Mutindu Yehowa Ke Sadisaka Beto na Kukanga Ntima na Bampasi

1. Sambu na nki yo ke lomba nde beto kanga ntima mpi nani ta sadisa beto? (1 Piere 5:10)

NA BILUMBU yai ya nsuka ya mpasi mingi kibeni, yo ke lomba mpenza nde bansadi ya Yehowa kukanga ntima na bampasi. Bankaka na kati na bo ke belaka maladi mosi ya ngolo banda ntama, bankaka kele na mpasi sambu muntu mosi ya bo ke zolaka me fwa mpi bo ke telemina bankaka diaka na bantu ya mabuta na bo to na guvernema. (Mat. 10:18, 36, 37) Ata nge ke kutana ti konso mpasi yina, zaba nde Yehowa ta sadisa nge na kukangila yo ntima.​—Tanga 1 Piere 5:10.

2. Ngolo ya kukanga ntima ke katukaka na nani?

² Kukanga ntima ke tendula kukangama kaka na Yehowa mpi kulanda kusadila yandi na kiese ata ntangu beto ke kutana ti bampasi, bantu ke niokula beto to beto ke kutana ti mpukumuna ya kusala disumu. Sambu na kukanga ntima, beto fwete ndima kibeni nde mambu ta bonga na bilumbu ke kwisa. Beto lenda kuka ve kukanga ntima na ngolo na beto mosi, kansi Yehowa muntu ke pesaka beto “ngolo yina me luta ngolo ya bantu” sambu na kusadisa beto. (2 Bak. 4:7) Na disolo yai, beto ta tubila bima iya yina Yehowa me pesaka beto sambu na kusadisa beto na kukanga ntima na bampasi. Beto ta mona mpi mambu yina beto fwete sala sambu na kubakila yo mambote.

KISAMBU

3. Sambu na nki beto ke tuba nde kisambu kele kima ya kuyituka?

³ Yehowa me salaka kima mosi ya kuyituka sambu na kusadisa beto na kukanga ntima. Yandi me salaka nde beto solula ti yandi mpi yandi widikila beto ata beto kele bantu ya kukonda kukuka. (Baeb. 4:16) Yindula diambu yai: Beto lenda samba Yehowa na konso ntangu yina mpi sambu na konso kima yina. Yehowa ke waka bisambu na beto ata beto ke samba yandi na konso ndinga yina, ata beto kele na konso kisika yina, nkutu ata beto kele kaka beto mosi na kisika ya ntama mpenza to na boloko. (Yon. 2:1, 2; Bis. 16:25, 26) Kana beto ke kudiyangisa mingi mpi beto ke kuka ve kusonga Yehowa mambu yina ke yangisa beto, yandi ke bakisaka kaka mambu yina beto ke zola kutuba. (Bar. 8:26, 27) Ya kieleka, kisambu kele kibeni kima ya kuyituka!

4. Sambu na nki beto ke tuba nde bisambu yina beto ke salaka sambu na kulomba Yehowa na kusadisa beto na kukanga ntima ke wakana ti luzolo na yandi?

⁴ Yehowa ke ndimisa beto na Ndinga na yandi nde “konso kima yina beto ke lomba na kuwakana ti luzolo na yandi, yandi ke waka beto.” (1 Yoa. 5:14) Keti beto lenda lomba Yehowa na kusadisa beto na kukanga ntima? Ee! Yo ke wakana ti luzolo na yandi. Sambu na nki beto ke tuba mpidina? Ntangu beto ke kangaka ntima na bampasi, beto ke pesaka Yehowa dibaku ya kupesa mvutu na Satana Diabulu, muntu yina ke sosilaka yandi. (Bing. 27:11) Katula yo, Biblia ke tubaka nde Yehowa ke vandaka ti nzala ya ngolo ya “kusonga ngolo na yandi sambu na bantu yina ntima na bo kele ya mvimba na yandi.” (2 Bans. 16:9) Yo yina, beto fwete ndima kibeni nde Yehowa kele ti ngolo mpi nzala ya kusadisa beto na kukanga ntima.​—Yez. 30:18; 41:10; Luka 11:13.

5. Inki mutindu kisambu ke sadisaka beto na kuvanda na ngemba? (Yezaya 26:3)

⁵ Biblia ke tuba nde ntangu beto ke samba Yehowa sambu na mambu yina ke yangisa beto, ‘ngemba ya Nzambi yina me luta mayele yonso ya kubakisa mambu ta tanina bantima na beto mpi mabanza na beto.’ (Bafil. 4:7) Beto tala mambu yina yo ke tendula. Bantu yina ke sambilaka ve Yehowa ke kutanaka mpi ti bampasi. Yo yina, mingi na kati na bo ke salaka mambu ya mutindu na mutindu sambu na kukuma na ngemba. Mambu ya nkaka yina bo ke salaka sambu na kukuma na ngemba ke tulaka bo kibeni na kigonsa mpi yo lenda sala nkutu nde bademo kuyala bo. (Tala mpi Matayo 12:43-45.) Kansi, ngemba yina Yehowa ke pesaka beto kana beto me samba yandi, me luta na ntama kibeni ngemba yina muntu lenda kuma ti yo kana yandi me sala mambu yina. Ntangu beto ke sambaka Yehowa, beto ke monisaka yandi nde beto ke tudilaka yandi ntima ya mvimba. Yo yina, yandi ke pesaka beto “ngemba ya ntangu yonso.” (Tanga Yezaya 26:3.) Kima mosi yina Yehowa ke salaka sambu na kupesa beto ngemba yango kele mutindu yandi ke sadisaka beto na kuyibuka baverse yina ke pesaka beto kikesa. Baverse yango ke sadisaka beto na kuvanda na ngemba sambu yo ke yibusaka beto nde Yehowa ke zolaka beto mingi mpi yandi ke zolaka kusadisa beto.​—Nk. 62:1, 2.

6. Tubila mambu yina nge lenda sala sambu kisambu kusadisa nge mingi kibeni. (Tala mpi kifwanisu.)

⁶ Mambu yina nge lenda sala. Ntangu nge ke kutana ti mpasi mosi, “losila Yehowa kizitu na nge” mpi lomba yandi na kusadisa nge na kuvanda na ngemba. (Nk. 55:22) Lomba yandi mayele yina ta sadisa nge na kuzaba mambu yina nge fwete sala sambu na kukanga ntima na mpasi yango. (Bing. 2:10, 11) Ntangu nge ke samba Yehowa sambu yandi sadisa nge na kukanga ntima, kuvila mpi ve kupesa yandi mersi. (Bafil. 4:6) Yindula mambu yina Yehowa ke sala konso kilumbu sambu na kusadisa nge na kukanga ntima mpi pesa yandi mersi sambu na yo. Pesa yandi mpi mersi sambu na bima yonso ya mbote yina yandi ke pesa nge. Kubika ve nde bampasi yina nge ke kutana ti yo kukanga nge meso sambu nge mona ve mambu mingi yina Yehowa me sala dezia sambu na kusadisa nge.​—Nk. 16:5, 6.

NDINGA YA NZAMBI

7. Inki mutindu kulonguka Biblia lenda sadisa beto na kukanga ntima na bampasi?

⁷ Yehowa me pesaka beto Ndinga na yandi sambu na kusadisa beto na kukanga ntima. Biblia me fuluka ti baverse mingi yina ke ndimisaka beto nde Yehowa ke sadisaka beto. Beto tadila mbandu mosi. Matayo 6:8 ke tuba nde: “Tata na beno ke zabaka mambu yina beno kele na yo mfunu na ntwala nkutu nde beno lomba yandi yo.” Yezu muntu tubaka mambu yai mpi yandi ke zaba Yehowa mbote mingi kuluta bantu yonso. Yo yina beto fwete ndima kibeni nde ntangu beto ke kutana ti bampasi, Yehowa ke zaba mambu yina beto kele ti yo mfunu mpi yandi ta sadisa beto. Biblia kele ti balusilu mingi ya Yehowa yina lenda sadisa beto na kubaka kikesa sambu na kukanga ntima na bampasi.​—Nk. 94:19.

8. (a) Tubila munsiku mosi ya Biblia yina lenda sadisa beto na kukanga ntima. (b) Inki lenda sadisa beto na kuyibuka kukonda mpasi minsiku ya Biblia?

⁸ Minsiku ya Biblia lenda sadisa beto na kukanga ntima. Yo kele ti malongi yina lenda pesa beto mayele sambu na kubaka balukanu ya mbote. (Bing. 2:6, 7) Mu mbandu, Biblia ke songa beto na kudiyangisa ve sambu na mambu yina lenda salama mbasi, kansi na kutudila Yehowa ntima konso kilumbu. (Mat. 6:34) Kana beto ke tanga Biblia konso kilumbu mpi ke yindula mingi mambu yina beto ke tanga, yo ta sadisa beto na kuyibuka kukonda mpasi minsiku ya Biblia ntangu yo ta lomba nde beto baka lukanu mosi to ntangu beto ke zola kuzaba mutindu ya kukanga ntima na mpasi mosi.

9. Inki mutindu masolo yina kele na Biblia lenda kumisa lukwikilu na beto ngolo na Yehowa mpi kundimisa beto nde yandi ta sadisa beto?

⁹ Biblia ke tubila mpi bambandu ya bantu mingi yina tudilaka Yehowa ntima mpi yandi sadisaka bo. (Baeb. 11:32-34; Yak. 5:17) Kana beto ke yindula mutindu Yehowa sadisaka bo, yo ta kumisa lukwikilu na beto ngolo mpi yo ta sadisa beto na kundima kibeni nde Yehowa kele “kitininu na beto mpi ngolo na beto, lusadisu yina beto lenda baka kukonda mpasi na bantangu ya mpasi.” (Nk. 46:1) Diaka, kana beto ke yindula mutindu bansadi ya Yehowa monisaka lukwikilu na bo na yandi mpi landaka kusadila yandi na bantangu ya mpasi, yo ta pesa beto kikesa ya kusala mpi mutindu mosi.​—Yak. 5:10, 11.

10. Inki nge lenda sala sambu Biblia kusadisa nge mingi kibeni?

¹⁰ Mambu yina nge lenda sala. Tanga Biblia konso kilumbu mpi sala liste ya baverse yina nge ke mona nde yo lenda sadisa nge. Konso kilumbu na suka, bampangi mingi ke tangaka verse ya kilumbu mpi bakomantere na yo ya kele na mukanda Fimpa Masonuku Konso Kilumbu. Yo ke sadisaka bo na kuvanda ti ngindu mosi ya ke pesa kikesa ya kuyindula kilumbu ya mvimba. Mpangi Mariea bakisaka nde mambu yai kele kieleka ntangu bo kangaka bibuti na yandi ti kansere kaka na ntangu mosi. Inki sadisaka yandi na kukanga ntima ntangu yandi vandaka kukeba bo na bangonda ya nsuka na ntwala nde bo fwa? Yandi ke tuba nde: “Konso suka, mono vandaka kutanga verse ya kilumbu na mukanda Fimpa Masonuku Konso Kilumbu mpi mono vandaka kuyindula yo mingi. Yo vandaka kusadisa mono konso kilumbu na kuyindula mambu ya me tala Yehowa mpi mambu ya kitoko yina yandi ke longaka beto na Ndinga na yandi, na kisika ya kuyindula kaka bampasi yina mono vandaka kukutana ti yo.”​—Nk. 61:2.

BAMPANGI NA BETO BAKRISTU

11. Sambu na nki yo ke pesa kikesa na kuzaba nde beto kele ve beto mosi ntangu beto ke kanga ntima na bampasi?

¹¹ Yehowa me pesaka beto bampangi na ntoto ya mvimba sambu na kusadisa beto na kukanga ntima. Mutindu beto ke zabaka nde ‘kimvuka ya mvimba ya bampangi na beto na nsi-ntoto ke kutana ti bampasi ya mutindu mosi,’ ke ndimisaka beto nde beto kele ve beto mosi. (1 Pie. 5:9) Ya kieleka, beto fwete ndima nde konso mpasi yina beto ke kutana ti yo, bampangi na beto na ntoto ya mvimba ke kutana mpi ti mambu ya mutindu mosi mpi bo ke landa kukangila yo ntima. Yo ke tendula nde beto mpi lenda kangila yo ntima.​—Bis. 14:22.

12. Inki mutindu bampangi lenda sadisa beto mpi nki beto lenda sala sambu na bo? (2 Bakorinto 1:3, 4)

¹² Bampangi na beto Bakristu lenda pesa beto kikesa ntangu beto ke kanga ntima na bampasi. Bampangi pesaka mpi ntumwa Polo kikesa. Na mikanda na yandi, yandi tangaka bazina ya bampangi yina sadisaka yandi ntangu bo kangaka yandi mpi bo tulaka yandi na nzo mosi yina yandi vandaka kubasika ve. Yandi pesaka bo mersi sambu na yo. Bampangi yango pesaka yandi kikesa mpi bima yina yandi vandaka ti yo mfunu. (Bafil. 2:25, 29, 30; Bakol. 4:10, 11) Bampangi lenda sadisa beto na mutindu mosi mpi bubu yai. Bo lenda sadisa beto na kukanga ntima ntangu beto ke kutana ti bampasi. Beto mpi lenda sadisa bo ntangu bo ke kutana ti bampasi​—Tanga 2 Bakorinto 1:3, 4.

13. Inki sadisaka mpangi-nkento Maya na kukanga ntima?

¹³ Bampangi pesaka mpangi-nkento Maya na Russie kikesa mingi. Na 2020, bapolisie kotaka na nzo na yandi na kingolo-ngolo sambu na kusala ba-anketi. Na nima, bo sambisaka yandi na tribinale sambu yandi songaka bantu ya nkaka balukwikilu na yandi. Mpangi Maya ke tuba nde: “Na ntangu yina, mono vandaka kibeni ya kulemba, mono vandaka kudiyangisa mpi mono vandaka na mawa. Kansi bampangi vandaka kubinga mono na telefone, kusonikila mono ba message mpi kusonikila mono mikanda. Bo vandaka kundimisa mono nde bo ke zolaka mono kibeni. Mono vandaka kuzaba dezia banda ntama nde mono ke vandaka na dibuta ya nene ya bampangi yina ke zolaka mono. Kansi banda na 2020, mono me kumaka kundima diaka mambu yai mingi kuluta.”

14. Inki beto lenda sala sambu na kubaka mambote na lusadisu ya bampangi? (Tala mpi kifwanisu.)

¹⁴ Mambu yina nge lenda sala. Landa kukangama ti bampangi ntangu nge ke kanga ntima na bampasi. Kuwa ve nsoni ya kulomba bankuluntu lusadisu. Bo lenda vanda “kisika ya lutaninu sambu na mupepe, kisika ya kubumbana mvula ya mupepe ya ngolo.” (Yez. 32:2, noti na nsi ya lutiti.) Kuvila ve nde bampangi mpi ke kutana ti bampasi. Yo yina kana nge sadila muntu mosi diambu ya mbote, nge ta vanda na kiese mpi yo ta sadisa nge na kukanga ntima na bampasi yina nge ke kutana ti yo.​—Bis. 20:35.

KIVUVU NA BETO

15. Inki mutindu kivuvu sadisaka Yezu mpi nki mutindu yo ke sadisaka beto? (Baebreo 12:2)

¹⁵ Yehowa me pesaka beto kivuvu ya mbote yina ta lungana kibeni mpi yo ke sadisaka beto na kukanga ntima. (Bar. 15:13) Yindula mutindu kivuvu sadisaka Yezu na kukanga ntima na kilumbu na yandi ya kuluta mpasi awa na ntoto. (Tanga Baebreo 12:2.) Yezu zabaka nde kana yandi landa kukangama kaka na Yehowa, yandi ta monisa nde mambu yonso yina Satana tubaka sambu na Yehowa kele ya luvunu mpi nde Yehowa me fwana kibeni na kubaka lukumu. Yezu vandaka mpi kuvingila ti nzala ya ngolo ntangu yina yandi ta vutuka na Tata na yandi na zulu mpi ntangu yina yandi ta kuma Ntotila mpi ta yala ti Bakristu 144 000 yina bo me tulaka mafuta. Mutindu mosi mpi, kivuvu na beto ya kuzinga mvula na mvula na nsi-ntoto ya mpa ke sadisaka beto na kukanga ntima na konso mpasi yina beto ke kutana ti yo na nsi-ntoto yai ya Satana.

16. Inki mutindu kivuvu sadisaka mpangi-nkento mosi na kukanga ntima mpi mbandu na yandi ke longa beto nki?

¹⁶ Beto tala mutindu kivuvu ya kuzinga na nsi-ntoto ya mpa sadisaka mpangi-nkento Alla na Russie. Bo kangaka bakala na yandi mpi bo tulaka yandi na boloko na ntwala nde bo sambisa yandi. Mpangi Alla ke tuba nde: “Kusamba sambu na kivuvu na mono mpi kulanda kuyindula yo mingi ke sadisaka mono na kuvanda kikesa. Mono ke zabaka nde mambu ya mbote ta salama na nima ya bampasi yai yonso. Yehowa ta nunga bambeni na yandi mpi yandi ta sakumuna beto.”

17. Inki mutindu beto lenda monisa ntonda sambu na kivuvu ya kitoko yina Yehowa me pesaka beto? (Tala mpi kifwanisu.)

¹⁷ Mambu yina nge lenda sala. Baka ntangu ya kuyindula kivuvu ya kitoko yina Yehowa me silaka beto. Kudimona na nsi-ntoto ya mpa mpi yindula luzingu ya mbote kibeni yina nge ta vanda ti yo ti dibuta na nge mpi banduku na nge. Diaka, konso mpasi yina beto ke kutana ti yo bubu yai kele sambu na ‘ntangu fioti mpi yo kele ve kizitu’ kana beto fwanisa yo ti luzingu ya mvula na mvula na Paladisu. (2 Bak. 4:17) Sala mpi yonso sambu na kusonga bantu ya nkaka mambu yina nge ke kwikilaka. Yindula mutindu yo lenda vandila bo mpasi na kukanga ntima na bampasi na nsi-ntoto yai ya Satana sambu bo ke zaba ve mambu ya mbote yina Yehowa me silaka beto sambu na bilumbu ke kwisa. Nge lenda pesa bo nzala ya kulonguka mambu mingi ya me tala Kimfumu ya Yehowa mpi balusilu na yandi ata nge me solula ti bo ntangu fioti mpamba.

18. Sambu na nki beto fwete tula ntima na balusilu ya Yehowa?

¹⁸ Yobi kangaka ntima na bampasi mingi mpi na nima yandi songaka Yehowa nde: “Ntangu yai, mono me zaba nde nge lenda sala mambu yonso mpi ata kima mosi ve ya nge ke yindula kusala kele mpasi sambu na nge.” (Yobi 42:2) Mutindu Yobi bakisaka yo, ata kima mosi ve lenda kanga Yehowa nzila ya kulungisa balusilu na yandi. Kana beto ke yibuka nde Yehowa ta lungisa balusilu na yandi mpi ta katula bampasi yina beto ke kutana ti yo, yo ta pesa beto ngolo ya kukanga ntima. Beto baka mbandu yai: Yindula nde mama mosi ke bela ngolo mpi yandi me mona minganga mingi kansi ata mosi ve me kuka kubelula yandi. Na nima, yandi me mona munganga mosi ya mbote yina me songa yandi maladi yina ke yangisa yandi mpi me tendudila yandi mutindu yandi ta sansa yandi. Na mbala mosi yandi me kuma na kiese ata yandi me zaba nde yo ta baka mwa ntangu sambu yandi beluka. Ntangu yai, yo kele pete sambu na yandi na kukanga ntima sambu yandi me zaba nde yandi ta beluka. Mutindu mosi mpi, beto lenda landa kukanga ntima sambu beto ke zabaka nde lusilu ya Yehowa sambu na Paladisu ta lungana.

19. Inki beto kele ti yo mfunu sambu na kulanda kukanga ntima?

¹⁹ Mutindu beto me mona yo, Yehowa me pesaka beto kisambu, Ndinga na yandi, bampangi na beto mpi kivuvu na beto sambu na kusadisa beto na kukanga ntima na bampasi. Kana beto ke sadila mbote bima yai yonso ya Yehowa me pesaka beto, yandi ta sadisa beto na kulanda kukanga ntima tii kilumbu yina yandi ta fwa nsi-ntoto yai ya Satana mpi ta katula bampasi yonso na ntoto.​—Bafil. 4:13.