“Polo Pesaka Nzambi Mersi mpi Yandi Bakaka Kikesa”

Ntangu bampangi ya dibundu ya Roma waka nde Polo ke kwisa, bo tindaka bampangi ya nkaka na kukwenda kukutana ti yandi na nzila, bo salaka kiteso ya bakilometre 64. Inki mutindu bibansa yina bo salaka simbaka ntima ya Polo? Biblia ke tuba nde “Ntangu Polo monaka bo, yandi pesaka Nzambi matondo mpi bakaka kikesa.” (Bis 28:15) Ata Polo vandaka kupesa bampangi ya mabundu yina yandi vandaka kutala kikesa, kansi ntangu yandi vandaka na boloko, bampangi bantu pesaka yandi kikesa.—2Bk 13:10.

Bubu yai mpi bankengi ya nziunga ke kwendaka kutala mabundu sambu na kupesa bampangi kikesa. Bonso bansadi yonso ya Nzambi, bantangu ya nkaka bankengi ya nziunga ke lembaka nitu, ke vandaka ti basusi mpi ke kudiyangisaka. Ntangu nkengi ya nziunga mpi nkento na yandi ta kwisa kutala diaka dibundu na beno, nki mutindu beno lenda siamisa bo sambu beno “pesana kikesa”?—Bar 1:11, 12.

• 

  Kwendaka na balukutakanu ya kisalu ya kusamuna. Kana bansamuni ke sala bibansa sambu na kusamuna mingi na mposo ya mfunu, yo ke pesaka nkengi ya nziunga kikesa. (1Te 1:2, 3; 2:20) Beto lenda siamisa bampangi na kusala kisalu ya kimupasudi-nzila nsadisi na nsungi ya viziti ya nkengi ya nziunga. Keti nge lenda pesa zina sambu na kusamuna ti nkengi ya nziunga mpi nkento na yandi to kunata mosi na kati na bo na longoki na nge ya Biblia? Bo ke vandaka na kiese ya kusamuna ti bampangi mingi mpi bansamuni ya mpa yina lenda mona bonso nde bo ta kuka ve kusamuna.

• 

  Monisa kikalulu ya kuyamba. Keti nge lenda pesa zina sambu na kupesa nkengi ya nziunga kisika ya kulala to madia? Nkengi ya nziunga mpi nkento na yandi ta mona nde beno ke zolaka bo. Bo ke lombaka beto ve na kusadila bo mambu ya nene.—Luk 10:38-42.

• 

  Landa lutwadisu mpi bandongisila na yandi. Nkengi ya nziunga ke sadisaka beto kibeni na kubakisa mutindu beto lenda tomisa kisalu yina Yehowa me pesaka beto. Bantangu ya nkaka yandi lenda sungika beto. (1Bk 5:1-5) Nkengi ya nziunga ke waka kiese ntangu beto ke monisaka bulemfu mpi luzitu.—Ebr 13:17.

• 

  Monisa ntonda. Songa nkengi ya nziunga mpi nkento na yandi mambote yina nge me baka na viziti na bo. Nge lenda songa bo na munoko to na nzila ya mukanda.—Kol 3:15.