Baleke, Beno Vanda “Kikesa Sambu na Bisalu ya Mbote”

Na mukanda yina Polo sonikilaka Tito na nsadisa ya mpeve santu, yandi sonikaka nde baleke ti Tito mpi, fwete sala ngolo sambu na kuvanda “mbandu na bisalu ya mbote na mambu yonso.” (Tit 2:6, 7) Na nima kaka na kapu yina, Polo monisaka nde Yezu ta tula bansadi ya Yehowa bunkete sambu bo vanda “kikesa sambu na bisalu ya mbote.” (Tit 2:14) Kisalu ya kusamuna mpi ya kulonga nsangu ya Kimfumu ya Nzambi kele na kati ya bisalu yina ya mbote. Kana nge kele leke, keti nge lenda sadila ngolo na nge sambu na kukuma mupasudi-nzila nsadisi to ya ntangu yonso?—Bin 20:29.

Kana nge ke zola kusala kisalu ya kimupasudi-nzila, nge fwete yidika manaka na nge mbote sambu na kusala yo. (Luk 14:28-30) Mu mbandu, nki mutindu nge ta lungisa bampusa na nge ya kinsuni ntangu nge ke sala kisalu ya ntangu yonso? Nki mutindu nge ta lungisa bangunga yina bo ke lombaka bapasudi-nzila? Samba Yehowa sambu yandi sadisa nge. (Nk 37:5) Solula ti bibuti na nge mpi bapasudi-nzila yina ke salaka kisalu na bo mbote sambu bo sadisa nge na manaka yina nge me sala. Na nima lungisa lukanu na nge. Ya kieleka, Yehowa ta sakumuna bikesa yina nge ke sala na kisalu na yandi!

SONGA VIDEO BALEKE YINA KE KUMISAKA YEHOWA, MPI NA NIMA BENO PESA BAMVUTU NA BANGIUFULA YAI:

• Inki bampasi bampangi ya nkaka nungaka sambu na kukuma bapasudi-nzila, mpi nki mutindu bo nungaka yo?

• Inki mutindu bibuti lenda sadisa bana na bo na kukuma bapasudi-nzila ya ntangu yonso?

• Sambu na nki kuvanda ti manaka ya mbote ya kusamuna kele mfunu?

• Inki mutindu bampangi ya dibundu lenda pesa bapasudi-nzila kikesa mpi kusadisa bo?

• Inki balusakumunu bapasudi-nzila ke bakaka?