Mutindu Kulonguka ya Mukanda Kesadisaka Beto
1. Inki mutindu balukutakanu na beto tanu ya konso mposo kesadisaka beto?
1 Konso lukutakanu na kati ya balukutakanu na beto tanu ya konso mposo meswaswana na mutindu bo ketwadisaka yo mpi na lukanu na yo. Kansi, balukutakanu yonso kele mfunu sambu yo kesadisaka beto na kutalana sambu na ‘kupesana kikesa ya kuzola mpi ya kusala mambu ya mbote.’ (Baeb. 10:24, 25) Inki kele mwa mambote ya beto lenda baka kaka na Kulonguka ya Mukanda ya Dibundu?
2. Inki mambote beto kebakaka sambu bantu kevandaka ve mingi na kulonguka ya mukanda?
2 Yo Kesadisaka na Kuyela na Kimpeve: Mbala mingi, ntalu ya bantu yina kevandaka na kulonguka ya mukanda kevandaka fyoti kana beto fwanisa yo ti ntalu ya bantu yina kevukanaka na balukutakanu yankaka ya dibundu. Dyambu yai kesalaka nde yo vanda pete na kusala kinduku yina lenda sadisa beto na kimpeve. (Bing. 18:24) Keti nge mesalaka kikesa ya kuzaba bantu yonso ya kimvuka na beno ya kulonguka ya mukanda, ziku kulomba konso muntu na kusamuna ti nge? Kulonguka ya mukanda kesadisaka mpi nkengi na kulonguka ya mukanda na kuzaba mbote luzingu ya konso muntu yina kele na kimvuka na yandi mpi na kupesa yandi lusadisu.—Bing. 27:23.
3. Inki mutindu kulonguka ya mukanda kesyamisaka bantu na kupesa bakomantere mpi nki mutindu yo kesadisaka balongoki ya Biblia na kuvukana?
3 Keti nge mebingaka dezia balongoki na nge ya Biblia na kuvukana na kulonguka ya mukanda ti nge? Bantu ya kesepelaka na kyeleka kansi ya kezolaka ve kuvukana na balukutakanu ya nene lenda sepela kuvukana na lukutakanu ya fyoti mpenza, mingimingi na nzo ya mpangi mosi. Kinduku ya ngolo ya kevandaka kuna kesalaka nde bana ya fyoti ti bantu yina meyantika kuvukana ti beto ntama mingi ve kupesa bakomantere kukonda mpasi. Mpi sambu kimvuka yango kevandaka fyoti kibeni, beto kevandaka ti mabaku mingi ya kupesa bakomantere mpi ya kukumisa Yehowa.—Nk. 111:1.
4. Kulonguka ya mukanda lenda sadisa na nki mitindu?
4 Mbala mingi, kulonguka ya mukanda kesalamaka na bisika mingi ya mefwana mpi ya kuswaswana na kati ya teritware ya dibundu. Ata mpila kevandaka ve ya kutinda konso muntu na kisika yina kele mpenza penepene ti nzo na yandi, kuvukana na kimvuka ya kulonguka ya mukanda yina bo metinda beto lenda lomba kusala nzyetolo ya nkufi kana beto fwanisa yo ti nzyetolo ya beto kesalaka sambu na kukwenda na balukutakanu yankaka ya dibundu. Kisika kulonguka ya mukanda kesalamaka lenda vanda mpi kisika ya mbote ya kusala lukutakanu sambu na kisalu ya bilanga.
5. Inki mutindu nkengi na kulonguka ya mukanda na beto lenda sadisa beto na kisalu ya kusamuna?
5 Lusadisu Sambu na Kisalu ya Kusamuna: Nkengi na kulonguka ya mukanda ketulaka dikebi na kusadisa konso muntu na kuvukana na kisalu ya kusamuna mbala na mbala, na kusala yo na mutindu ya kebuta bambuma mpi ya kepesa kyese. Yo yina, yandi kesalaka ngolo na kusamuna ti konso muntu ya kimvuka na bo, mpi na kusadisa yandi na bitini ya kuswaswana ya kisalu ya kusamuna. Kana nge kemona nde kitini mosi ya kisalu ya kusamuna kele mpasi, mu mbandu kusala bamvutukilu ya mpa, zabisa nkengi na kulonguka ya mukanda na beno. Ziku yandi lenda baka bangidika sambu nge samuna ti nsamuni mosi ya kimvuka na beno ya kele ti eksperiansi. Mayele na nge ya kulonga na kulonguka ya Biblia tatoma kana nge ketula dikebi ya ngolo na bametode ya mbote ya kulongila yina nkengi na kulonguka ya mukanda kesadilaka ntangu yandi ketwadisaka kulonguka ya mukanda.—1 Kor. 4:17.
6. Sambu na nki beto fwete sosa kubaka mpenza mambote na kulonguka ya mukanda?
6 Kulonguka ya Mukanda ya Dibundu kele lusakumunu ya nene kibeni! Ngidika yai ya zola ya Yehowa mebakaka kesadisaka beto na kubikala ngolo na kimpeve na bantangu yai ya mpasi ya beto kezinga.—Nk. 26:12.