Nzo-Nkanda ya Kisalu ya Teokrasi ya 2015 Ta Sadisa Beto na Kutomisa Mutindu na Beto ya Kulonga

¹ Muyimbi-bankunga Davidi sonikaka nde: “Mfumu Nzambi, mbote nge ndima mambu ya mono ke tubaka ti ya mono ke yindulaka; nge kele dikunzi na mono, kisika ya mono ke tininaka, nge kele Ngulusi na mono.” (Nk. 19:15) Beto mpi ke zolaka nde bangogo na beto kupesa Yehowa lukumu sambu beto ke bakaka na mbalu mukumba na beto ya kulonga kieleka na dibundu mpi ya kusala kisalu ya kusamuna. Nzo-Nkanda ya Kisalu ya Teokrasi kele mwaye mosi ya Yehowa ke sadilaka sambu na kulonga beto mutindu ya kusala kisalu ya kusamuna. Nzo-nkanda yai ke salamaka konso mposo na mabundu kuluta 111 000 na ntoto ya mvimba. Yo me sadisaka bampangi ya babakala mpi ya bankento na ntoto ya mvimba na kukuma bansamuni ya mbote ya nsangu ya mbote mpi ya me fwana sambu na kulonga na mayele, na kikesa mpi na mutindu ya ke ndimisa.​—Bis. 19:8; Bakol. 4:6.

² Masolo ya manaka ya nzo-nkanda ya 2015 ta katuka na mikanda yai: “Bangogo ya Luyantiku Sambu na Kutubila Ndinga ya Nzambi”, “Nzozulu ya Nkengi,” mpi Étude perspicace des Écritures. Diaka, bo me soba minuta ya bantendula ya mfunu ya Biblia mpi ya Disolo No 1. Baparagrafe ya ke landa ke monisa bansoba mpi bantuma ya ke tadila mutindu masolo ya nzo-nkanda ta salamaka.

³ Bantendula ya Mfunu ya Biblia: Bampangi-babakala ya bo ta pesa disolo yai ta sala minuta zole sambu na kutubila ngindu mosi ya mfumu ya Masonuku ya me katuka na lutangu ya Biblia ya mposo yina. Kudibongisa mbote ta sadisa nge na kutubila dilongi mosi ya mfunu na dibundu na ntangu ya bo me pesa nge. Na nima, dibundu ta vanda ti minuta sambanu sambu na kupesa bakomantere ya basegonde 30 to na nsi, ya bangindu ya mfunu yina bo sengumunaka na lutangu ya Biblia ya mposo yina. Yo ke lomba kudibongisa mpi kudiyala sambu na kusala komantere ya basegonde 30. Kusala mutindu yai ta sadisa beto na kubaka formasio ya mbote. Yo ta pesa mpi bantu ya nkaka ntangu ya kupesa bakomantere ya mambu yina bo sengumunaka ntangu bo salaka bansosa.

⁴ Disolo No. 1: Bo me kulumusa minuta ya lutangu ya Biblia na minuta tatu to na nsi, mpi bo me fiotuna baverse ya kutanga. Bampangi yina ya bo me pesa mukumba yai fwete tanga yo mbala na mbala na ndinga ya ngolo. Bo fwete tanga mbote mpi kukonda kifu sambu bantu kubakisa mambu ya bo ke tanga. Bansadi ya Yehowa yonso fwete sala ngolo na kutanga mbote sambu kutanga kele mfunu mingi na lusambu na beto. Beto ke vandaka na kiese sambu bana na beto mingi ke tangaka mbote! Beto ke sikisa bibuti sambu na bikesa ya zola yina bo ke salaka sambu na kusadisa bana na bo.

⁵ Disolo No. 2: Mpangi-nkento muntu ta sala disolo yai na minuta tanu. Yandi fwete sadila ntu-diambu yina bo me pesa yandi. Kana bo me pesa yandi disolo ya me katuka na Bangogo ya Luyantiku Sambu na Kutubila Ndinga ya Nzambi, yandi ta monisa mpila ya kusadila yo na kitini mosi ya kisalu ya kusamuna ya me fwana na teritware na beno. Kana bo me pesa yandi disolo ya ke tadila muntu mosi yina Biblia ke tubila, ya kele na Étude perspicace des Écritures, mwana ya nzo-nkanda fwete sala ntu-diambu yina bo me pesa yandi. Yandi fwete pona baverse ya me fwana yina yandi ta sadila, mpi kumonisa malongi yina beto lenda baka na mbandu ya muntu yango. Yandi lenda tubila mpi baverse ya nkaka ya ke wakana ti ntu-diambu ya disolo na yandi. Nkengi na nzo-nkanda ta pona mpangi yina ta sala disolo ti yandi.

⁶ Disolo No. 3: Mpangi-bakala to mpangi-nkento muntu ta sala disolo yai na minuta tanu. Kana bo me pesa disolo yai na mpangi-nkento, yandi ta sala yo bonso Disolo No. 2. Kana bo me pesa mpangi-bakala disolo ya me katuka na Étude perspicace, yandi ta sala yo bonso diskure sambu na bawi yonso. Mwana ya nzo-nkanda fwete sala ntu-diambu yina bo me pesa yandi. Yandi fwete pona baverse ya me fwana yina yandi ta sadila mpi kumonisa malongi yina beto lenda baka na mbandu ya muntu yango.

⁷ Ntuma ya Mpa Sambu na Bampangi-Babakala Yina Ta Sala Disolo No. 3: Kana bo me pesa mpangi-bakala disolo ya me katuka na Bangogo ya Luyantiku Sambu na Kutubila Ndinga ya Nzambi, yandi ta sala yo mutindu kulonguka ya dibuta ke salamaka to bonso nsonga na kisalu ya kusamuna. Mbala mingi, nkengi na nzo-nkanda muntu ta pona muwi mpi kadre. Muwi ta vanda muntu ya dibuta na yandi to mpangi mosi na dibundu. Yandi lenda tubila mpi baverse ya nkaka ya ke wakana ti ntu-diambu ya disolo na yandi. Mbala mingi, bo lenda pesa nkuluntu disolo yai. Nkuluntu ya ta sala disolo yai lenda pona muwi mpi kadre. Ntembe kele ve nde yo ta pesa dibundu kikesa kana nkuluntu mosi ke monisa mayele ya kulonga ntangu yandi ke solula ti muntu mosi ya dibuta na yandi to mpangi ya nkaka.

⁸ Bandongisila: Kana mwana ya nzo-nkanda me manisa disolo na yandi, nkengi na nzo-nkanda ta sadila minuta zole sambu na kusikisa yandi mpi kupesa yandi bandongisila yina me fwana ya me katuka na mukanda Baka Mambote na Malongi ya Nzo-Nkanda ya Kisalu ya Teokrasi. Ntangu yandi ta binga mwana ya nzo-nkanda sambu na disolo na yandi, nkengi na nzo-nkanda ta zabisa ve dilongi yina mwana ya nzo-nkanda ta sala. Kansi na nima ya kusikisa mwana ya nzo-nkanda ntangu yandi me manisa disolo na yandi, nkengi na nzo-nkanda ta zabisa dilongi yina mwana ya nzo-nkanda me sala mpi ta tendula bikuma yina ke monisa nde mwana ya nzo-nkanda me sala disolo yina mbote to yandi ta tendula na mawete yonso bikuma yina ke lomba nde mwana ya nzo-nkanda kutudila ndongisila mosi dikebi ya mingi.

⁹ Lutiti ya bandongisila ya mwana ya nzo-nkanda kele na mukanda Nzo-Nkanda ya Kisalu, na lutiti 79 tii na 81. Kana mwana nzo-nkanda me manisa disolo na yandi, nkengi na nzo-nkanda ta tula kidimbu na mukanda na yandi mpi ta yula mwana ya nzo-nkanda na kingenga kana yandi salaka devware ya dilongi yina bo lombaka yandi. Nkengi na nzo-nkanda lenda sikisa mwana ya nzo-nkanda mpi kupesa yandi bangindu ya mfunu na nsuka ya lukutakanu to na ntangu ya nkaka. Konso mwana ya nzo-nkanda fwete sadila bandongisila yina yandi ke baka na nzo-nkanda sambu na kuyela na kimpeve.​—1 Tim. 4:15.

¹⁰ Kana mwana ya nzo-nkanda me lutisa ntangu, nkengi na nzo-nkanda to nsadi mosi ya kisalu fwete sala kidimbu, mu mbandu kubula konso kima yina sambu na kusonga yandi na mayele yonso nde ntangu na yandi me lunga. Mwana ya nzo-nkanda fwete tula dikebi na kidimbu yina, kumanisa nsa na yandi mpi kukatuka na estrade.​—Tala mukanda Nzo-Nkanda ya Kisalu, lut. 282, par. 4.

¹¹ Bo ke siamisa bantu yonso yina ke lungisa malombo na kusonika zina na Nzo-Nkanda ya Kisalu ya Teokrasi. (Tala mukanda Nzo-Nkanda ya Kisalu, lut. 282, par. 6.) Malongi ya nzo-nkanda yai ke sadisaka bansadi ya Yehowa na kusamuna mpi na kulonga nsangu ya mbote ya Kimfumu na mawete, na zola mpi na mutindu ya ke ndimisa. Ntembe kele ve nde Yehowa ke waka kiese sambu bantu yonso ya ke bakaka mambote ya nzo-nkanda ya teokrasi ke pesaka yandi lukumu!​—Nk. 148:12, 13; Yez. 50:4.