Bantuma Sambu na Bankengi na Nzo-nkanda

NA KONSO dibundu, bo keponaka nkuluntu mosi sambu na kuvanda nkengi na Nzo-Nkanda ya Kisalu ya Teokrasi. Kana bo mepesaka nge mukumba yai, kyese ya nge kele na yo sambu na nzo-nkanda yai mpi dikebi ya nge tatula na kuyela ya konso mwana ya nzo-nkanda kele mfunu mingi sambu nzo-nkanda yango kubuta bambuma ya mbote na dibundu na beno.

Mukumba mosi ya mfunu ya nge fwete lungisa kele ya kutwadisa Nzo-Nkanda ya Kisalu ya Teokrasi ya dibundu na beno konso mposo. Kuvila ve nde katula bana ya nzo-nkanda yina kele ti badevware kilumbu yina, bana ya nzo-nkanda yankaka kele na kati ya bawi. Twadisa nzo-nkanda na mpila nde dibundu ya mvimba kuyibuka dyaka malongi yina bo tasadila mpi yina ketubila ata lukanu mosi mpamba ya nzo-nkanda yina bo ketubila na balutiti 5 tii 8 ya mukanda yai.

Landaka bana ya nzo-nkanda yonso na dikebi yonso, yo vanda bo kesala badevware ya kutanga to badevware ya kele bonso bansonga, to bo kesala masolo. Sadisa bo na kumona masolo na bo bonso badevware kaka ve kansi bonso okazio ya kutomisa kisalu na bo sambu na Yehowa. Ya kyeleka, kuyela na bo ketadila ntetentete kikesa yina bo mosi kesala. Kansi yo kele mpi mfunu nde nge tudila bo dikebi ya masonga, nge sadisa bo na kubakisa valere ya bandongisila yina bo kebaka, mpi nge tendudila bo mutindu ya kusadila bandongisila yango. Sambu na kusala yo, widikila masolo yonso na dikebi yonso sambu na kuzaba bandongisila ya mbote ya nge lenda pesa.

Zikisa ntangu na mpila nde nzo-nkanda kuyantika mpi kusuka na ntangu ya mbote. Pesa mbandu ya mbote na kupesaka bakomantere na nge kaka na ntangu yina bo mepesaka sambu na yo. Kana disolo ya mwana ya nzo-nkanda melutisa ntangu, nge to nsadi mosi ya kisalu fwete sala kidimbu mosi sambu na kusonga yandi nde yandi melutisa ntangu. Mwana ya nzo-nkanda yango fwete manisa nsa ya yandi ketuba mpi kukatuka na estrade. Kana disolo mosi melutisa ntangu, nge, kusala ve bakomantere mingi, mpi na nsuka beno tadila dyambu yango ti mpangi yina na nima ya lukutakanu.

Kana nge kele na lukutakanu, nge muntu fwete twadisa nzo-nkanda. Kansi kana nge tavanda ve, nkuluntu yankaka yina bankuluntu meponaka na ntwala fwete twadisa nzo-nkanda. Kana nge kele na mfunu ya lusadisu sambu na kusala manaka, kusonika mpi kukabisa bapapie ya badevware, to kuyingisa bantu yankaka na programe, nsadi mosi ya kisalu yina bankuluntu meponaka lenda sadisa nge na kusala mambu yai.

Kusonikisa Bana ya Nzo-nkanda. Syamisa bansamuni yonso na kusonikisa na nzo-nkanda. Bantu yankaka yina kevukanaka ti beto na balukutakanu ya dibundu lenda sonikisa mpi kana bo kendima malongi ya Biblia mpi kana luzingu na bo kewakana ti minsiku ya Bukristu. Kana muntu memonisa mpusa ya kusonikisa na nzo-nkanda, sikisa yandi na kyese yonso. Kana muntu yango mekuma ve ntete nsamuni, nge, nkengi na nzo-nkanda muntu fwete solula ti yandi mambu yina muntu fwete lungisa na ntwala ya kusonikisa zina na nzo-nkanda. Yo tavanda mbote na kusala yo kumosi ti mpangi yina kelongukaka Biblia ti yandi (to na ntwala ya bibuti na yandi yina kele Bakristu). Mambu ya yandi fwete lungisa kele mutindu mosi ti yina bo kelombaka na muntu yina kezola kukuma nsamuni ya mebakaka ntete ve mbotika. Yo kele na lutiti 97 tii na 99 ya mukanda Organisés pour bien remplir notre ministère. Sala lisiti ya mpa sambu bazina ya bantu yonso yina mesonikisaka na nzo-nkanda kukota na lisiti.

Mutindu ya Kusadila Lutiti ya Bandongisila. Lutiti ya bandongisila ya konso mwana ya nzo-nkanda kele na mukanda na yandi, na lutiti 79 tii na 81. Mutindu mukubu yina kele na lutiti yango kesonga yo, kana mwana ya nzo-nkanda kesala devware ya kutanga, nge lenda lomba yandi na kusala ndongisila mosi na kati ya bandongisila ya 1 tii ya 17. Sambu na badevware yina kesalama bonso bansonga, nge lenda pona konso ndongisila yina nge mezola katula kaka ndongisila ya 7, 52, ti 53. Nge lenda sadila bandongisila yonso sambu na badevware yina kesalamaka bonso masolo katula kaka ndongisila ya 7, 18, mpi 30.

Ntangu nkengi na nzo-nkanda mepesa mwana ya nzo-nkanda dilongi mosi ya kusala, yandi fwete sonika dati ya mwana ya nzo-nkanda mesala yo na kilapi ya mate na nsi ya “Dati ya Nge Tasala Yo” na kisika yina bo mebikisa yina kele na lweka ya dilongi yango na lutiti ya bandongisila yina kele na mukanda ya mwana ya nzo-nkanda. Na nima ya kusala devware na yandi, yufula mwana ya nzo-nkanda na kingenga kana yandi salaka (ba)devware yina bo mepesa na nsuka ya dilongi yina ketubila ndongisila ya yandi mesala. Kana yandi salaka yo, tula kidimbu na kalupangu yina kele na lweka sambu na kusonga nde yandi salaka devware yango. Kana nge melomba yandi na kusala dyaka ndongisila yina, mfunu ya kusonika kima yankaka na lutiti ya bandongisila kele ve. Kusonika ve ata kima mosi na kisika yina kele na nsi ya “Dati ya Nge Memanisa Yo.” Nge fwete sonika na kisika yai kaka kana yandi kezola kuluta na ndongisila yankaka. Dyaka, na lutiti 82 ya mukanda ya mwana ya nzo-nkanda, nge fwete sonika dati na diboko ya kimama na lweka ya kadre yina yandi sadilaka mpi nge talanda kusala yo na konso devware ya yandi mesala. Konso kadre kele ti bisika zole na lutiti ya bandongisila yina kesonga nde yandi lenda sadila kadre mosi mbala zole. Bana ya nzo-nkanda fwete vanda ti mikanda na bo ntangu nzo-nkanda kesalama.

Na disolo mosi, nge fwete lomba mwana ya nzo-nkanda na kusala kaka ndongisila mosi. Na kutuba ya mbote, yo kele mbote mpenza na kulanda ndonga ya bandongisila mutindu yo kele na mukanda. Kansi, kana bana ya nzo-nkanda yankaka kesala dezia mbote bandongisila yankaka, nge lenda syamisa bo na kulonguka mpi kusadila malongi yankaka bo mosi. Na nima, nge lenda sadisa bo na bandongisila yina nge keyindula nde yo tasadisa bo na kuyela sambu bo kuma mitubi mpi balongi ya mbote.

Ata mwana ya nzo-nkanda mosi mesonikisaka na nzo-nkanda bamvula mingi meluta, yandi lenda baka mambote mingi na kulonguka mpi kusadila konso dilongi. Sambu na kusadisa bana ya nzo-nkanda yina kele ti mfunu ya bandongisila ya sikisiki, nge lenda pona mwa bikalulu ya mutubi yina bo fwete sadila na kisika ya kulanda na ndonga bandongisila yina kele na lutiti ya bandongisila.

Mutindu ya Kupesa Bandongisila. Ntangu nge kepesa bandongisila, sadila mbote bambandu mpi minsiku yina kele na Biblia. Bana ya nzo-nkanda fwete mona nde bandongisila ya nge kepesa bo mpi mutindu nge kepesa yo kewakana mbote ti minsiku ya kuzanguka ya Ndinga ya Nzambi.

Kuvila ve nde nge kele ‘nduku ya kisalu’ ya bampangi na nge ya babakala ti ya bankento. (2 Kor. 1:​24, NW) Bonso bo, nge fwete sala mpi ngolo sambu na kuyedisa mayele na nge ya kutuba mpi ya kulonga. Longukaka nge mosi mukanda Baka Mambote na Malongi ya Nzo-Nkanda ya Kisalu ya Teokrasi, sadila bandongisila yina kele na kati, mpi pesa mbandu ya mbote na bankaka sambu bo mpi kusala mutindu mosi.

Ntangu nge kesala yo, baka lukanu ya kusadisa bana ya nzo-nkanda na kukuma batangi ya mbote, mitubi ya kufwana, mpi balongi ya mbote. Sambu na kusala yo, sala ngolo na kupesa bana ya nzo-nkanda lusadisu yina bo kele na yo mfunu sambu bo bakisa mbote bikalulu ya kuswaswana ya mutubi, sambu na nki bikalulu yango kele mfunu, mpi mutindu ya kuyedisa yo. Mukanda yai mesalama na mutindu mosi yina tasadisa nge na kusala yo. Ata mpidina, yo kelomba nde nge sala mambu mingi kuluta kutanga mpamba bangogo yina kele na mukanda yai. Beno tubila bangindu yina bangogo yango ketendula mpi mutindu ya kusadila bangindu yango.

Kana mwana ya nzo-nkanda mosi mesala mbote ndongisila mosi, sikisa yandi. Songa yandi na bunkufi nki kima yandi salaka mbote to sambu na nki dyambu ya yandi salaka kele mfunu. Kana yo kelomba nde yandi tula dikebi na ndongisila mosi, zikisa kana yandi kebakisa mbote sambu na nki nge kelomba yandi na kusala yo. Beno tubila mutindu yandi lenda sala yo. Monisa yandi pwelele mambu ya yandi fwete sala, mpi sala yo na mawete yonso.

Kuvila ve nde sambu na bantu mingi, kutelama sambu na kukwenda kusala disolo kevandaka mpasi mingi. Kana muntu mosi keyindula nde yandi salaka ve disolo na yandi mbote, yandi lenda yindula nde mfunu ya kulanda na kusala masolo kele ve. Landa mbandu ya Yezu yina kuzengaka ve “dititi ya kukonama” to ‘kufwaka tiya ve na nsinga ya mwinda yina kepela mbote ve.’ (Mat. 12:20) Tadila mpi mawi ya mwana ya nzo-nkanda. Ntangu nge kepesa bandongisila, sala yo na kutalaka mpi kana mwana ya nzo-nkanda yango kele nsamuni ya mpa to ya ntama. Bandongisila ya kyese mpi ya masonga lenda pesa bantu kikesa na kulanda kusala mbote kuluta.

Zitisa konso mwana ya nzo-nkanda. Roma 12:10, (NW) ketubila beto nde: “Beno songa mbandu sambu na yina metala kusonga luzitu beno na beno.” Yai kele ndongisila ya mbote mpenza sambu na muntu ya kepesa bankaka bandongisila na Nzo-Nkanda ya Kisalu ya Teokrasi! Kana mwana ya nzo-nkanda yango kele mbuta na nge, sadila mbote ndongisila yina bo mepesa na 1 Timoteo 5:1, 2. Ata mpidina, ata mwana ya nzo-nkanda kele na konso nki mvula yina, kana nge pesa ndongisila yina kesadisa yandi na kutomisa mutindu na yandi ya kusala mambu na luzitu yonso, yo tavanda mpi ve mpasi na kundima yo.​—Bing. 25:11.

Ntangu nge kepesa mwana ya nzo-nkanda bandongisila, monisa yandi pwelele lukanu ya malongi ya yandi kebaka. Lukanu yango kele ve kaka ya kusala masolo mbote sambu nge sikisa yandi mpi nge lomba yandi na kuluta na ndongisila yina melanda. Lukanu yango kele ve ya kukuma mutubi mpi longi ya mbote yina bantu yonso kesikisaka. (Bing. 25:27) Mpusa na beto kele ya kusadila mbote dikabu ya kutuba ya Nzambi mepesaka beto sambu na kupesa Yehowa lukumu mpi kusadisa bantu yankaka na kuzaba mpi kuzola yandi. Lukanu ya malongi na beto kele ya kusadisa beto na kulungisa mbote kisalu ya bo ketubila na Matayo 24:14 mpi 28:19, 20. Bampangi ya babakala ya mebakaka mbotika yina melungisa mambu yina bo kelombaka lenda baka mukumba ya kutanina “mameme ya Nzambi” bonso mitubi mpi balongi na ntwala ya bantu mingi.​—1 Pie. 5:2, 3.

Lomba na bana ya nzo-nkanda na kutanga mambu yonso yina kele na ndongisila yina bo tasala na mbala ya kelanda bilumbu mingi na ntwala ya kusala disolo na bo. Syamisa bo na kusadila mambu yina bo metanga na ntangu bo kebongisa masolo na bo ya nzo-nkanda, na masolo na bo ya konso kilumbu, na bakomantere ya bo kepesa na balukutakanu, mpi na kisalu ya bilanga.

Mutindu ya Kukabula Masolo. Nge fwete kabula masolo kiteso ya bamposo tatu na ntwala. Kana mpila kele, sonikila bo yo na bapapie.

Nge fwete pesa na bankuluntu masolo yina kelomba kulonga dibundu, yo kele mbote na kupesa yo na bayina tasala masolo ya mutindu yina mbote, mpi na bansadi ya kisalu yina kele balongi ya mbote.

Sambu na kuzaba nki masolo nge fwete pesa na bampangi ya babakala mpi nki yo nge fwete pesa na bampangi ya bankento, landa bantuma yina bo mepesa na manaka ya nzo-nkanda. Kana bampangi ya bankento yina kesalaka masolo kele mingi kuluta bampangi ya babakala, pesaka bampangi ya babakala masolo mingi ya kelomba kusala yo bonso badiskure kuluta masolo yina kelomba kaka kusala lutangu ya Biblia.

Tadila mayele mpi mvula ya konso mwana ya nzo-nkanda na ntangu nge kekabula masolo. Keti yo kele mbote na kupesa nkuluntu mosi to nsadi mosi ya kisalu disolo na nzo-nkanda kilumbu ya yandi kele ti disolo na Lukutakanu ya Kisalu to na mposo yina yandi tasala diskure ya bantu yonso na dibundu? Keti yo kele mbote na kupesa mpangi mosi ya nkento disolo kaka kilumbu yina mwana na yandi ya leke kesala disolo mpi yina yandi lenda zola kusadisa? Mingimingi kana mwana ya nzo-nkanda yango kele leke to mebakaka ntete ve mbotika, keti disolo yango mefwana mpenza na yandi? Zikisa kana disolo ya nge kepesa kewakana mbote ti ndongisila yina mwana ya nzo-nkanda fwete sala.

Sambu na masolo ya nge mepesa na bampangi ya bankento, mbala mingi mwana ya nzo-nkanda yandi mosi tapona kadre mutindu bantuma yina kele na lutiti 78 mpi 82 ketuba. Nge fwete songa yandi muntu ya yandi tasala na yandi disolo, kansi nge lenda yika mpi muntu ya tatu. Kana mwana ya nzo-nkanda mosi melomba muntu mosi yina yandi kemona nde yandi mefwana sambu na kadre mosi, nge fwete ndima yo.

Banzo-Nkanda Yankaka. Kana ntalu ya bana ya nzo-nkanda yina mesonikisaka bazina meluta 50, beno lenda sadila banzo-nkanda yankaka na bisika yankaka na kati ya Nzo ya Kimfumu sambu na masolo ya bana ya nzo-nkanda. Mutindu beno kesalaka na bwala na beno, beno lenda sala mutindu yai sambu na masolo yonso ya bana ya nzo-nkanda to sambu na masolo zole ya nsuka mpamba.

Konso nzo-nkanda yankaka fwete vanda na muntu ya kufwana ya kepesaka bandongisila, kuluta mbote nkuluntu mosi. Kansi kana yo kele mfunu, nsadi ya kisalu yina mefwana mpenza lenda sala yo. Bankuluntu bantu fwete pona bantu yina tatwadisaka banzo-nkanda yango. Nkengi na nzo-nkanda fwete salaka kumosi ti bantu yina ketwadisa banzo-nkanda yina yankaka sambu bo landa mbote kuyela ya bana ya nzo-nkanda ata bo tasala masolo na bo yina melanda na nzo-nkanda yankaka.

Nzo-Nkanda ya Kulonguka Kutanga. Kana bankuluntu kumona nde bantu yankaka na dibundu na beno kele na mfunu ya kulonguka kutanga na ndinga yina beno kesadilaka na dibundu na beno, beno lenda kangula mpi nzo-nkanda yai na kuwakana ti Nzo-Nkanda ya Kisalu ya Teokrasi. Beno lenda longa bo kutanga mpi kusonika, to lukanu ya nzo-nkanda yango lenda vanda ya kutomisa mutindu na bo ya kutanga.

Yo kelomba ve nde beno sala banzo-nkanda yai kaka na ntangu masolo ya bana ya nzo-nkanda ke na kusalama na Nzo-Nkanda ya Kisalu ya Teokrasi. Sambu na kusadisa bo mbotembote, yo lenda lomba ntangu mwa mingi kuluta ntangu yina nzo-nkanda kesalamaka. Bankuluntu ya dibundu lenda pona malongi yina bana ya nzo-nkanda yina kele na yo mfunu mpi ntangu ya kulonga bo. Kana mpila kele, beno lenda yidika mambu na mpila nde bana ya nzo-nkanda kulonguka na kimvuka bo yonso to kulonga mwana ya nzo-nkanda mosi-mosi.

Yo kelomba longi mosi ya kufwana. Yo kele mbote nde beno pesa mukumba yai na mpangi mosi ya bakala yina mezaba kutanga mbote mpi yina mezaba mbote ndinga ya beno kesadilaka. Kana mpangi ya bakala ya kufwana kele ve, bankuluntu lenda lomba na mpangi mosi ya nkento ya kufwana mpi ya kepesaka mbandu ya mbote na kusadisa bampangi. Yandi fwete lwata kitambala na ntangu yandi kelonga na nzo-nkanda yai.​—1 Kor. 11:3-10; 1 Tim. 2:11, 12.

Kamukanda Longuka Kutanga mpi Kusonika mebasikaka na bandinga mingi. Bo salaka yo sambu na kulonga bantu kutanga mpi kusonika. Beno lenda sadila mpi mikanda yankaka sambu na kulonga na nzo-nkanda yai, kansi beno fwete landa kiteso ya mayele ya kutanga ya bana ya nzo-nkanda yina mesonikisa. Kana bana ya nzo-nkanda yango metomisa mpenza kutanga na bo, nkengi na nzo-nkanda fwete syamisa bo na kusala masolo na Nzo-Nkanda ya Kisalu ya Teokrasi.

Sambu nge kele nkengi na Nzo-Nkanda ya Kisalu ya Teokrasi, nge lenda sadisa mpenza dibundu na kubaka mambote mingi na nzo-nkanda yai. Kudibongisaka mbote, mpi na kuwakana ti bandongisila yina kele na Roma 12:6-8, baka mukumba na nge bonso kisalu mosi ya kitoko ya Nzambi mepesa nge.