Mitindu Tanu ya Kuzwa Muntu ya Kulonguka ti Yandi Biblia
1. Kana yo kele mpasi na kuzwa muntu ya kulonguka ti yandi Biblia na teritware na beto, inki beto fwete sala, mpi sambu na nki?
1 Keti nge kemonaka mpasi na kuzwa muntu ya kulonguka ti yandi Biblia? Landa kaka na kusosa. Yehowa kesakumunaka bantu yina keyambulaka ve na kusala luzolo na yandi. (Bag. 6:9) Awa na na nsi, beto kele na mitindu tanu yina tasadisa nge.
2. Inki mutindu beto lenda sadila metode ya mbala mosi sambu na kuyantika kulonguka Biblia ti muntu?
2 Metode ya Mbala Mosi: Bantu mingi kezabaka nde beto kekabulaka Nzozulu ya Nkengi mpi Réveillez-vous !; kansi, mbala yankaka bo kezabaka ve nde beto kelombaka bantu na kulonguka Biblia ti bo. Sambu na nki ve kumeka metode ya mbala mosi ntangu beto kesamuna nzo na nzo? Nge lenda lomba bantu ya nge kekwendaka kutala, bayina kemonisaka mpusa, kana bo tazola kulonguka Biblia. Kana bo buya, nge lenda fula kubikila bo mikanda mpi kuyedisa mpusa. Mpangi-bakala mosi vandaka kukwenda kutala bakala mosi ti nkento na yandi banda bamvula mingi sambu na kubikila bo baperiodike. Na nima ya kubikisila bo baperiodike ya mpa, yandi zolaka kukwenda; kansi yandi bakaka ngindu ya kuyula bo nde: “Keti beno tazola kulonguka Biblia?” Yandi yitukaka na kumona nde bo ndimaka. Bubu yai bo kele Bambangi ya Yehowa.
3. Keti beto fwete yindula nde bantu yonso yina kekwisaka na balukutakanu ke longukaka dezia Biblia? Tendula.
3 Bantu ya Kekwisaka na Balukutakanu: Kuyindula ve nde bantu yonso ya kesepelaka ti kyeleka, yina nge kemonaka na balukutakanu, kelongukaka dezia Biblia. Mpangi-bakala mosi ketuba nde: “Mu meyantikaka kulonguka Biblia ti bantu mingi kaka na kusolulaka ti bantu yina kekwisaka na balukutakanu.” Mpangi-nkento mosi bakaka lukanu ya kusolula ti nkento mosi ya nsoni-nsoni, yina vandaka ti bana ya bankento ya mebakaka mbotika na dibundu. Nkento yango vandaka kukwisa na balukutakanu tuka bamvula kiteso ya 15 mpi bantangu yonso yandi vandaka kukwisa na Nzo ya Kimfumu kaka ntangu lukutakanu ke yantika, mpi yandi vanda kuvutuka mbala mosi na nima ya lukutakanu. Yandi ndimaka kulonguka Biblia mpi nsuka-nsuka yandi kumaka mbangi ya Yehowa. Mpangi-nkento yina longukaka ti yandi ketuba nde: “Yo kesalaka munu mpasi na kumona nde mu vingilaka kiteso ya bamvula 15 sambu na kuyula yandi kana yandi tazola kulonguka Biblia!”
4. Inki mutindu nge lenda zwa muntu mosi ya kulonguka ti yandi Biblia na kati ya bantu yina longoki to bansamuni ya nkaka mezaba?
4 Bantu Yina Longoki Mezaba: Mpangi-nkento mosi ke salaka bikesa ya kusamuna ti bampangi ya nkaka ya kekwendaka kulonguka Biblia ti bantu. Na nsuka ya kulonguka, yandi kelombaka longi nswa ya kuyula longoki kana yandi mezaba bantu ya nkaka yina lenda ndima kulonguka Biblia. Ntangu nge kepesa muntu yina nge mekwenda kutala mukanda Biblia Kelongaka, nge lenda yula yandi nde: “Keti nge me zaba muntu ya nkaka yina tasepela mpi ti yo?” Mbala mingi, mambu yankaka kepesaka ve bapasudi-nzila mpi bansamuni nzila ya kulonguka Biblia ti bantu yina bo kekutanaka ti bo na teritware. Yo yina, zabisa bantu ya nkaka nde nge kele ti ntangu ya kulonguka Biblia ti bantu.
5. Sambu na nki beto lenda yula nkwelani yina kele Mbangi na dibundu na beto kana nkento to bakala na yandi tandima kulonguka Biblia?
5 Bankwelani Yina Kele Ve Bambangi: Keti dibundu na beno kele ti bansamuni yina kele ti bankwelani ya kele ve Bambangi? Bankwelani ya nkaka yina kele ve Bambangi kebuyaka kusolula ti bankwelani na bo yina kele Bambangi mambu ya metala Biblia; kansi bo lenda ndima kulonguka ti muntu ya nkaka yina kele ve na dibuta na bo. Mbala mingi yo kevandaka mbote na kusolula ntete ti bakala to nkento yina kele Mbangi sambu na kuzaba mutindu ya kuluta mbote ya kusolula ti nkwelani na yandi.
6. Sambu na nki kisambu kele mfunu ntangu beto kesosa kuzwa muntu ya kulonguka Biblia ti yandi?
6 Kisambu: Kumona ve mpamba ngolo ya kisambu. (Yak. 5:16) Yehowa kesila nde yandi tawa bisambu na beto kana yo kewakana ti luzolo na yandi. (1 Yoa. 5:14) Mpangi-bakala mosi yina vandaka ti bisalu mingi yantikaka kusamba sambu na kuzwa muntu mosi ya kulonguka Biblia ti yandi. Nkento na yandi vandaka kudiyula kana yandi ta vanda ti ntangu ya kutalaka longoki ya Biblia, mingi-mingi kana longoki yina kele na makambu mingi. Yo yina yandi zabisaka Yehowa basusi na yandi ntangu yandi vandaka kulomba nde bakala na yandi kuzwa longoki mosi ya Biblia. Yehowa pesaka mvutu na bisambu na bo kiteso ya bamposo zole na nima ntangu mupasudi-nzila mosi ya dibundu zwaka muntu mosi yina ndimaka kulonguka Biblia mpi pesaka yandi na mpangi-bakala yina. Nkento na yandi sonikaka nde: “Mu kezabisaka bansamuni yina lenda mona nde bo ta kuka ve kuzwa longoki ya Biblia nde: Tuba mambu na mutindu ya sikisiki na bisambu na nge, mpi landa na kusamba sambu na yo. Beto mebakaka kyese ya kuluta mingi kibeni.” Kana nge kekwamina, nge tazwa mpi muntu mosi ya kulonguka Biblia ti yandi; nge tabaka mpi kyese ya kusadisa muntu na ‘nzila yina ke nataka na luzingu.’—Mat. 7:13, 14.