Mutindu ya Kubakila Kimvuka na Beno ya Kisalu ya Bilanga Mambote
1. Inki mambote ya Kulonguka ya Mukanda ya Dibundu beto kebakaka tii bubu yai na nsadisa ya kimvuka ya kisalu ya bilanga?
1 Keti nge kevandaka ti nzala ya mambu ya nkaka yina vandaka kusalama na Kulonguka ya Mukanda ya Dibundu? Bimvuka vandaka ya fioti mpi mambu vandaka kusalama na mutindu mosi ya pete. Yo pesaka beto mabaku ya kukuma ti banduku mingi, mpi bangwisana yina vandaka kusadisa beto na kubikala ngolo na kimpeve. (Bing. 18:24) Nkengi ya kulonguka ya mukanda vandaka kuzaba luzingu na beto mbote-mbote mpi yandi lendaka kupesa konso muntu kikesa. (Bing. 27:23; 1 Pie. 5:2, 3) Bubu yai beto lenda baka mpi mambote yai na nsadisa ya kimvuka na beto ya kisalu ya bilanga.
2. Inki mutindu beto lenda sala kitambi ya ntete sambu na kusala kinduku, yina tapesa beto kikesa na kimpeve, ti bampangi ya kimvuka na beto ya kisalu ya bilanga?
2 Sala Kitambi ya Ntete: Mbala mingi ntalu ya bantu na bimvuka ya kisalu ya bilanga kevandaka kiteso mosi ti ntalu ya bantu yina vandaka na bimvuka ya kulonguka ya mukanda. Kana beto kesala “kumosi” ti bampangi yankaka na kisalu ya kusamuna, beto lenda sala kinduku ya ngolo. (Bafi. 1:27) Nge mesamunaka ti bampangi ikwa ya kimvuka na beno? Keti nge lenda ‘kudikangula’ na dyambu yai? (2 Bak. 6:13) Dyaka, bantangu ya nkaka beto lenda bingisa mpangi mosi ya kimvuka na beto na nkokila ya Lusambu ya Dibuta na beto to kudia kumosi ti beto. Na mabundu ya nkaka, bimvuka ya kisalu ya bilanga kesalaka bature ya kudisa mitubi ya nzenza. Kana yo mekuma ture ya kimvuka mosi, bo kevukanaka sambu na kudia mpi kupesana kikesa, yo vanda mutubi tavukana ti bo to ve.
3. Inki mabaku bankuluntu kesadilaka sambu na kusala kisalu ya kugungula na bimvuka na beto ya kisalu ya bilanga?
3 Ata ntangu yai dibundu fwete sala kaka balukutakanu zole na mposo mosi, yo ketendula ve nde bankuluntu tasalaka diaka mingi ve kisalu ya kugungula. Bo metulaka bankengi ya bimvuka na konso kimvuka sambu na kupesa konso nsamuni kikesa mpi formasio na kisalu ya kusamuna. Kana nkengi ya kimvuka na beno mebakaka ntete ve ngidika ya kusamuna ti nge, sambu na nki ve kulomba yandi na kusamuna ti nge? Dyaka, nkengi na kisalu kesamunaka ti bimvuka ya kuswaswana wikendi mosi na konso ngonda. Na mabundu ya fyoti, yina bimvuka ya kisalu ya bilanga kele mingi ve, yandi lenda baka bangidika sambu na kutala konso kimvuka mbala zole na mvula mosi. Keti nge keyidikaka manaka na nge sambu na kusamuna ntangu yandi kekwisaka na kimvuka na beno?
4. (a) Inki mutindu bo keyidikaka balukutakanu ya kisalu ya kusamuna? (b) Sambu na nki beto fwete tadila dibaku ya kupesa nzo na beto sambu bo sala balukutakanu ya kisalu ya bilanga?
4 Mbala mingi yo kevandaka mbote nde konso kimvuka kuvukana yo mosi sambu na kisalu ya bilanga na bawikendi. Kuvanda ti bisika mingi ya kukutana sambu na kisalu ya bilanga, ziku na ntangu mosi, lenda sadisa bansamuni na kukwenda na bisika ya lukutakanu ya kisalu ya bilanga to na teritware kukonda mpasi. Bansamuni lenda yilama nswalu mpi kukwenda na teritware kukonda kusukinina. Yo kesadisaka mpi nkengi ya kimvuka na kutudila bampangi yina kele na kimvuka na yandi dikebi ya ngolo. Kansi, bantangu ya nkaka yo lenda vanda mbote na kuvukisa bimvuka zole to bimvuka mingi. Kana dibundu ya mvimba mevukana sambu na kisalu ya kusamuna na Sabala ya ntete ya ngonda to na nima ya Kulonguka ya Nzozulu ya Nkengi, yo kevandaka mbote nde konso kimvuka kuvanda kisika mosi, mpi nkengi ya kimvuka kubaka mwa minuta fioti sambu na kuyidika kimvuka na yandi na ntwala nde bo sala kisambu ya nsuka ya lukutakanu ya kisalu ya bilanga.—Tala lupangu “Keti Nge Lenda Pesa Nzo na Nge?”
5. Ata beto kesalaka dyaka ve Kulonguka ya Mukanda ya Dibundu, na nki mambu beto lenda tula ntima?
5 Ata beto kesalaka dyaka ve Kulonguka ya Mukanda ya Dibundu, Yehowa kelanda na kupesa beto bima yonso yina beto kele na yo mfunu sambu na kusala luzolo na yandi. (Baeb. 13:20, 21) Beto kekondaka ata kima mosi ve na nsi ya lutaninu ya Yehowa. (Nk. 23:1) Beto kebakaka balusakumunu mingi na nzila ya kimvuka na beto ya kisalu ya bilanga. Kana beto kesala kitambi ya ntete mpi ‘kekuna bambuma mingi’ beto “ta katula mpi bambuma mingi.”—2 Bak. 9:6.
[Lupangu ya kele na lutiti 6]
Keti Nge Lenda Pesa Nzo na Nge?
Mabundu yankaka kevukisa bimvuka mingi kisika mosi sambu banzo ya kusala balukutakanu kevandaka mingi ve. Lukutakanu ya kisalu ya bilanga kele ngidika mosi na kati ya bangidika ya dibundu; yo yina kana balukutakanu ya mutindu yai kesalama na nzo na beto, yo kele dibaku ya nene. Keti nge lenda pesa nzo na nge? Kubuya ve kupesa nzo na nge sambu yo kele kitoko mingi ve. Bankuluntu tatadila kisika yina nzo na nge kele, mpi mambu ya nkaka ya bo vandaka kutadila na ntangu ya kupona bisika ya kusala kulonguka ya mukanda. Kana nge tazola kupesa nzo na nge, zabisa nkengi ya kimvuka na beno.