Sadila Batrakiti Sambu na Kumwanga Nsangu ya Mbote
1. Inki mutindu bantu ya Nzambi mesadilaka batrakiti?
1 Bantu ya Yehowa kesadilaka banda ntama batrakiti yina ketendulaka Biblia sambu na kumwanga nsangu ya mbote. Na mvu 1880 C. T. Russell ti banduku na yandi yantikaka kubasisa Bible Students’ Tracts (Batrakiti ya balongoki ya Biblia) mpi bo pesaka yo na batangi ya Nzo-zulu ya Nkengi sambu na kukabula yo na bantu. Bo vandaka kubaka batrakiti na mbalu mingi; yo yina na mvu 1884 ntangu C. T. Russell sonikisaka na leta kimvuka mosi ya kesalaka mumbongo ve mpi ya kele na lukanu ya kupesa maboko na bima yonso ya Kimfumu yina kele na ntoto, ngogo “tract” kotaka na kati ya zina ya kimvuka yina, Zion’s Watch Tower Tract Society; bo kebingaka yo bubu yai nde Watch Tower Bible and Tract Society of Pennsylvania. Na mvu 1918, Balongoki ya Biblia kabulaka batrakiti kuluta bamilio 300. Batrakiti kevandaka ntangu yonso bisadilu ya mbote ya kuta kimbangi.
2. Sambu na nki batrakiti kevandaka mbote kibeni?
2 Sambu na Nki Yo Kele Mbote Kibeni: Batrakiti kevandaka ti mikubu mpi yo kebendaka dikebi ya bantu. Nsangu ya nkufi yina kevandaka na kati kesepedisaka bantu mpi kepesaka malongi ya mfunu. Yo kebendaka dikebi ya bawi yina lenda wa boma ya kutanga zulunalu mosi buna to mukanda. Batrakiti kevandaka ve mpasi na kukabula, yo vanda sambu na bansamuni ya mpa to bana ya fioti. Diaka, batrakiti kevandaka tumikanda ya fioti mpi yo kevandaka ve kizitu na kunata.
3. Ta mbandu na nge mosi to yina mebasikaka na mikanda na beto, ya kemonisa mbalu ya batrakiti.
3 Bantu mingi melongukaka kieleka na mbala ya ntete-ntete na nsadisa ya batrakiti. Mu mbandu, nkento mosi na Haiti monaka trakiti na beto mosi na balabala. Yandi lokutaka yo, tangaka yo, mpi yandi tubaka nde, “mono mezwa kieleka!” Nsuka-nsuka, yandi kwendaka na Nzo ya Kimfumu, yandi yantikaka kulonguka Biblia, mpi yandi bakaka mbotika; mambu yai yonso salamaka kaka sambu na ngolo ya Ndinga ya Nzambi yina yandi bakaka na trakiti.
4. Inki tavanda lukanu na beto ntangu batrakiti takuma mikanda ya kukabula na ngonda?
4 Na Kisalu ya Nzo na Nzo: Sambu batrakiti kele bisadilu ya mbote kibeni sambu na kuta kimbangi, yo tavandaka mikanda ya kukabula konso ngonda, yantika na Novembri. Lukanu na beto kevandaka kaka ve ya kupesa batrakiti kansi ya kusadila batrakiti sambu na kuyantika kusolula ti bantu. Kana muwi memonisa mpusa na mbala ya ntete to na mvutukilu ya mpa, beto lenda yantika kulonguka Biblia ti yandi na mukanda Biblia Kelongaka to na mukanda yankaka yina beto kelongukaka Biblia ti bantu. Inki mutindu beto lenda kabula batrakiti na kisalu ya nzo na nzo? Batrakiti kele ya kuswaswana, yo yina beto fwete yikana mbote-mbote ti batrakiti yina beto kele na kukabula.
5. Inki mutindu beto lenda kabula batrakiti na kisalu ya nzo na nzo?
5 Bangogo na beto ya kukotila na masolo fwete wakana ti mambu ya teritware na beto mpi trakiti yina beto ke na kusadila. Beto lenda yantika disolo na kupesaka muwi trakiti. Kimpusu na yo ya zulu lenda tedimisa mpusa na yandi. To beto lenda songa muwi batrakiti ya kuswaswana mpi kulomba yandi na kupona yina kesepedisa yandi. Kana beto kesamuna na teritware yina bantu kewaka boma ya kukangula bakielo na bo, beto lenda monisa muwi trakiti na kisika yina yandi lenda mona kimpusu na yo ya zulu, to beto lenda lomba yandi nswa ya kukotisa yo na nsi ya kielo, mpidina beto tabakisa dibanza na yandi. Kana ntu-diambu ya trakiti yina kele ngyufula, beto lenda lomba yandi na kupesa dibanza na yandi sambu na diambu yango. To beto lenda yula yandi ngyufula ya beto meyidika beto mosi, yina tatedimisa mpusa na yandi mpi tapusa yandi na kusolula ti beto. Na nima beto lenda tangila muwi mwa mambu yina kele na trakiti yango, kupema kisika bangyufula kele mpi kulomba yandi na kupesa dibanza na yandi. Beto lenda tanga baverse ya mfunu na Biblia. Na nima ya kutadila mwa mambu, beto lenda manisa disolo mpi kubaka bangidika ya kuvutukila yandi. Kana dibundu kebikaka mikanda na banzo yina beno kekutaka ve bantu, beto lenda kotisa trakiti mosi na nsi ya kyelo na mpila nde bantu yina keluta kumona yo ve.
6. Inki mutindu beto lenda sadila batrakiti ntangu beto keta kimbangi na babalabala?
6 Na Ntangu ya Kuta Kimbangi na Babalabala: Keti nge kesadilaka batrakiti ntangu nge ketaka kimbangi na babalabala? Bantu yankaka kelutaka nswalu-nswalu na babalabala mpi bo kevandaka ve ti ntangu ya kutelama mpi kusolula ti beto. Yo lenda vanda mpasi na kuzaba kiteso ya mpusa na bo. Yo yina, na kisika ya kupesa bo bazulunalu yina mekatuka kubasika ntama mingi ve, sambu beto mezaba ve kana bo tatanga yo to ve, beto lenda pesa bo trakiti mosi. Sambu kimpusu na yo ya zulu kesepedisaka, mpi nsangu na yo kele nkufi, mpusa na bo ya ngolo ya kusosa kuzaba mambu lenda pusa bo na kutanga yo ntangu bo kele na mwa ntangu fioti. Ya kieleka, kana bo kele nswalu-nswalu ve beto lenda solula ti bo mwa mambu ya kele na kati ya trakiti yina ti bo.
7. Ta baeksperiansi ya kemonisa mutindu ya kusadila batrakiti ntangu beto keta kimbangi ya dibaku ya mbote.
7 Na Ntangu ya Kuta Kimbangi ya Dibaku ya Mbote: Yo kele mpasi ve na kusadila batrakiti na ntangu ya kuta kimbangi ya dibaku ya mbote. Mpangi-bakala mosi ketulaka mwa batrakiti na poshe na yandi konso ntangu yina yandi kezola kubasika na nzo. Ntangu yandi kekutanaka ti muntu mosi buna, mu mbandu muntu ya ketekaka na magazini, yandi keyulaka muntu yango kana yandi tazola kutanga mwa mukanda mpi yandi kepesaka yandi trakiti. Ntangu bakala mosi ti nkento na yandi zolaka kukwenda na mbanza New York sambu na kutala mwa bisika ya kitoko, bo bakisaka nde bo takutana ti bantu ya mekatukaka na bansi ya mutindu na mutindu. Yo yina, bo nataka kamukanda Nations mpi mwa batrakiti mingi na bandinga ya kuswaswana. Na nima, kana bo wa muntu mosi ketuba na ndinga ya nzenza, mu mbandu bantu yina ketekaka na banzila to bayina mevanda penepene na bo na parki to na restora, bo lenda pesa yandi trakiti yina kele na ndinga na yandi.
8. Na nki mutindu batrakiti kele bonso bankeni?
8 ‘Kuna Nkeni na Nge’: Beto lenda fwanisa batrakiti na bankeni. Musadi bilanga kemwangaka bankeni mingi na bilanga na yandi sambu yandi mezaba ve nki nkeni tamena mpi tayela. Longi 11:6 ketuba nde: “Kuna bima na nge na suka ti na nkokila mpi. Nge lenda zaba ve nki ta mena mbote, yai ya suka to yina ya nkokila to yonso zole ta mena mbote kiteso mosi.” Yo yina, bika beto ‘songa bantu ya nkaka mayele’ na nzila ya kisadilu yai ya mbote kibeni ya kuta kimbangi.—Bing. 15:7.
[Bangogo sambu na kubenda dikebi ya kele na lutiti 3]
Sambu batrakiti kele bisadilu ya mbote kibeni sambu na kuta kimbangi, yo tavandaka mikanda ya kukabula konso ngonda, yantika na Novemberi