Nzambi mpi Kristu Ta Pesa Beto Kimpwanza na Bilumbu ya Ke Kwisa

Inki bampasi nge ke kutanaka ti yo konso kilumbu? Keti nge kele mfumu ya dibuta mpi nge kele ti mambu mingi ya kusala? Keti nge kele kibuti kaka mosi mpi ke nwanaka sambu na kusansa dibuta na nge? Keti nge kele toko yina banduku ya nzo-nkanda ke pesaka mpasi? Keti sante na nge kele ve mbote to nge ke kutana ti bampasi yina kimununu ke nataka? Bantu yonso ke kutana ti bampasi. Bakristu mingi ke kutana ti bampasi mingi na mbala mosi. Ata mpidina, beto me zaba nde ntama mingi ve, Yehowa ta manisa bampasi yai.—2Bk 4:16-18.

Na ntwala nde mambu yango kusalama, beto ke bakaka kikesa ntangu beto ke zabaka nde Yehowa ke bakisaka bampasi na beto, ke sepelaka ti kwikama na beto mpi kukanga ntima na beto mpi nde yandi ta sakumuna beto mingi. (Yer 29:11, 12) Yezu mpi ke tudilaka beto dikebi. Kana beto ke lungisa mikumba na beto ya Bukristu, yandi ke sila beto nde: “Mono kele ti beno.” (Mat 28:20) Ntangu beto ke yindululaka kimpwanza yina Kimfumu ya Nzambi ta pesa beto, beto ke kumisaka kivuvu na beto ngolo mpi lukanu na beto ya kukanga ntima na bampasi ke kumaka diaka ngolo.—Bar 8:19-21.

SONGA VIDEO SAMBU MUPEPE YA NGOLO KE KWISA, BETO TULA KAKA DIKEBI NA YEZU!—BALUSAKUMUNU YINA KIMFUMU TA PESA NA BILUMBU YA KE KWISA, MPI NA NIMA BENO PESA BAMVUTU NA BANGIUFULA YAI:

• Inki mutindu bantu kabwanaka ti Nzambi mpi nki mambu yo me nataka?

• Inki mambote bantu yina kele ya kwikama na Yehowa ta baka?

• Inki mutindu beto lenda ndima nde mambu yai ya mbote ta salama?

• Inki mambu ya mbote nge ke vingila kumona na nsi-ntoto ya mpa?