Balukutakanu Sambu na Kisalu ya Bilanga

1. Sambu na nki beto kezolaka kukwenda na kisalu ya bilanga na mutindu mosi ya kuyidika mbote?

¹ Yezu kupesaka mbandu ya kusala kisalu ya kusamuna Kimfumu na mutindu mosi ya kuyidika mbote mpi ya mefwana. Mutindu mosi bubu yai, bantu yina ketwadisaka kampanye yai ya kusamuna Kimfumu na ntoto ya mvimba kezolaka mpenza kumona bantu kesala kisalu yai na mutindu yina mosi. Na kuwakana ti dyambu yai, mabundu ya ntoto ya mvimba kesadilaka balukutakanu sambu na kisalu ya bilanga bonso mutindu mosi ya kuyidika bibuka ya bansamuni ya Kimfumu sambu na kisalu ya bilanga.​—⁠Mat. 24:​45-47; 25:21; Luka 10:​1-7.

2. Inki beto kevingilaka na balukutakanu sambu na kisalu ya bilanga?

² Ngidika Mosi ya Mbote: Lukanu ya balukutakanu sambu na kisalu ya bilanga kele ya kupesa kikesa, bantuma ya mefwana, mpi lutwadisu sambu na bantu yina kezola kukwenda na kisalu ya bilanga. Beno lenda tubila mukapu ya lumbu na bunkufi kana yo kewakana mpenza ti kisalu ya bilanga. Bantangu yankaka, beno lenda tadila bangibusa ya mekatuka na Kisalu na Beto ya Kimfumu, na mukanda Comment raisonner, to mbala yankaka na mukanda Nzo-Nkanda ya Kisalu sambu na kusadisa bantu yonso na kudibongisa sambu na kisalu ya kilumbu yina. Beno lenda sala nsonga mosi ya nkufi ya ketadila mukanda yina beno kele na kukabula. Na ntwala ya kisambu ya nsuka, bantu yonso fwete zaba banani bo tasala ti bo kumosi na kisalu ya bilanga mpi kisika teritware yina bo tasala kele. Ntangu fyoti na nima ya lukutakanu yai ya taluta ve minuta 15, bantu yonso fwete vanda na nzila sambu na kukwenda na teritware.

3. Banani kele na mukumba ya kubaka bangidika ya balukutakanu sambu na kisalu ya bilanga?

³ Inki Mutindu Bo Keyidikaka Yo? Nkengi na kisalu muntu kele ti mukumba ya kubaka bangidika ya balukutakanu sambu na kisalu ya bilanga. Bankengi ya bimvuka, to bilandi na bo kele na mukumba ya kusamuna kumosi ti bantu ya bimvuka na bo na bawikendi. Bankengi to bansadi ya kisalu yankaka lenda kuka kusamuna ti bimvuka na bo na bilumbu yankaka ya mposo. Bankengi ya bimvuka kesalaka mpenza kumosi ti nkengi na kisalu sambu bo vanda ti bateritware ya kufwana yina bantu ya bimvuka na bo tasadila sambu na kusamuna nzo na nzo na bawikendi. Banda na Kintete tii na Kitanu, nkengi na kisalu tatwadisa bangidika sambu na bampangi yina tatwadisa bimvuka sambu na kisalu ya bilanga.

4-6. (a) Inki lukanu balukutakanu sambu na kisalu ya bilanga kelungisaka na yina metala teritware ya dibundu? (b) Inki beto lenda tadila sambu na kuzaba mutindu ya kuyidika balukutakanu sambu na kisalu ya bilanga?

⁴ Wapi mpi Nki Ntangu Balukutakanu Yai Fwete Salama? Na kisika ya kuvukisa dibundu ya mvimba na kisika mosi, yo tavanda mbote nde balukutakanu yai kusalama na bisika ya mefwana, mbala mingi na banzo ya bampangi, na bisika ya kuswaswana na teritware na beno ti lukanu ya kusala mbote-mbote teritware ya dibundu. Beno lenda sadila mpi Nzo ya Kimfumu sambu na lukanu yai. Mabundu mingi kesadilaka Nzo ya Kimfumu sambu na kusala lukutakanu ya nkufi sambu na kisalu ya bilanga na nima ya diskure ya bantu yonso mpi Kulonguka ya Nzozulu ya Nkengi ya Lumingu. Beno fwete sala ngolo sambu bampangi kusala ve banzyetelo ya nda na ntwala ya kukuma na teritware. Yo yina, beno lenda tadila bangidika yai mbala na mbala sambu na kuzikisa nde bisika ya balukutakanu sambu na kisalu ya bilanga kele kaka bisika ya mefwana sambu na kusala teritware mbote-mbote mpi kumanisa yo.

⁵ Na kutadila bunene ya teritware, beno tapona ntangu ya mefwana mpenza sambu na kusala balukutakanu yai mpi bambala yina yo fwete twadisama na mposo ya mvimba. Bangyufula yai ya kelanda lenda sadisa sambu na kuzaba kisika mpi ntangu ya mefwana ya kusala balukutakanu sambu kisalu ya bilanga.

⁶ Inki teritware kelomba kutudila yo dikebi mingi? Inki kele ntangu ya kuluta mbote ya kusala kisalu ya nzo na nzo? Keti beno fwete pona ntangu mosi ya nkokila sambu na kusamuna nzo na nzo to kusala bamvutukila ya mpa? Beno fwete tula bangidika yonso ya metala kisalu ya bilanga na tablo ya bansangu ya dibundu. Bansamuni yonso ya Kimfumu kezolaka kusala mbote-mbote teritware yina bo mepesaka bo na mpila nde beto mpi lenda tuba bonso ntumwa Polo nde: “Mono me manisa kisalu na mono na ndambu yai kwaku.”​—⁠Roma 15:⁠23.

7. Muntu yina bo mepona sambu na kutwadisa kimvuka ya kisalu ya bilanga kele ti nki mukumba?

⁷ Kutwadisa Balukutakanu Sambu na Kisalu ya Bilanga: Muntu yina bo mepona sambu na kutwadisa lukutakanu yai kemonisaka luzitu ya mudindu sambu na ngidika yai ya teokrasi na kudibongisaka mbote. Balukutakanu yai fwete yantika na ntangu ya mbote mpi yo fwete longa mpi kuvanda nkufi, mpi yo fwete baka minuta na kati ya 10 mpi 15. Ntwadisi fwete vanda ti bateritware yina bo tasala na ntwala nde lukutakanu kuyantika. Ata yo kele ve mfunu na kukinga bantu yina takwisa na nsukinina na nima ya lukutakanu sambu na kisalu ya bilanga, yo lenda vanda mbote na kubika nsangu ya kemonisa kisika yina kimvuka tasamuna. Bantu yonso fwete vanda na nzila ya kukwenda na teritware ya bo mepesa bo ntangu fyoti na nima ya kumanisa lukutakanu. Ntembe kele ve nde lukutakanu sambu na kisalu ya bilanga yina bo meyidika mbote mpi yina kelonga tapesa bantu yonso lutwadisu ya mefwana sambu na kulungisa kisalu na bo kilumbu yina.​—⁠Bing. 11:⁠14.

8. Na nki mitindu bantu yina kevukana na balukutakanu sambu na kisalu ya bilanga lenda sala na kimvuka na bampangi yina ketwadisa?

⁸ Kukwenda na Balukutakanu Sambu na Kisalu ya Bilanga: Yo kele mfunu mingi na kusala na kimvuka. (Baeb. 13:17) Kana mpila kele, muntu yina kekabula bimvuka tasadisa konso mpangi yina kele ti mfunu ya muntu ya kusala ti yandi. Yo kele mbote nde bansamuni yina kele ti eksperiansi kuvanda na lukutakanu yai na mpila nde bo sadisa bansamuni ya mpa mpi yina kele ti eksperiansi fyoti. Bantu yina kele na mfunu ya kusala ti bantu ya kuswaswana, lenda sala mambu mingi ya mbote. (Bing. 27:17; Roma 15:​1, 2) Bantu yonso fwete sala ngolo sambu na kukwisa na ntangu ya mbote. Kuzitisa ngidika yai ya teokrasi mpi kuzitisa bampangi na beto Bakristu tapusa beto na kusala bansoba yonso ya kele mfunu na dyambu yai.​—⁠2 Kor. 6:​3, 4; Filp. 2:⁠4.

9. Na nki mitindu ya mfunu bapasudi-nzila lenda pesa lusadisu na ngidika yai?

⁹ Lusadisu ya Bapasudi-Nzila: Lusadisu ya bapasudi-nzila na balukutakanu sambu na kisalu ya bilanga kele mfunu mpi kepesaka bantu yonso kikesa. Beto mezaba nde bapasudi-nzila kevandaka na mikumba mingi. Katula kulonguka Biblia ti bantu mpi kusala bamvutukila ya mpa, na kati ya manaka na bo ya konso kilumbu beto lenda tanga kulungisa mikumba na bo ya dibuta mpi kusala kisalu na bo ya kinsuni. Yo yina, bapasudi-nzila fwete yindula ve nde bo fwete kwenda na balukutakanu yonso sambu na kisalu ya bilanga yina dibundu meyidika, mingimingi kana yo kesalamaka konso kilumbu. Kansi, yo kemonana nde bapasudi-nzila takuka kukwenda na mwa balukutakanu sambu na kisalu ya bilanga konso mposo. Na kiteso mosi buna, balukutakanu sambu na kisalu ya bilanga kesadisaka na kulonga bantu ya dibundu, ebuna kimpeve mpi eksperiansi ya bapasudi-nzila lenda sadisa mpenza bankaka. Sambu bo kevukanaka mbala na mbala na kisalu ya bilanga, yo mesadisaka bo na kuzwa eksperiansi mingi na kisalu ya kusamuna. Bo lenda kabula eksperiansi yai ti bankaka. Mutindu bo kesamunaka mpi kevukanaka na kikesa yonso na balukutakanu sambu na kisalu ya bilanga kesalaka nde bo vanda mbandu ya mbote ya bankaka lenda landa. Mpi bampangi kesepelaka mingi na mutindu bapasudi-nzila kevukanaka na balukutakanu yai.

10. Sambu na nki yo mefwana nde bansamuni yonso ya Kimfumu kupesa maboko na ntima ya mvimba na ngidika yai?

¹⁰ Mutindu yo salamaka na Yezu mpi balongoki na yandi, kitini ya nene ya kisalu na beto ya kusamuna Kimfumu kesalamaka na kuta kimbangi nzo na nzo. Lukanu ya balukutakanu sambu na kisalu ya bilanga kele ya kupesana kikesa mpi kusadisa na kusala mbote-mbote kisalu yai. Bansamuni yonso ya nsangu ya mbote fwete pesa maboko na bangidika ya teokrasi ya mutindu yai na kiteso yina mefwana. (Bis. 5:42; 20:20) Bika beto yonso kupesa maboko na ntima ya mvimba na ngidika yai. Kana beto sala mutindu yai, beto lenda tula ntima nde Yehowa tasakumuna beto mingi mpi beto lenda sepedisa ntima ya Ntwadisi na beto, Yezu Kristu, na ntangu beto kesamuna nsangu ya mbote ya Kimfumu.​—⁠Mat. 25:​34-40; 28:​19, 20.