Bantuma ya Lukutakanu Luzingu mpi Kisalu na Beto ya Bukristu

Mambu Yina Kele na Kati

• Bangogo ya Luyantiku 2

• Bimvwama ya Ndinga ya Nzambi 3-5

  • Diskure 3

  • Bimvwama ya Kimpeve 4

  • Lutangu ya Biblia 5

• Kudipesa na Kisalu ya Bilanga 6-14

  • Kuyantika Disolo 7

  • Landa Mpusa 8

  • Kukumisa Bantu Balongoki 9

  • Tendula Balukwikilu na Nge 10

  • Diskure 11

  • Mambu ya Kutubila 12

  • Bakadre ya Masolo 13

  • Kusadila Bavideo mpi Mikanda 14

• Zinga Mutindu Bakristu Fwete Zinga 15-16

  • Kulonguka ya Biblia ya Dibundu 16

• Bangogo ya Nsuka 17

• Kusikisa Bana ya Nzo-Nkanda mpi Kupesa Bo Bandongisila 18

• Ntangu 19

• Viziti ya Nkengi ya Nziunga 20

• Mposo ya Lukutakanu ya Nziunga to ya Distrike 21

• Mposo ya Lusungiminu 22

• Nkengi ya Lukutakanu Luzingu mpi Kisalu 23

• Ntwadisi ya Lukutakanu Luzingu mpi Kisalu 24

• Kilandi ya Ndongisi 25

• Banzo-Nkanda ya Nkaka 26

• Bavideo 27

1. Bantuma yina kele na formilere yai ta sadisa bayina yonso ta salaka masolo na lukutakanu Luzingu mpi Kisalu na Beto ya Bukristu. Na ntwala ya kubongisa masolo na bo, bo fwete tadila bantuma yina kele na Mukanda ya Lukutakanu Luzingu mpi Kisalu na Beto ya Bukristu mpi na formilere yai, yina bo me pesa sambu na masolo yango. Yo ta lombaka nde beno siamisa bansamuni yonso na kuvanda ti kikalulu ya kusalaka masolo bonso bavolontere. Bantu ya nkaka yina ke kwisaka na balukutakanu mbala na mbala lenda sala masolo kana bo ke ndimaka malongi ya Biblia mpi ke zitisaka minsiku ya Biblia na luzingu na bo. Kana muntu mosi ya me kuma ntete ve nsamuni me monisa mpusa ya kusonikisa zina, nkengi ya Lukutakanu Luzingu mpi Kisalu fwete solula ti yandi mambu yina muntu fwete lungisa mpi na nima yandi ta songa yandi kana yandi ke lungisa yo. Yo ta lomba na kusala yo na ntwala ya mpangi yina ke longukaka Biblia ti yandi (to na ntwala ya bibuti na yandi yina kele Bakristu). Mambu ya yandi fwete lungisa kele mutindu mosi ti yina bo ke lombaka na muntu yina ke zola kukuma nsamuni ya me bakaka ntete ve mbotika.—od kapu 8 par. 8.

BANGOGO YA LUYANTIKU

2. Munuta mosi. Konso mposo, na nima ya nkunga ya luyantiku mpi ya kisambu, ntwadisi ya Lukutakanu Luzingu mpi Kisalu ta pesa bampangi mpusa ya kulanda mambu yina beto ta tubila. Yandi fwete benda dikebi na masolo yina ta natila dibundu mambote ya mingi.

BIMVWAMA YA NDINGA YA NZAMBI

3. Diskure: Minuta kumi. Bo me pesa ntu-diambu mpi pula ya kele ti bangindu ya mfunu zole to tatu na Mukanda ya Lukutakanu Luzingu mpi Kisalu. Beno fwete pesa diskure yai na nkuluntu to na nsadi ya kisalu ya me fwana. Kana na mposo mosi buna, beto ta yantika mukanda mosi ya mpa ya Biblia, beno fwete songa video ya ke tubila yo. Mutubi lenda tubila kuwakana ya kele na kati ya video yina mpi ntu-diambu. Kansi, yandi fwete sala yonso sambu na kutubila bangindu yonso yina bo me tubila na mukanda ya lukutakanu. Kana ntangu kele, yandi fwete sadila na mutindu ya mbote bifwanisu yina kele na mukanda, sambu yo kele na kati ya malongi yina yandi fwete longa. Yandi lenda kotisa mpi bareferanse ya nkaka kana yo ta sadisa yandi na kutubila mambu ya mfunu yina kele na disolo na yandi.

4. Bimvwama ya Kimpeve: Minuta kumi. Yo kele disolo ya bangiufula mpi bamvutu, mpangi yina ta sala yo ta tuba ve bangogo ya luyantiku mpi bangogo ya nsuka. Nkuluntu to nsadi ya kisalu ya me fwana muntu ta sala yo. Mutubi fwete yula bawi bangiufula yonso zole. Diaka, yandi ta tadila kana yo me fwana nde bo tanga to ve baverse yonso yina kele pana. Konso mpangi ya ke pesa komantere fwete sala yo na basegondi 30 to na nsi.

5. Lutangu ya Biblia: Minuta iya. Mwana ya nzo-nkanda mosi ya bakala muntu fwete sala yo. Mwana ya nzo-nkanda fwete tanga kitini yina bo me pesa yandi kukonda kutuba bangogo ya luyantiku to ya nsuka. Ntwadisi ya lukutakanu ta sosaka mutindu ya kusadisa bana ya nzo-nkanda na kutanga kukonda kifu, na kubakisa mambu ya bo ke tanga, na kutanga bangogo pwelele, na kuniata bangogo ya mfunu, na kusoba ndinga, na kupema na bisika ya mbote, mpi na kutuba mutindu bo ke tubaka. Mutindu bitini ya nkaka ya lutangu ya Biblia ke vandaka nkufi kansi ya nkaka ke vandaka nda, nkengi ya Lukutakanu Luzingu mpi Kisalu fwete tadila makuki ya bana ya nzo-nkanda ntangu yandi ke kabula devware yai.

KUDIPESA NA KISALU YA BILANGA

6. Minuta kumi na tanu. Kitini yai ta sadisa beto yonso na kudibongisa sambu na kisalu ya kusamuna mpi kutomisa mayele na beto ya kusolula ti bantu, ya kusamuna mpi ya kulonga. Kana yo kele mfunu, bankuluntu lenda sala masolo ya bana ya nzo-nkanda. Konso mwana ya nzo-nkanda fwete sadila bandongisila yina kele na dilongi yina bo me pesa yandi, ya me katuka na kamukanda Kulonga to kamukanda Zola Bantu ya kele na kati ya baparantezi na nima ya disolo yango na Mukanda ya Lukutakanu Luzingu mpi Kisalu. Bantangu ya nkaka, bo ta tulaka disolo ti bawi na manaka. Beno fwete pesa disolo ya mutindu yai na nkuluntu to na nsadi ya kisalu ya me fwana.—Tala paragrafe 15 sambu na mutindu ya kutwadisa masolo ti bawi.

7. Kuyantika Disolo: Beno lenda pesa disolo yai na mwana ya nzo-nkanda ya bakala to ya nkento. Kana beno me pesa yo na mwana ya nzo-nkanda ya bakala, muwi fwete vanda bakala. Kana beno me pesa yo na mwana ya nzo-nkanda ya nkento, muwi fwete vanda nkento. Kana beno me pona nde mwana ya nzo-nkanda ya nkento kusala ti mwana ya nzo-nkanda ya bakala, to mwana ya nzo-nkanda ya bakala kusala ti mwana ya nzo-nkanda ya nkento, bo fwete vanda bantu ya dibuta mosi. Bo lenda sala disolo ya kuvanda to ya kutelama.—Sambu na kuzaba mambu ya nkaka na yina me tala mambu ya kutubila mpi kadre ya disolo yai, tala baparagrafe 12 mpi 13.

8. Landa Mpusa: Beno lenda pesa disolo yai na mwana ya nzo-nkanda ya bakala to ya nkento. Kana beno me pesa yo na mwana ya nzo-nkanda ya bakala, muwi fwete vanda bakala. Kana beno me pesa yo na mwana ya nzo-nkanda ya nkento, muwi fwete vanda nkento. (km 6/97 lut. 2) Mwana ya nzo-nkanda ti muwi lenda sala disolo ya kuvanda to ya kutelama. Mwana ya nzo-nkanda yai fwete sala nsonga ya ke monisa mambu yina beto lenda tuba ntangu beto ke landila muntu yina monisaka mpusa na disolo ya beto solulaka na mbala me luta.—Sambu na kuzaba mambu ya nkaka na yina me tala mambu ya kutubila mpi kadre ya disolo yai, tala baparagrafe 12 mpi 13.

9. Kukumisa Bantu Balongoki: Beno lenda pesa disolo yai na mwana ya nzo-nkanda ya bakala to ya nkento. Kana beno me pesa yo na mwana ya nzo-nkanda ya bakala, muwi fwete vanda bakala. Kana beno me pesa yo na mwana ya nzo-nkanda ya nkento, muwi fwete vanda nkento. (km 6/97 lut. 2) Mwana ya nzo-nkanda ti muwi lenda sala disolo ya kuvanda to ya kutelama. Mpangi yina ta sala disolo yai fwete monisa kitini ya kulonguka ya Biblia yina bo me yantikaka dezia mpi yo me mana ntete ve. Mwana ya nzo-nkanda fwete tuba ve bangogo ya kukotila na disolo to bangogo ya nsuka, katula kaka kana bo me lomba yandi na kusala dilongi yina. Ata bo lenda tanga baparagrafe yonso ya kele na kitini ya disolo yina bo pesaka bo, yo ke lomba kaka ve nde bo tanga baparagrafe yango yonso.

10. Tendula Balukwikilu na Nge: Kana yo kele diskure, mwana ya nzo-nkanda ya bakala muntu ta sala disolo yai. Kana yo kele nsonga, mwana ya nzo-nkanda ya bakala to ya nkento lenda sala yo. Kana beno me pesa yo na mwana ya nzo-nkanda ya bakala, muwi fwete vanda bakala. Kana beno me pesa yo na mwana ya nzo-nkanda ya nkento, muwi fwete vanda nkento. Kana beno me pona nde mwana ya nzo-nkanda ya nkento kusala ti mwana ya nzo-nkanda ya bakala, to mwana ya nzo-nkanda ya bakala kusala ti mwana ya nzo-nkanda ya nkento, bo fwete vanda bantu ya dibuta mosi. Mwana ya nzo-nkanda fwete pesa mvutu ya pwelele mpi ya mbote na ngiufula yina kele na ntu-diambu ya bo me pesa na nsadisa ya bansangu yina kele na referansi ya bo me pesa. Ntangu mwana ya nzo-nkanda ke sala disolo, yandi lenda monisa nde mambu yina yandi ke tuba me katuka na mukanda ya bo me pesa na referansi to yandi lenda tubila kaka mambu ya kele na referansi kukonda kutubila referansi yango.

11. Diskure: Beno fwete pesa disolo yai na mwana ya nzo-nkanda ya bakala mpi yandi ta sala yo bonso diskure na dibundu. Kana bo me baka diskure yai na dibanza yina kele na bangindu ya nkaka A ya kamukanda Zola Bantu, mwana ya nzo-nkanda fwete monisa mutindu ya kusadila verse to baverse ya bo me pesa na kisalu ya kusamuna. Mu mbandu, yandi lenda monisa nki ntangu beto lenda sadila verse mosi buna, ntendula ya verse yango, mpi nki mutindu kuyindula ti muntu na nsadisa ya verse yina. Kana bo me baka diskure yai na dibanza yina kele na dilongi mosi buna ya kamukanda Zola Bantu, mwana ya nzo-nkanda fwete tubila mingi mutindu ya kusadila dibanza yina na kisalu ya kusamuna. Yandi lenda tubila mingi mbandu yina bo me pesa na ditonsi ya 1 ya dilongi yango to kutubila mosi ya baverse ya nkaka yina kele na dilongi yina, kana yo kele mfunu.

12. Mambu ya Kutubila: Mambu ya beto ke tubila na paragrafe yai mpi na paragrafe ya ke landa ke tadila masolo “Kuyantika Disolo” mpi “Landa Mpusa.” Kana na bantuma bo me tuba ve ata kima mosi, lukanu ya mwana ya nzo-nkanda kele ya kutubila kieleka mosi ya Biblia ya pete yina kele mfunu sambu na muwi mpi kutula fondasio ya disolo ya nkaka sambu na bilumbu ke kwisa. Mwana ya nzo-nkanda fwete pona disolo ya me fwana mpi ya mbote, na kutadila mambu ya ke salama na teritware na bo. Mwana ya nzo-nkanda lenda pona kana yandi ta sadila to ve mukanda to video mosi yina kele na kati ya Bisadilu Sambu na Kulonga. Na kisika ya kukanga na ntu bambandu ya bangogo ya kukotila na masolo, bana ya nzo-nkanda fwete sala bikesa ya kumonisa mutindu ya mbote ya kusolula ti bantu, mu mbandu kutudila bantu dikebi mpi kutuba mutindu beto ke tubaka.

13. Bakadre ya Masolo: Mwana ya nzo-nkanda fwete pona kadre ya disolo na kutadila mambu ya ke salama na kisika yina beno kele. Mu mbandu:

1. (1) Nzo na Nzo: Yo kele kusamuna nzo na nzo—yo vanda kimuntu-kimuntu, na nzila ya telefone, to na nzila ya mukanda—mpi kusadisa muntu yina monisaka mpusa na mbala me luta na kisalu ya nzo na nzo.

2. (2) Kimbangi ya Dibaku ya Mbote: Yo kele kusadila ntangu ya beto ke bulaka masolo ya nkaka ti bantu sambu na kukumisa yo mabaku ya kuta kimbangi. Yo lenda vanda kusonga ngindu mosi ya Biblia na bantu yina beto ke kutanaka ti bo na kisalu, na nzo-nkanda, na kartie, na bataksi, to na bisika ya nkaka ntangu beto ke salaka bisalu na beto ya konso kilumbu.

3. (3) Kimbangi na Bisika ya Bantu Mingi: Yo lenda vanda kuta kimbangi na nzila ya shario to mesa, kwenda kukutana ti bantu na bisika ya bo ke tekaka to ke salaka, kuta kimbangi na bala-bala, na baparke, na bisika yina bakaminio ke telamaka, to na konso kisika yina beto lenda kuta bantu.

14. Kusadila Bavideo mpi Mikanda: Na kutadila mambu ya nkaka, mwana ya nzo-nkanda lenda sadila video to mukanda. Kana disolo kele ti video mosi to kana mwana ya nzo-nkanda me pona na kusadila yo, yandi fwete sala bonso nde yandi me songisa video yango kansi yandi ta songisa yo mpenza ve.

ZINGA MUTINDU BAKRISTU FWETE ZINGA

15. Na nima ya nkunga, minuta 15 ya ke landa ya kitini yai ta vanda ti disolo mosi to masolo zole ya bo me yidika sambu na kusadisa bawi na kusadila Ndinga ya Nzambi. Kana bo me pesa ve bantuma ya nkaka, beno fwete pesa masolo yai na bankuluntu to na bansadi ya kisalu ya me fwana. Kansi, disolo ya bampusa ya dibundu, bankuluntu mpamba bantu fwete sala yo. Kana yo kele disolo ti bawi, katula bangiufula yina kele kati na Mukanda ya Lukutakanu Luzingu mpi Kisalu, mpangi yina ta sala yo lenda sadila bangiufula ya nkaka na bunda ya disolo. Bangogo na yandi ya luyantiku fwete vanda ya nkufi sambu na kupesa ntangu ya kufwana na kutubila bangindu ya mfunu mpi kupesa bantu mingi dibaku ya kupesa bamvutu. Kana disolo kele ti interview, kana mpila kele, yo kele mbote nde mpangi yina bo ke yula bangiufula kupesa bamvutu na estrade, na kisika ya kusala yo ya kuvanda na kiti na yandi, kana mpila kele.

16. Kulonguka ya Biblia ya Dibundu: Minuta makumi tatu. Beno fwete pesa disolo yai na nkuluntu mosi ya me fwana. (Kisika bankuluntu kele ve mingi, beno lenda pesa yo na bansadi ya kisalu ya me fwana.) Kimvuka ya bankuluntu fwete pona bampangi yina me fwana sambu na kutwadisa Kulonguka ya Biblia ya Dibundu. Bampangi yina bo ta pona fwete twadisa kitini yai ya lukutakanu na mutindu ya mbote mpi kuzitisa ntangu. Bo fwete benda dikebi na baverse ya mfunu mpi kusadisa bantu yonso na kubakisa mutindu ya kusadila mambu yina beno ke longuka. Yo ta vanda mfunu nde bampangi yina bo me pona kutanga diaka bantuma ya ke monisaka mutindu bo lenda twadisa disolo ti bawi. (w23.04 lut. 24, lupangu) Kana beno me manisa kutadila mbote-mbote malongi yina bo yidikaka sambu na mposo yina, yo ta vanda ve mfunu na kukumisa kulonguka nda. Kana mpila kele, beno fwete sobaka ntwadisi mpi mutangi konso mposo. Kana ntwadisi ya Lukutakanu Luzingu mpi Kisalu me lomba nde bo fiotuna minuta yina bo me tulaka sambu na kulonguka, mpangi ya ke twadisa kitini yai ta tala mutindu kulonguka yango lenda salama na bunkufi. Yandi lenda lomba nde bo tanga ve baparagrafe ya nkaka.

BANGOGO YA NSUKA

17. Minuta tatu. Ntwadisi ya Lukutakanu Luzingu mpi Kisalu ta vutukila mingi-mingi bangindu ya mfunu. Yandi fwete tubila mpi na bunkufi mambu ya beto ta longuka na mposo yina ke landa. Kana ntangu kele, yandi lenda tanga bazina ya bana ya nzo-nkanda yina ta sala masolo na mposo yina ke kwisa. Kana bo me pesa ve ntuma ya nkaka, ntwadisi muntu fwete pesa konso luzayisu ya mfunu mpi kutangila dibundu konso mukanda yina bo tindilaka beno ntangu yandi ke tuba bangogo na yandi ya nsuka. Ntwadisi fwete pesa ve na estrade baluzayisu yina ke vutukaka mbala na mbala, mu mbandu, bangidika yina yo me fwana kubaka sambu na kisalu ya kusamuna mpi manaka ya kutula bunkete. Ata mpidina, beno fwete tula baluzayisu yai na tablo ya bansangu. Kana ntangu yina bo me bikaka sambu na bangogo ya nsuka ta kuka ve sambu na kupesa baluzayisu to kutanga mikanda, ntwadisi fwete lomba bampangi yina ke sala masolo na kitini Zinga Mutindu Bakristu Fwete Zinga na kukumisa masolo na bo nkufi. (Tala baparagrafe 16 mpi 19.) Na nsuka, beno ta yimba nkunga mpi ta sala kisambu.

KUSIKISA BANA YA NZO-NKANDA MPI KUPESA BO BANDONGISILA

18. Na nima ya disolo ya konso mwana ya nzo-nkanda, ntwadisi ya Lukutakanu Luzingu mpi Kisalu kele ti munuta mosi sambu na kusikisa yandi mpi kupesa yandi bandongisila ya me katuka na dilongi yina bo lombaka yandi. Na ntwala ya kubinga mwana ya nzo-nkanda, yandi ta tubila ve dilongi yina mwana ya nzo-nkanda yango ta sala. Kansi, kana mwana ya nzo-nkanda me manisa disolo na yandi, mpi na nima ya kusikisa yandi, ntwadisi lenda tubila dilongi yina mwana ya nzo-nkanda vandaka kusala mpi kutuba sambu na nki yandi me sala dilongi yango mbote to kutendula na luzitu yonso sambu na nki mpi inki mutindu mwana ya nzo-nkanda fwete tula diaka dikebi na dilongi yina. Ntwadisi lenda tubila mpi mambu ya nkaka ya me tala disolo kana yandi ke mona nde yo lenda sadisa mwana ya nzo-nkanda to bawi. Ntwadisi lenda pesa mwana ya nzo-nkanda bandongisila ya nkaka ya mbote ya me katuka na kamukanda Zola Bantu, kamukanda Kulonga to na mukanda Nzo-Nkanda ya Kisalu na kingenga na nima ya lukutakanu to na ntangu ya nkaka, yo vanda sambu na dilongi yina bo lombaka yandi to sambu na dilongi ya nkaka.—Sambu na kuzaba mambu ya nkaka na yina me tala mukumba ya ntwadisi ya Lukutakanu Luzingu mpi Kisalu mpi ya kilandi ya ndongisi, tala baparagrafe 19, 24, mpi 25.

NTANGU

19. Ata disolo mosi ve fwete lutisa ntangu, yo vanda bangogo ya ntwadisi ya Lukutakanu Luzingu mpi Kisalu. Ata Mukanda ya Lukutakanu Luzingu mpi Kisalu ke songaka ntangu yina konso disolo fwete baka, kana muntu ya ke sala disolo me longa mbote-mbote malongi yonso, yo kele mfunu ve na kuyika malongi ya nkaka kaka sambu yandi lungisa minuta yina disolo fwete sala. Kana bampangi yina ke sala masolo me lutisa ntangu, ntwadisi ya Lukutakanu Luzingu mpi Kisalu to kilandi ya ndongisi fwete pesa bo bandongisila na kingenga. (Tala baparagrafe 24 mpi 25.) Lukutakanu ya mvimba ti bankunga mpi bisambu, fwete baka ngunga 1 ti minuta 45.

VIZITI YA NKENGI YA NZIUNGA

20. Kana dibundu kele ti viziti ya nkengi ya nziunga, beno fwete sala manaka mutindu yo kele na Mukanda ya Lukutakanu Luzingu mpi Kisalu, katula diambu yai: Na kisika ya kusala Kulonguka ya Biblia ya Dibundu na kitini Zinga Mutindu Bakristu Fwete Zinga, nkengi ya nziunga ta sala diskure ya kisalu ya minuta 30. Na ntwala ya kulanda diskure yina ya kisalu, ntwadisi ya Lukutakanu Luzingu mpi Kisalu ta tubila na bunkufi mambu ya beno me katuka kulonguka mpi mambu yina beno ta longuka na mposo yina ke landa. Yandi ta pesa baluzayisu yina kele mfunu, ta tanga mikanda kana yo kele, mpi na nima yandi ta binga nkengi ya nziunga. Na nima ya diskure ya kisalu, nkengi ya nziunga ta sukisa lukutakanu ti nkunga yina yandi ta pona. Yandi lenda binga mpangi mosi sambu na kusala kisambu ya nsuka. Na mposo ya viziti ya nkengi ya nziunga, bana ya nzo-nkanda fwete sala ve masolo na banzo-nkanda ya nkaka na ndinga ya dibundu na beno. Kimvuka mosi lenda sala lukutakanu na bo ata nkengi ya nziunga kele na viziti na dibundu yina ke twadisaka kimvuka yango. Kansi, kimvuka yai fwete vukana ti dibundu yina ke twadisaka yo ntangu nkengi ya nziunga ke sala diskure ya kisalu.

MPOSO YA LUKUTAKANU YA NZIUNGA TO YA DISTRIKE

21. Na mposo ya lukutakanu ya nziunga to ya distrike, beto ta sala ve ata lukutakanu mosi. Beno ta yibusa bampangi ya dibundu nde malongi yina beto fwete longuka na bamposo yina, konso mpangi ta longuka yo yandi mosi to na dibuta.

MPOSO YA LUSUNGIMINU

22. Kana Lusungiminu ta salama na kati-kati ya mposo, beto ta sala ve Lukutakanu Luzingu mpi Kisalu.

NKENGI YA LUKUTAKANU LUZINGU MPI KISALU

23. Nkuluntu mosi yina kimvuka ya bankuluntu ta pona ta vanda nkengi ya Lukutakanu Luzingu mpi Kisalu. Mukumba na yandi kele ya kuzikisa nde bo me yidika mbote lukutakanu yai mpi bo ke sala masolo na yo na kulanda bantuma yai. Yandi fwete solulaka mbote ti kilandi ya ndongisi. Kana yandi me baka Mukanda ya Lukutakanu Luzingu mpi Kisalu, nkengi ya Lukutakanu Luzingu mpi Kisalu ta sukinina ve na kukabula masolo yonso ya lukutakanu ya kati-kati ya mposo sambu na bangonda zole. Yo ke tadila mpi masolo yina kele ve ya bana ya nzo-nkanda mpi bantwadisi ya lukutakanu ya kati-kati ya mposo na kati ya bampangi yina kimvuka ya bankuluntu me ponaka, yo vanda mpi masolo ya bana ya nzo-nkanda. (Tala baparagrafe 3-16 mpi 24.) Ntangu yandi ke kabula badevware na bana ya nzo-nkanda, yandi fwete sala yo na kutadila bamvula ya kubutukila ya konso mwana ya nzo-nkanda, eksperiansi na yandi, mpi masonga na yandi na disolo ya yandi ta tadila. Yandi fwete sadila luswasukusu ya mutindu mosi ntangu yandi ke kabula masolo ya nkaka ya lukutakanu. Beno fwete pesa konso muntu disolo na yandi kiteso ya bamposo tatu na ntwala ya dati yina yandi ta sala yo. Beno ta sonika yo na formilere (S-89) Devware na Lukutakanu Luzingu mpi Kisalu na Beto ya Bukristu sambu na masolo ya bana ya nzo-nkanda. Nkengi ya Lukutakanu Luzingu mpi Kisalu fwete zikisa nde bo me tula manaka ya lukutakanu ya mvimba na tablo ya bansangu. Kimvuka ya bankuluntu lenda pona nkuluntu to nsadi ya kisalu ya nkaka sambu na kusadisa yandi. Kansi, bankuluntu mpamba bantu fwete kabulaka masolo yina kele ve ya bana ya nzo-nkanda.

NTWADISI YA LUKUTAKANU LUZINGU MPI KISALU

24. Konso mposo, nkuluntu mosi ta vanda ntwadisi ya Lukutakanu Luzingu mpi Kisalu. (Kana bankuluntu kele ve mingi, bansadi ya kisalu ya me fwana lenda vanda bantwadisi.) Ntwadisi ta yidika bangogo ya luyantiku mpi ya nsuka. Yandi ta bingaka mpi bampangi yina ke sala masolo yonso; kana bankuluntu kele fioti, ntwadisi lenda sala mpi masolo ya nkaka, mingi-mingi masolo yina yo ke lomba kaka kusonga video kansi yina yo ta lomba ve nde bantu kupesa bamvutu. Na nsuka ya konso disolo, yandi fwete tuba kaka fioti. Kimvuka ya bankuluntu fwete pona bankuluntu yina me fwana sambu na mukumba yai. Bo ta ponaka bankuluntu yina me fwana sambu na kuvanda bantwadisi mbala na mbala. Na kutadila mambu ya dibundu na beno, beno lenda sadila nkengi ya Lukutakanu Luzingu mpi Kisalu mbala mingi kuluta bankuluntu ya nkaka ya me fwana sambu yandi vanda ntwadisi. Kana nkuluntu mosi me fwana na kutwadisa Kulonguka ya Biblia ya Dibundu, ntembe kele ve nde yandi me fwana mpi na kuvanda ntwadisi ya lukutakanu yai. Kansi, beno vila ve nde nkuluntu yina ke twadisa kele ti mukumba ya kusikisa bana ya nzo-nkanda na zola mpi ya kupesa bo bandongisila ya zola mpi ya mbote, kana yo kele mfunu. Ntwadisi kele mpi ti mukumba ya kuzikisa nde lukutakanu ke mana na ntangu ya mbote. (Tala baparagrafe 17 mpi 19.) Kana ntwadisi me zola mpi kana kisika ya me fwana kele, beno lenda tula mikro ya kutelama na estrade sambu yandi ta bingaka konso mpangi yina ke sala disolo ya ke landa na ntangu mpangi yango ke kwenda na ntwala ya pipitre. Mutindu mosi, ntwadisi lenda vanda na ntwala ya mesa yina kele na estrade ntangu mwana ya nzo-nkanda ke sala lutangu ya Biblia to ntangu kitini ya lukutakanu Kudipesa na Kisalu ya Bilanga ke salama. Yo lenda sadisa na kudia ve ntangu.

KILANDI YA NDONGISI

25. Kana mpila kele, yo kele mbote na kusadila nkuluntu yina kele mutubi ya mbote sambu na kulungisa mukumba yai. Mukumba ya kilandi ya ndongisi kele ya kupesa bandongisila na kingenga, kana yo kele mfunu, na bankuluntu mpi bansadi ya kisalu na konso disolo yina bo ke sala; mu mbandu masolo na Lukutakanu Luzingu mpi Kisalu, badiskure ya bantu yonso, mpi kutwadisa Kulonguka ya Nzozulu ya Nkengi to Kulonguka ya Biblia ya Dibundu to kutanga na balukutakanu yai. (Tala paragrafe 19.) Kana bankuluntu mingi na dibundu kele mitubi mpi balongi ya mbote, konso mvula beno fwete ponaka nkuluntu ya me fwana yina ta vanda kilandi ya ndongisi. Yo kele ve mfunu nde kilandi ya ndongisi kupesaka bandongisila na nima ya konso disolo.

BANZO-NKANDA YA NKAKA

26. Kana bana ya nzo-nkanda kele mingi, mabundu lenda sala banzo-nkanda ya nkaka sambu na masolo ya bana ya nzo-nkanda. Konso nzo-nkanda ya nkaka fwete vanda ti ndongisi ya me fwana, kuluta mbote yandi vanda nkuluntu. Kana yo kele mfunu, nsadi ya kisalu ya me fwana kibeni lenda baka mukumba yai. Kimvuka ya bankuluntu fwete pona bampangi yina me fwana sambu na mukumba yai mpi kana yo ke lomba nde bo sala bature. Ndongisi fwete landa mambu yina bo me tubila na paragrafe 18. Kana beno ke sala nzo-nkanda ya nkaka, beno fwete lomba bana ya nzo-nkanda na kukwenda na nzo-nkanda yango na nima ya disolo Bimvwama ya Kimpeve na kitini ya lukutakanu Bimvwama ya Ndinga ya Nzambi. Bo fwete vutuka na bisika na bo na nima ya disolo ya mwana ya nzo-nkanda ya nsuka.

BAVIDEO

27. Beto ta sadilaka bavideo ya bo me pona sambu na lukutakanu yai. Bavideo ya lukutakanu ya kati-kati ya mposo ta basikaka na application JW Library® mpi beto lenda baka yo na nzila ya ba-apareyi mingi.

© 2023 Watch Tower Bible and Tract Society of Pennsylvania

S-38-MK 11/23