Yehowa Kelongaka Beto Sambu na Kusala Kisalu Yai

1. Ntangu Yehowa kepesaka bantu kisalu mosi buna, inki yandi kesalaka dyaka?

¹ Ntangu Yehowa kepesaka bantu kisalu mosi buna, yandi kepesaka bo mpi lusadisu yina bo ke na yo mfunu sambu na kusala yo. Mu mbandu, ntangu Yehowa zabisaka Noa na kutunga maswa, kima mosi ya Noa mesalaka ntete ve, yandi zabisaka yandi mpi mutindu ya kusala yo. (Kuy. 6:14-16) Ntangu Nzambi pesaka Moize, yina vandaka ngungudi mosi ya kudikulumusa, kisalu ya kukwenda kukutana ti bambuta ya Izraele mpi Farao, Yehowa ndimisaka yandi nde: “Mono muntu ta sadisa nge na kutuba, mono muntu ta songa nge mambu ya nge ta tuba.” (Kub. 4:12) Na yina metala kisalu na beto ya kusamuna nsangu ya mbote, Yehowa melongaka beto mpi mutindu ya kusala yo. Yandi kelongaka beto na nzila ya Nzo-Nkanda ya Kisalu ya Teokrasi mpi ya Lukutakanu ya Kisalu. Inki mutindu beto lenda baka mambote ya malongi yai?

2. Inki mutindu beto lenda baka mambote na Nzo-Nkanda ya Kisalu ya Teokrasi?

² Nzo-Nkanda ya Kisalu ya Teokrasi: Tanga mpi longuka mambu yonso ya kele na manaka na ntwala ya kukwenda na konso lukutakanu. Na nima, ntangu nge tamona mutindu bana nzo-nkanda kesadila mambu yai na masolo na bo, nge tabakisa dyaka mbote mutindu ya kulonga. (Bing. 27:17) Nata mukanda na nge Nzo-Nkanda ya Kisalu na lukutakanu mpi sadila yo bonso mukanda ya kubakila banoti. Ntangu nkengi na nzo-nkanda kesadila yo na nima ya disolo ya konso mwana ya nzo-nkanda, tenda bangindu ya mfunu yina nge fwete sadila mpi sonika mambu ya mfunu na bisika yina bo mebika ya mpamba na lweka ya lutiti. Kansi, mutindu ya kuluta mbote ya kubaka mambote na nzo-nkanda yai kele kusala badevware. Keti nge mesonikisaka dezia zina? Ntangu bo mepesa nge devware, yidika yo mbote mpi sadila bandongisila ya nge mebaka. Na kisalu ya kusamuna, sadila mambu ya nge longukaka.

3. Inki tasadisa beto na kubaka mambote ya Lukutakanu ya Kisalu?

³ Lukutakanu ya Kisalu: Beto tayibuka mbote mabanza ya bo mepesa na lukutakanu yai kaka kana beto tanga mambu yonso na ntwala mpi kudibongisa na kupesa bakomantere. Kana beto yidika bakomantere ya nkufi, beto takuka kupesa bakomantere yango. Tula mpenza dikebi na bansonga, mpi na konso dibanza yina nge kemona nde yo tasadisa nge na kusala kisalu na nge ya kusamuna mbote kibeni. Kana Kisalu na Beto ya Kimfumu kele ti masolo yina lenda sadisa nge na kisalu ya kusamuna, bumba yo.

4. Sambu na nki beto fwete sadila mbote malongi yina Yehowa kepesaka?

⁴ Bonso kisalu yina bo pesaka Noa ti Moize, kisalu na beto ya kusamuna nsangu ya mbote na nsi-ntoto ya mvimba kele kisalu mosi ya mpasi. (Mat. 24:14) Beto lenda sala yo mbote kana beto tula ntima na Yehowa, Longi na beto ya Nene, mpi kusadila mbote malongi yina yandi kepesaka.—Yez. 30:20.