Landa Mbandu ya Lukwikilu na Bo
1. Banda na mposo ya Oktobri 19, nki mukanda beto ta tadila na Kulonguka ya Biblia ya Dibundu?
1 Banda na mposo ya Oktobri 19, 2015, beto ta yantika kulonguka mukanda Landa Mbandu ya Lukwikilu na Bo na Kulonguka ya Biblia ya Dibundu. Mukanda yai ke tubila masolo ya Biblia ya bantu 14, disongidila babakala mpi bankento ya lukwikilu. Bo sonikaka mukanda yai sambu yo sadisa beto na kumona na mabanza mutindu bantu yai ya kwikama kutanaka ti bampasi ntangu bo vandaka kusadila Yehowa. Diaka, masolo ya mukanda yai ke pesa beto malongi ya ta sadisa beto bubu yai.—Baeb. 6:12.
2. Tendula mambu yina kele na kati ya mukanda Landa Mbandu ya Lukwikilu na Bo.
2 Mambu Yina Kele na Kati: Mukanda yai kele ti badati mpi bakarte sambu na kusadisa beto na kuzaba ntangu mpi kisika yina konso muntu zingaka. Diaka, konso kapu kele ti kitini “Mambu ya Kuyindulula . . .” Kitini yai ta sadisa beto na kuyindulula masolo ya Biblia mpi na kusadila malongi ya beto me baka. Yo kele mpi ti bifwanisu ya kitoko yina ta sadisa beto na kuyindula masolo yango.
3. Inki beto lenda sala sambu na kubaka mambote ntangu beto ke longuka mukanda yai?
3 Mambote Yina Nge Lenda Baka: Mukanda ya me katuka na Nto-Kimvuka ke siamisa beto na bangogo yai: “Sadila mayele na nge ya kuyindula mpi biwilu na nge. Meka kuwa mutindu bantu yina Biblia ke tubila vandaka kuwa, mpi meka na kumona mambu mutindu bo monaka. Fwanisa mutindu bo salaka mambu ntangu bo kutanaka na diambu mosi buna ti mutindu yina nge zolaka kusala yo.” Kusadila mayele na nge ya kuyindula ke tendula ve kukwenda ntama na mabanza, kansi yo ke tendula kuyindula mambu yina masolo ya kupemama ke tuba mpi kuditula na kisika ya bantu yango. Sambu na kusala mutindu yai, yo ke lombaka kubaka ntangu sambu na kuyindulula. (Neh. 8:8) Kana mambu ya beto ke longuka me yantika na kati ya kapu, ntwadisi ta baka basegonde 30 to munuta mosi sambu na kuvutukila mambu yina beto longukaka na mposo ya me luta. Kana mambu ya beto ke longuka kele ve ti kitini “Mambu ya Kuyindulula . . . ,” ntwadisi lenda yula ngiufula mosi to bangiufula zole ya mvutukilu sambu na kusukisa disolo.
4. Sambu na nki yo ke lomba nde beto longuka mukanda Landa Mbandu ya Lukwikilu na Bo?
4 Beto ke zinga na nsi-ntoto ya ke sosa kubebisa mpi kulembisa lukwikilu na beto konso kilumbu. Masolo ya kele na mukanda yai mpi yina ke basikaka mbala na mbala na Nzozulu ya Nkengi kele dikabu ya Yehowa me pesaka beto sambu na kukumisa lukwikilu na beto ngolo. (Yak. 1:17) Beto ta baka mambote ya mukanda yai kana beto ke vukana mbala na mbala na Kulonguka ya Biblia ya Dibundu mpi ke pesa bamvutu.