ZINGA MUTINDU BAKRISTU FWETE ZINGA
Yehowa Ke Sadisaka Beto Ntangu Beto Ke Kutanaka ti Bampasi
Beto ke kutana ti bampasi mingi ya ngolo na bilumbu yai ya nsuka. Bantangu ya nkaka, beto lenda yindula nde beto ta kuka ve kukangila yo ntima. Kansi kana beto ke landa kukangama kaka na Yehowa, yandi ta sadisa beto na kukanga ntima ata na bampasi ya kuluta ngolo. (Yez 43:2, 4) Inki lenda sadisa beto na kukangama kaka na Yehowa ntangu beto ke kutana ti bampasi?
Kisambu. Ntangu beto ke songaka Yehowa mambu yonso yina kele na ntima na beto, yandi ke pesaka beto ngemba mpi ngolo ya kukanga ntima.—Fil 4:6, 7; 1Te 5:17.
Balukutakanu. Bubu yai, beto kele ti mfunu mingi ya madia ya kimpeve mpi ya kinduku yina beto ke taka ti bampangi na nzila ya balukutakanu. (Ebr 10:24, 25) Ntangu beto ke yilamaka sambu na balukutakanu ya dibundu, ntangu beto ke kwendaka na balukutakanu yango mpi ke pesaka bamvutu mpi bakomantere, beto ke bakaka mambote mingi na nsadisa ya mpeve santu ya Yehowa.—Kus 2:29.
Kisalu ya kulonga nsangu ya mbote. Kana beto ke sala yonso yina beto lenda sala sambu na kulanda kulonga nsangu ya mbote mingi, beto ta tula dikebi na mambu ya mbote kukonda mpasi. Kinduku na beto ti Yehowa mpi ti bampangi ta kuma ngolo.—1Bk 3:5-10.
TALA VIDEO YEHOWA TA SADISA NGE MPI NA NIMA BENO PESA BAMVUTU NA BANGIUFULA YAI:
Inki sadisaka mpangi Malu na kukangama kaka na Yehowa ntangu yandi kutanaka ti bampasi?
Bonso mpangi Malu, nki mutindu bangogo yina kele na Nkunga 34:18 lenda pesa beto kikesa ntangu beto ke kutana ti bampasi?
Inki mutindu disolo ya mpangi Malu ke ndimisa beto nde Yehowa ke pesaka beto “ngolo yina me luta ngolo ya bantu” ntangu beto ke kutanaka ti bampasi?—2Bk 4:7