Kuditudila Ve Bandilu—Nunga Mawi ya Kudimona Nde Nge Me Fwana Ve
1. Sambu na nki bansamuni yankaka ke kukaka ve kulomba bantu na kulonguka Biblia ti bo?
1 Keti nge ke vandaka na ketiketi ya kulomba muntu na kulonguka Biblia ti nge, sambu nge ke monaka nde nge ta kuka ve kutwadisa mbote kulonguka ya Biblia? Bantangu yankaka bansadi ya Nzambi ya kwikama ya ntangu ya ntama, mu mbandu Moize mpi Yeremia, kudiwaka nde bo me fwana ve na kulungisa mukumba na bo. (Kub. 3:10, 11; 4:10; Yer. 1:4-6) Bantu mingi ke kudiwaka mpi mutindu yina. Inki mutindu beto lenda nunga mawi ya mutindu yai?
2. Sambu na nki beto fwete suka ve kaka na kusamuna nzo na nzo mpi kubikila bampangi ya nkaka kisalu ya kulonguka Biblia ti bantu?
2 Beto fwete yibuka nde Yehowa ke lombaka beto ve ata fioti na kusala mambu yina beto ta kuka ve. (Nk. 103:14) Ntuma yina Nzambi me pesaka beto ya ‘kukumisa bantu balongoki,’ mpi ya ‘kulonga bo’ kele mukumba mosi ya beto lenda lungisa. (Mat. 28:19, 20) Yo kele ve mukumba yina Yehowa me pesaka kaka bantu yina kele ti eksperiansi mingi to bayina kele ti makuki mingi na kati na beto. (1 Bak. 1:26, 27) Yo yina, beto fwete suka ve kaka na kusamuna nzo na nzo mpi kubikila bampangi yankaka kisalu ya kulonguka Biblia ti bantu.
3. Inki mutindu Yehowa ke pesaka beto makuki ya kusala kisalu ya kulonguka Biblia ti bantu?
3 Yehowa Ke Pesaka Beto Makuki: Yehowa muntu ke pesaka beto makuki ya kukumisa bantu balongoki. (2 Bak. 3:5) Na nsadisa ya organizasio na yandi, Yehowa ke longaka beto bakieleka ya Biblia yina nkutu bantu ya me salaka banzo-nkanda ya nene na insi-ntoto yai ke zabaka ve. (1 Bak. 2:7, 8) Yehowa me bumbaka bametode ya kulongila yina Longi ya Nene, Yezu, vandaka kusadila sambu beto landa yo; yandi ke pesaka beto mpi formasio mbala na mbala na nzila ya dibundu. Diaka, Yehowa me pesaka beto mambu ya kulonguka yina beto kele na yo mfunu sambu na kulonga bantu Biblia. Yandi me pesaka beto bisadilu, mumbandu Biblia Kelongaka, yina ke longaka kieleka na mutindu mosi ya mbote mpi yina kele mpasi ve na kubakisa. Kulonguka Biblia ti muntu lenda vanda mpasi mingi ve mutindu beto ke yindulaka yo.
4. Sambu na nki beto fwete tula ntima nde Yehowa ta sadisa beto?
4 Yehowa sadisaka Moize mpi Yeremia na kulungisa mikumba na bo. (Kub. 4:11, 12; Yer. 1:7, 8) Beto lenda lomba Yehowa mpi na kusadisa beto. Nkutu, ntangu beto ke longukaka Biblia ti bantu, beto ke longaka bo kieleka na yina me tala Yehowa; yai kele mambu yina ke pesaka yandi kiese. (1 Yoa. 3:22) Yo yina, baka lukanu ya kusala kisalu ya kulonguka Biblia ti bantu; yo kele kitini mosi ya kisalu ya kusamuna yina ke pesaka kiese mingi mpi balusakumunu.