Nge Lenda Vanda Longi!
1. Inki dibaku kele na ntwala ya konso nsamuni ya Kimfumu?
1 Kitini mosi ya kisalu ya kusamuna ya kepesaka kyese mingi kele kulonga muntu kyeleka. Kumona yandi kendima nsangu ya Kimfumu mpi kusadisa yandi na kupusana penepene ti Mfumu ya luyalanganu kele kima mosi ya mfunu. (Yak. 4:8) Kulonga muntu yina kele na nzala ya kyeleka mpi kumona yandi keyantika kusala bansoba ya nene na kimuntu, na mabanza, mpi na bikalulu fwete vanda lukanu ya konso nsamuni ya Kimfumu.—Mat. 28:19, 20.
2. Sambu na nki bantu yankaka lenda wa boma na kulonguka Biblia ti muntu, mpi inki tasadisa bo na kununga dyambu yai?
2 Tula Ntima na Yehowa: Na ntangu ya ntama, bansadi ya kwikama kumonaka nde bo mefwana ve na kulungisa mukumba na bo. Kansi, kutula ntima na Yehowa Nzambi kusadisaka Moize, Yeremia, Amosi mpi bantu yankaka ya kukonda mfunu na kununga ketiketi na bo mpi kulanda na kusala kisalu ya mfunu. (Kub. 4:10-12; Yer. 1:6, 7; Am. 7:14, 15) Ntumwa Polo mpi ‘bakaka kikesa,’ to, kuyantikaka kutuba pwelele mpi na masonga yonso. Inki mutindu? Yandi monisaka nde ‘Nzambi muntu pesaka yandi kikesa.’ (1 Tes. 2:2) Ya kyeleka, beto yonso lenda tula ntima nde Yehowa tapesa beto lusadisu, mayele, mpi ngolo yina beto kele na yo mfunu sambu na kulonguka Biblia ti bantu yina tayela.—Yez. 41:10; 1 Kor. 1:26, 27; 1 Pie. 4:11.
3, 4. Inki malongi bo meyidikaka sambu na kusadisa beto na kulonga Ndinga ya Nzambi?
3 Ndima na Kulonguka: Longi na beto ya Nene, Yehowa Nzambi, kelongaka beto mbala na mbala na nzila ya manaka ya malongi ya kimpeve na mpila nde beto kuma balongi ya meyilama mbote-mbote. (Yez. 54:13; 2 Tim. 3:16, 17) Ndima malongi yina na kusadilaka mbote mabaku yonso sambu na kuyedisa mutindu na nge ya kubakisa Masonuku mpi kutomisa mutindu nge kelongaka bakyeleka ya Biblia. Ata yai kele lukanu ya ntete ya Nzo-Nkanda ya Kisalu ya Teokrasi mpi ya Lukutakanu ya Kisalu, balukutakanu yonso ya dibundu kelongaka beto na kulonga na nsadisa ya Ndinga ya Nzambi.
4 Sala ngolo na kulonguka mitindu ya petepete ya kulonga bakyeleka ya mudindu ya kimpeve. Mukanda Nzo-Nkanda ya Kisalu, lutiti 227, ketendula nde: “Nge fwete bakisa mbote dilongi na nge kana nge kezola kusadisa bantu yankaka na kubakisa yo.” Kupesa bamvutu na balukutakanu kesadisaka beto na kukanga bangindu ya mfunu na mabanza sambu beto sadila yo na bilumbu kekwisa. Kudibongisa mbote, ebuna ntima ya nge ketulaka na mayele na nge ya kulongila tayela.
5. Inki malongi yankaka beto kebakaka na dibundu sambu na kusadisa beto na kukuma balongi ya mbote?
5 Katuka na luyantiku, ntembe kele ve nde baministre ya Bakristu vandaka kulonguka na bankaka ntangu bo vandaka kusala kisalu ya kukumisa bantu balongoki. (Luka 10:1) Kana mpila kele, basika ti bansamuni ya kuyela na kimpeve, bapasudi-nzila, bankuluntu, mpi bankengi-ntambudi na kisalu ya kulonguka Biblia ti bantu. Tala mutindu bo kesadilaka bambandu ya petepete mpi bisadilu yankaka ya kulongila yina kele na mikanda na beto ya kulongukila sambu na kutendula bakyeleka ya Masonuku. Lomba bo na kupesa nge bangindu yina lenda sadisa nge na kukuma longi ya mbote. (Bing. 1:5; 27:17) Zola mingi malongi yai yonso bonso malongi ya kekatuka na Nzambi.—2 Kor. 3:5.
6. Inki kele mpenza mfunu sambu na kukuma longi ya Ndinga ya Nzambi?
6 Tula ntima na Yehowa, mpi baka mambote na malongi yina yandi kepesaka. Sala kisambu sambu na kuyela na nge ya kimpeve. (Nk. 25:4, 5) Nge mpi lenda baka kyese ya kusadisa muntu na kukuma, bonso nge, longi ya Ndinga ya Nzambi!