Sadila Ntangu na Nge Mbote na Kisalu ya Kusamuna

¹ Ya kyeleka, beto kele na mambu mingi ya kulungisa na kisalu na beto ya kusamuna, kansi ntangu ya mebikala kele fyoti. (Yoa. 4:35; 1 Kor. 7:29) Kana beto mekudibongisa mbote mpi meyidika mambu na ntwala, beto lenda sadila mbote ntangu yina beto kanaka kusala na kisalu ya kusamuna.

² Kudibongisa: Na ntwala ya kukwenda na lukutakanu sambu na kisalu ya bilanga, zikisa kana nge kele ti mikanda yina ya nge tavanda na yo mfunu mpi bongisa bangogo na nge ya kukotila na masolo. Kana lukutakanu memana mpi bo me sala kisambu ya nsuka, kwenda mbala mosi na kisalu ya bilanga. Kusala mutindu yai tasadisa nge ti bampangi yina tasala ti nge na kusala mingi na kisalu ya kusamuna na kuwakana ti ntangu yina beno kanaka.

³ Kana bo pesaka nge mukumba ya kutwadisa lukutakanu sambu na kisalu ya bilanga, yantika mbala mosi kukonda kusukinina. Sala nde yo vanda nkufi, kiteso ya minuta 10 to 15. Na ntwala ya kulomba bampangi na kukwenda, zikisa nde konso muntu kezaba kisika bo kekwenda kusamuna mpi ti nani yandi tasamuna.

⁴ Ntangu Nge Ke na Kisalu ya Kusamuna: Kana lukutakanu sambu na kisalu ya bilanga memana, kulutisa ve ntangu mpamba-mpamba. Yantika kukwenda mbala mosi na teritware. Na bisika yankaka, bampangi kebakaka transpore sambu na kukwenda kusamuna na kimvuka. Kana nge kele na bisika ya mutindu yina, mpi nge kemona nde nge tamanisa na ntwala, nge lenda kudibongisa na kubaka transpore yankaka na mpila nde bampangi yina nge kwendaka ti bo kuzenga ve kisalu na bo sambu na nge. Kana beno kesala na kimvuka, tadila mawi ya bampangi yankaka yina mbala yankaka kekinga nde nge manisa kusolula ti muntu. Yo lenda lomba nde nge yambula kusolula ti muntu mosi ya ketula bantembe mingi, to nge kuyidika na kuvutukila muntu yina memonisa mpusa.​—⁠Mat. 10:⁠11.

⁵ Ntangu nge kesala bamvutukila, nge lenda tala ntete bantu yina kele penepene na ntwala ya kukwenda kisika yankaka sambu nge tambula ve mpamba-mpamba. Nge lenda mpi kubinga bantu yankaka na telefone sambu na kuzaba kana bo tavanda. (Bing. 21:⁠5) Kana nge kekana kulonguka ntangu ya nda ti muntu, beno lenda sala bangidika na mpila nde bampangi yankaka yina nge basikaka ti bo na kimvuka kusamuna na nzyunga to kusala bamvutukila yankaka.

⁶ Beto kezinga na ntangu ya kisalu ya ngolo ya kukatula bambuma ya kimpeve. (Mat. 9:​37, 38) Kubika fyoti kisalu kusuka. Yo yina, mpusa na beto fwete vanda ya kusadila ntangu na beto mbote na kisalu ya kusamuna.