DISOLO YA KULONGUKA 26
NKUNGA 123 Lemfuka na Kwikama Yonso na Teokrasi
Ndima ti Kudikulumusa Mambu Yina Nge Me Zaba Ve
“Beto lenda bakisa ve Nkwa-Ngolo Yonso.”—YOBI 37:23.
NA BUNKUFI
Ata beto ke zabaka ve mambu yonso yina ta salama na bilumbu ke kwisa, beto lenda kanga ntima kana beto ke tula dikebi ya mingi na mambu yina beto me zaba mpi ke tudila Yehowa ntima.
1. Inki makuki Yehowa me salaka beto ti yo mpi sambu na nki?
YEHOWA me salaka beto ti makuki ya kuyindula, ya kulonguka mambu, ya kubakisa yo mpi ya kusala mambu ti mayele. Sambu na nki yandi me salaka beto mutindu yai? Sambu yandi ke zolaka nde beto “zwa nzayilu ya Nzambi” mpi beto sadila mayele na beto ya kuyindula sambu na kubaka balukanu ya mbote.—Bing. 2:1-5; Bar. 12:1.
2. (a) Ata beto ke vandaka ti makuki ya kulonguka mambu mingi, nki beto fwete vila ve? (Yobi 37:23, 24) (Tala mpi kifwanisu.) (b) Inki mambote beto ta baka kana beto ke ndima ti kudikulumusa yonso nde beto ke zaba ve mambu yonso?
2 Ata beto ke vandaka ti makuki ya kulonguka mambu mingi, beto fwete vila ve nde beto ke zabaka ve mambu yonso. (Tanga Job 37:23, 24.) Beto tadila mbandu ya Yobi. Yehowa yulaka yandi bangiufula mingi yina sadisaka yandi na kubakisa nde yandi zabaka ve mambu mingi. Bangiufula yango sadisaka Yobi na kubakisa nde yandi fwete vanda ya kudikulumusa mpi kusoba bangindu na yandi. (Yobi 42:3-6) Beto ta baka mpi mambote kana beto ke ndima ti kudikulumusa yonso nde beto ke zaba ve mambu yonso. Yo ta sadisa beto na kutula ntima nde Yehowa ta sadisa beto na kubakisa mambu yina kele mpenza mfunu nde beto zaba sambu na kubaka balukanu ya mbote.—Bing. 2:6.
Bonso Yobi, beto ke bakaka mambote kana beto ke ndima nde kele ti mambu ya beto ke zabaka ve (Tala paragrafe 2)
3. Inki beto ta longuka na disolo yai?
3 Na disolo yai, beto ta tubila mwa mambu ya beto me zaba ve mpi bampasi yina kukonda kuzaba mambu yango ke nataka bantangu ya nkaka. Beto ta longuka mpi sambu na nki yo kele mbote mutindu beto ke zabaka ve mambu ya nkaka. Kulonguka mambu yai ta sadisa beto na kutula diaka ntima mingi nde Yehowa “Muntu yina kele ya kukuka na nzayilu” ke songaka beto kaka mambu yina kele mpenza mfunu nde beto zaba.—Yobi 37:16.
BETO KE ZABAKA VE NTANGU YINA NSUKA TA KWISA
4. Mutindu Matayo 24:36 ke monisa yo, tubila kima mosi yina beto ke zabaka ve.
4 Tanga Matayo 24:36. Beto ke zabaka ve ntangu yina nsuka ya nsi-ntoto yai ta kwisa. Nkutu ntangu Yezu vandaka na ntoto, yandi zabaka ve “kilumbu yina mpi [ntangu] yina” nsuka ta kwisa.a Na nima, Yezu songaka bantumwa na yandi nde Yehowa, Muntu Yina Ke Zitisaka Ntangu Mbote-Mbote, yandi mpamba muntu kele ti ‘kiyeka ya kutula’ bantangu yina mambu ya nkaka ta salama. (Bis. 1:6, 7) Yehowa me tulaka dezia ntangu yina nsuka ya nsi-ntoto yai ta kwisa, kansi beto lenda zaba kibeni ve ntangu yango.
5. Inki lenda kumina beto mutindu beto me zaba ve kilumbu yina nsuka ya nsi-ntoto yai ta kwisa?
5 Mambu yina Yezu tubaka ke monisa nde beto ke zabaka ve tii nki ntangu beto fwete landa kuvingila nsuka ya nsi-ntoto yai. Yo lenda sala nde beto kuma ntima zulu-zulu to nkutu kulemba nitu, mingi-mingi kana beto ke vingilaka dezia kilumbu ya Yehowa banda ntama. To mpi yo lenda vandila beto mpasi na kukanga ntima ntangu bantu ya mabuta na beto to bantu ya nkaka ke seka beto. (2 Pie. 3:3, 4) Beto lenda yindula nde kana beto me zaba kilumbu yina nsuka ya nsi-ntoto yai ta kwisa, yo ta vandila beto pete na kuvanda ntima-nda mpi na kukanga ntima ntangu bantu ke seka beto.
6. Sambu na nki yo kele mbote mutindu beto ke zabaka ve ntangu yina nsuka ya nsi-ntoto yai ta kwisa?
6 Mutindu Yehowa me songaka beto ve kilumbu yina nsuka ya nsi-ntoto yai ta kwisa, yo ke pesaka beto dibaku ya kumonisa nde beto ke sadilaka yandi sambu beto ke zolaka yandi mpi ke tudilaka yandi ntima. Beto ke sadilaka ve Yehowa ti ngindu ya kuyambula kusadila yandi na date mosi buna bonso nde lukwikilu na beto fwete mana ngala na date yango. Na kisika ya kutula ntete-ntete dikebi na ntangu yina “kilumbu ya Yehowa” ta kwisa, yo ta vanda mbote na kutula dikebi na mambote yina kilumbu yango ta natila beto. Kana beto sala mpidina, yo ta sadisa beto na kulanda kukumisa ngolo kinduku na beto ti Nzambi mpi beto ta sala yonso sambu na kusepedisa yandi.—2 Pie. 3:11, 12.
7. Inki mambu beto me zaba?
7 Yo kele mbote na kutula dikebi na mambu yina beto me zaba. Mu mbandu, beto me zaba nde bilumbu ya nsuka ya nsi-ntoto yai yantikaka na 1914. Yehowa me tulaka baprofesi mingi na Biblia yina ke monisaka nde bilumbu ya nsuka yantikaka na 1914 mpi yina tubilaka mambu mingi yina yantikaka kusalama na ntoto banda na mvula yina. Yo yina, beto ke ndimaka mpenza nde “kilumbu ya nene ya Yehowa kele pene-pene.” (Sef. 1:14) Beto ke zabaka mpi kisalu yina Yehowa ke lombaka beto na kusala, disongidila kuzabisa bantu mingi ‘nsangu ya mbote ya Kimfumu.’ (Mat. 24:14) Beto ke longaka nsangu yai ya mbote na bansi kiteso ya 240 mpi na bandinga kuluta 1 000. Sambu na kulonga nsangu ya mbote ti kikesa, beto ke vandaka ve ti mfunu ya kuzaba “kilumbu yina mpi [ntangu] yina” nsuka ta kwisa.
BETO KE ZABAKA VE MUTINDU YEHOWA LENDA SADISA BETO
8. Bangogo beto ‘ke zabaka ve kisalu ya Nzambi ya kieleka’ ke tendula nki? (Longi 11:5)
8 Yehowa lenda sala nde kima mosi kusalama to yandi lenda bika nde yo salama sambu na kulungisa luzolo na yandi. Kansi Biblia ke tubaka nde beto ke zabaka ve ntangu yonso “kisalu ya Nzambi ya kieleka.” (Tanga Longi 11:5.) Yo ke tendula nki? Yindula mambu yai: Tii bubu yai, bantu ya siansi ke bakisaka ve mbote-mbote mutindu mwana ke yelaka na divumu ya mama na yandi. Mutindu mosi mpi, beto ke bakisaka ve mbote-mbote sambu na nki Yehowa lenda bika nde kima mosi kusalama to mutindu yandi lenda sadisa beto mpenza.—Nk. 37:5.
9. Inki lenda kumina beto ntangu beto ke zaba ve mutindu Yehowa ta sadisa beto?
9 Ntangu beto ke zabaka ve mbote-mbote mutindu Yehowa ta sadisa beto, yo lenda sala nde beto vanda ti badute ya kubaka balukanu ya nkaka. Beto lenda vanda ti badute ya kundima kusala mambu ya nkaka ya mpasi sambu na kudipesa mingi na kisalu ya Yehowa, mu mbandu kuzinga kukonda mindondo to kukwenda na kisika yina mpusa ya bansamuni ya Kimfumu kele mingi. To beto lenda yindula nde Yehowa ke ndima beto diaka ve sambu beto ke lungisa ve balukanu na beto ya kimpeve, sambu beto ke mona ve mbuma ya mbote yina kisalu na beto ya ngolo ya kulonga nsangu ya mbote ke buta to sambu beto ke kutana ti bampasi na kisalu mosi na dibundu ya Yehowa.
10. Mutindu beto ke zabaka ve mambu yina Yehowa ta sala, ke sadisaka beto na kukuma ti nki bikalulu ya mfunu?
10 Mutindu beto ke zabaka ve mpenza mambu yina Yehowa ta sala sambu na kusadisa beto, ke sadisaka beto na kukuma ti bikalulu ya mfunu, mu mbandu kudikulumusa mpi kuzaba bandilu na beto. Yo ke sadisaka beto mpi na kubakisa nde bangindu mpi banzila ya Yehowa me luta ya beto na ntama kibeni. (Yez. 55:8, 9) Beto ke tudilaka mpi Yehowa ntima ya mvimba nde yandi ta sadisa beto na mutindu ya kuluta mbote kibeni. Ntangu kisalu na beto ya kulonga nsangu ya mbote to kisalu mosi ya beto ke sala na dibundu ya Yehowa me buta mbuma ya mbote, beto ke pesaka lukumu yonso na Yehowa. (Nk. 127:1; 1 Bak. 3:7) Ata ntangu mambu me salama ve mutindu beto yindulaka, beto fwete vila ve nde Yehowa ke monaka mambu yonso. Kana beto sala mpidina, beto ta vanda na ngemba. (Yez. 26:12) Beto ke salaka mambu yina beto lenda sala mpi beto ke landaka kutula ntima nde Yehowa ta landa kusadisa beto. Beto ke tulaka mpi ntima nde Yehowa ta pesa beto lutwadisu ya me fwana ata yandi me sala yo ve na mutindu ya kuyituka bonso na bantangu ya nkaka na ntangu ya ntama.—Bis. 16:6-10.
11. Tubila mambu ya mfunu yina beto me zaba.
11 Beto ke zabaka nde Yehowa ke vandaka ntangu yonso zola, lunungu mpi mayele. Beto ke zabaka mpi nde yandi ke bakaka na valere mingi mambu yonso ya mbote yina beto ke salaka sambu na yandi mpi sambu na bampangi na beto. Diaka, beto ke zabaka nde Yehowa ke sakumunaka ntangu yonso bantu yina ke kangamaka kaka na yandi.—Baeb. 11:6.
BETO KE ZABAKA VE MAMBU YINA TA SALAMA MBASI
12. Yakobo 4:13, 14 ke tuba nde beto ke zabaka ve nki?
12 Tanga Yakobo 4:13, 14. Kieleka ya mfunu kele nde beto ke zabaka ve mutindu luzingu na beto ta vanda mbasi. Na nsi-ntoto yai, “ntangu mpi mambu ya kukonda kukana” ke kuminaka beto yonso. (Lon. 9:11) Yo yina, beto ke zabaka ve kana mambu yina beto ke kana kusala ta nunga to nkutu kana beto ta vanda kaka na luzingu sambu na kulungisa yo.
13. Mambu ya kukonda kukana lenda sala nde beto kuma nki mutindu?
13 Mbala mingi, bampasi ke bwilaka beto na kintulumukina. Mambu ya mpasi ya kukonda kukana lenda soba mpenza luzingu na beto na mbala mosi mpi kusala nde beto kuma mawa-mawa mpi ti basusi. Diaka, kana mambu me salama ve mutindu beto vandaka kuyindula, beto lenda kuma kudiyangisa mingi mpi beto lenda lemba nitu. (Bing. 13:12) Mambu yai lenda sala nde beto kuma kudiyangisa konso ntangu sambu na mambu yina lenda kumina beto. Mpidina, yo lenda vandila beto mpasi na kukanga ntima mpi beto lenda vanda diaka ve na kiese.
14. Inki beto fwete sala sambu na kulanda kuvanda mpenza na kiese? (Tala mpi bifwanisu.)
14 Ntangu beto ke kangaka ntima na konso mpasi yina me kumina beto, beto ke monisaka nde beto ke sadilaka Yehowa Tata na beto ya zulu sambu beto ke zolaka yandi, kansi ve sambu na kusosa mambote na beto mosi. Biblia ke monisaka nde Yehowa ke taninaka beto ve na mambu yonso ya mpasi mpi nde yandi ke yidikaka ve na ntwala mambu yina ke kuminaka beto. Yehowa ke zabaka nde beto ta landa kuvanda na kiese kaka kana beto ke sosa lutwadisu na yandi mpi ke lemfukila yandi, kansi ve kana beto ke zaba mambu yina ta kumina beto. (Yer. 10:23) Kana beto ke sosa lutwadisu na yandi ntangu beto ke zola kubaka balukanu, yo kele bonso beto ke tuba nde: “Kana Yehowa kuzola, beto ta zinga mpi ta sala kima yai to kima yina.”—Yak. 4:15.
Kana beto ke sosa lutwadisu ya Yehowa mpi beto ke lemfukila yandi, yandi ta sadisa beto mpi ta tanina beto (Tala baparagrafe 14-15)b
15. Inki beto me zaba sambu na bilumbu ke kwisa?
15 Ata beto ke zabaka ve mambu yina ta salama mbasi, beto ke zabaka nde Yehowa me silaka beto luzingu ya mvula na mvula, yo vanda na zulu to awa na ntoto. Beto ke zabaka nde yandi lenda kusa ve ata fioti mpi nde ata kima mosi ve lenda kanga yandi nzila ya kulungisa balusilu na yandi yonso. (Tito 1:2) Yandi mpamba “ke tubaka na ntwala mambu yina ta salama, mpi tuka ntama mambu yina me salama ntete ve.” Mutindu yandi lungisaka mambu yonso yina yandi tubaka na ntwala na bilumbu me luta, yandi ta lungisa mpi mambu yonso yina yandi me silaka sambu na bilumbu ke kwisa. (Yez. 46:10) Beto ke zabaka kibeni nde ata kima mosi ve lenda kanga Yehowa nzila ya kuzola beto. (Bar. 8:35-39) Yandi ta pesa beto mayele, kikesa mpi ngolo ya me fwana sambu na kukanga ntima na konso mpasi yina lenda bwila beto. Beto ke tulaka ntima nde Yehowa ta sadisa beto mpi ta sakumuna beto.—Yer. 17:7, 8.
BETO LENDA BAKISA VE MBOTE-MBOTE MUTINDU YEHOWA KE ZABAKA BETO
16. Mutindu Nkunga 139:1-6 ke monisa yo, nki Yehowa ke zabaka mbote-mbote sambu na beto?
16 Tanga Nkunga 139:1-6. Ngangi na beto ke zabaka mambu yonso ya me tala beto. Yandi ke tudilaka beto dikebi ntangu yonso. Mu mbandu, yandi ke zabaka mutindu yandi me salaka beto mpi sambu na nki beto ke yindulaka to ke kudiwaka na mutindu mosi buna. Yandi ke zabaka mambu yina beto ke sosaka kutuba, mambu yina kele na bantima na beto, mambu yonso yina beto ke salaka mpi sambu na nki beto ke salaka yo. Mutindu ntotila Davidi bakisaka yo, Yehowa ke vandaka ntangu yonso ya kuyilama sambu na kusadisa beto na konso kisika yina beto kele. Yo ke yitukisa kibeni mutindu Yehowa, Mfumu ya Kuluta Nene mpi Ngangi nkwa-ngolo yonso ya zulu mpi ya ntoto, ke tudilaka beto dikebi mutindu yai! Davidi tubaka nde: “Nzayilu ya mutindu yai ke yitukisa mono mingi. Yo kele mingi kibeni yo yina mono lenda bakisa yo ve.”—Nk. 139:6, banoti na nsi ya lutiti.
17. Sambu na nki yo lenda vanda mpasi na kundima nde Yehowa ke zabaka beto mbote kibeni?
17 Mbala ya nkaka mutindu beto me yelaka na dibuta na beto, mutindu na beto ya kuzinga mpi mambu yina beto vandaka ntete kukwikila, lenda sala nde yo vandila beto mpasi na kundima nde Yehowa, Tata na beto ya zola, ke tudilaka beto dikebi. To masumu ya nene kibeni yina beto salaka na bilumbu me luta lenda pusa beto na kuyindula nde Yehowa lenda kuma ve ata fioti nduku na beto mpi nde yandi kele ntama kibeni ti beto. Bantangu ya nkaka, nkutu Davidi mpi yindulaka mutindu yai. (Nk. 38:18, 21) Katula yina, muntu yina ke sala bikesa na masonga yonso sambu na kuyambula bikalulu na yandi ya mbi mpi kulemfuka na minsiku ya Nzambi, lenda kudiyula nde: ‘Kana Nzambi ke bakisaka mono mpenza, ebuna sambu na nki yandi ke zola nde mono yambula mambu yina mono me yikamaka ti yo mpi yina kele mpasi na kuyambula?’
18. Inki mambote beto ta baka kana beto ke ndima nde Yehowa ke zabaka beto mbote kuluta mutindu beto mosi ke kudizabaka? (Tala mpi bifwanisu.)
18 Beto fwete ndima ti kudikulumusa nde Yehowa ke zabaka beto mbote kibeni kuluta mutindu beto mosi ke kudizabaka mpi nde yandi ke monaka bikalulu na beto ya mbote ata yina beto mosi ke monaka ve. Yehowa ke zolaka beto ata yandi ke monaka bifu na beto mpi ke bakisaka sambu na nki beto ke kudiwaka mpi ke salaka mambu na mutindu mosi buna. (Bar. 7:15) Kana beto ke sepela mingi mutindu Yehowa ke monaka bikalulu na beto ya mbote, beto ta kuma kutudila yandi diaka ntima mingi mpi beto ta landa kusadila yandi na ntima ya mvimba mpi na kiese.
Luzingu ya kitoko na nsi-ntoto ya mpa yina Yehowa me sila beto ke kumisaka lukwikilu na beto ngolo mpi yo ke sadisaka beto na kukanga ntima ata ntangu beto me kutana ti bampasi ya kukonda kukana (Tala baparagrafe 18-19)c
19. Inki beto me zaba mpenza sambu na Yehowa?
19 Beto ke zabaka mpenza nde Yehowa kele zola mpi muntu mosi ve lenda tudila yo ntembe ata fioti. (1 Yoa. 4:8) Beto ke zabaka nde yandi me tudilaka beto bansiku ya mbote sambu yandi ke zolaka beto mpi ke zolaka ntangu yonso nde beto vanda ti luzingu ya kuluta mbote. Beto ke zabaka mpi nde Yehowa ke zolaka nde beto baka luzingu ya mvula na mvula. Nkutu yandi me pesaka kimenga ya Yezu sambu na kusadisa beto na kuzinga mvula na mvula. Dikabu ya kimenga ya Yezu ke ndimisaka beto nde ata beto kele bantu ya kukonda kukuka, beto lenda sadila Yehowa na mutindu ya ke sepedisaka yandi. (Bar. 7:24, 25) Diaka beto ke zabaka nde “Nzambi kele nene kuluta bantima na beto mpi yandi me zaba mambu yonso.” (1 Yoa. 3:19, 20) Yehowa ke monaka mambu yonso ya me tala beto mpi yandi ke zabaka nde kana beto ke sala luzolo na yandi, beto ta nunga.
20. Inki ta sadisa beto na kudiyangisa ve mingi sambu na mambu yina beto me zaba ve?
20 Yehowa me bumbilaka beto ve mambu ya mfunu yina yo ke lombaka mpenza nde beto zaba. Kana beto ke ndima mambu yai ti kudikulumusa yonso, beto ta kudiyangisa ve sambu na mambu yina beto me zaba ve mpi beto ta tula dikebi mingi na mambu yina kele kibeni mfunu. Mpidina, beto ta monisa kibeni nde beto ke tulaka ntima na beto ya mvimba na Yehowa, “Muntu yina kele ya kukuka na nzayilu.” (Yobi 36:4) Kele ti mambu ya nkaka bubu yai yina beto ke bakisaka mpenza ve, ata mpidina beto ke vingila ti nzala ya ngolo ntangu yina Nzambi na beto ya Nene ta longaka beto mvula na mvula mambu ya mpa ya me tala yandi.—Lon. 3:11.
NKUNGA 104 Mpeve Santu Kele Dikabu ya Nzambi
b NTENDULA YA KIFWANISU: Tata mosi ti mwana na yandi ya bakala ke tula na sakosi na bo bima ya mfunu yina dibuta na bo lenda sadila na ntangu ya kisumbula.
c NTENDULA YA KIFWANISU: Mpangi-bakala mosi yina ke kutana ti bampasi ke yindula na kiese luzingu ya kitoko yina yandi ta vanda ti yo na nsi-ntoto ya mpa.