai ya kelanda.

(1) Inki mutindu kutadila bunene mpi ndonga ya luyalanganu meyedisa ntonda na nge sambu na Yehowa? (Yez. 40:26) (2) Ntangu beto ketala masa na dikebi yonso, nki mambu beto lenda longuka na yina metala Nzambi? (Kus. 14:7) (3) Inki mutindu bunene ya ntoto mpi kitamina yina kekabulaka yo ti ntangu kemonisa mayele ya Yehowa? (4) Sambu na nki Nzambi gangaka ngonda? (Nk. 89:37) (5) Inki kemonisa nde Yehowa salaka bantu sambu na kusepela ti luzingu? (6) ADN kele nki? (Nk. 139:16) (7) Inki mutindu bantu meswaswana ti bigangwa yonso ya Yehowa ya kele ntoto? (Kuy. 1:26) (8) Inki mambu nge tazola kuzaba na nsi-ntoto ya mpa?

Mambu ya Ngika: (9) Mikubu kukatukaka na wapi? (10) Inki mutindu masa kefwaka nsiku yina kesalaka nde ntoto kubenda bima yonso na zulu na yo (loi de la pesanteur) mpi ketombukaka tii na nsongi ya banti? (11) Masa kesalaka nki na nitu na beto? (12) Pesa bambandu ya kemonisa kuwakana yina kevandaka na kati ya bigangwa yina kele na moyo. (13) Inki mutindu bigangwa yonso kezabaka nde bo fwete vukana ti bigangwa yankaka? (14) “Angle d’or” kele nki, mpi nki mutindu yo kemonanaka na lugangu? (Tala mpi Réveillez-vous ! ya Septembri, 2006, na lutiti 24).

Tala Mbote-Mbote Lugangu ya Yehowa: Yezu syamisaka beto na kutala mbote-mbote bandeke ya zulu mpi kubaka dilongi na “bintuntu yina kele na nseke.” (Mat. 6:26, 28) Kusala mutindu yai lenda sadisa beto na kukumisa lukwikilu na beto ngolo, kutula ntima na Ngangi, mpi kukuma ti ntonda ya mingi sambu na mayele ya Yehowa, ngolo na yandi ya kugulusa, mpi zola na yandi. Na kisika ya kubika nde bima ya nsi-ntoto yai kubenda dikebi na beto, beto sumba ntangu mpi kusala bikesa sambu na kutala bima ya kuyituka ya lugangu ya Yehowa, mpi kuyindulula mambu yina yo kelonga beto sambu na Nzambi na beto.—Nk. 19:2.