Lusadisu Sambu na Bankento ya Bo Ke Niokula
“ NA NSI-NTOTO ya mvimba, bo ke niokulaka bamilio ya bankento mpi ya bana-bankento. Keti yo me kuminaka nge mpi? Kana mpidina, tala mambu ya ke monisa nde Nzambi ke zolaka nge mpi yandi ke zolaka kutanina nge. Tala mpi mambu yina yandi ta sala bantu yina ke niokulaka bankento.”
Bangogo yai kele na luyantiku ya disolo mosi na jw.org yina ke tuba nde: “Inki Mutindu Biblia—Ke Tadilaka Lutaninu ya Bankento?” Na nsuka ya disolo yango, kele ti lien mosi yina lenda sadisa nge na kubaka yo na forma PDF sambu na kubasisa yo na papie. Yo lenda basika bapapie 4. Mpangi-nkento Stacy na États-Unis ke tuba nde: “Mono basisaka yo na bapapie mingi mpi beto nataka yo ti mpangi-nkento ya nkaka na kisika mosi na teritware ya dibundu na beto yina bo ke tulaka bankento ya bo vandaka kuniokula.”
Muntu mosi ya ke salaka kuna lombaka mpangi-nkento Stacy na kunatila yandi bakopi ya nkaka ya disolo yina sambu yandi pesa bankento ya nkaka yina vandaka kuna. Yo yina, mpangi-nkento Stacy natilaka yandi bakopi 40 ya disolo yango ti bakarti 30 ya jw.org mpi yandi pesaka yo bankento yango. Ntangu mpangi-nkento Stacy vutukaka na kisika yina na mbala ya nima, nkento yina vandaka kutwadisa kisika yango lombaka yandi na kusonga bankento yina vandaka kuzinga pana mutindu ya kulonguka Biblia ti Bambangi ya Yehowa.
Mpangi-nkento Stacy ti bampangi-bankento zole kwendaka na kisika ya nkaka yina bo ke tulaka mpi bankento yina bo vandaka kuniokula. Kuna, bo kabisaka bakopi 5 ya disolo yango na bankento yina ke salaka na kisika yango mpi bankento yango lombaka diaka bakopi mingi ya nkaka. Nkento mosi ya ke salaka na kisika yango songaka bo nde: “Disolo yai ta sadisa bankento mingi awa. Beto kele mpenza ti mfunu na yo.” Ntangu mpangi Stacy ti bampangi yina zole vutukaka na kisika yina, bankento mingi yina vandaka kuna vukanaka sambu na kumona mutindu Bambangi ya Yehowa ke longukaka Biblia ti bantu. Nkutu, bankento zole na kati na bo tubaka nde bo ta kwenda na lukutakanu ya ta salama na nsuka ya mposo na Nzo ya Kimfumu.
Mpangi Stacy ke tuba nde: “Beto yitukaka mingi na kumona mutindu bantu mingi sepelaka ti disolo yango. Kana beto basisa yo na papie mpi beto pesa yo bankento yina bo ke niokula, yo ta vanda mutindu ya mbote ya kulonga bo nsangu ya mbote. Beto sepelaka mingi na kumona mutindu bankento mingi sepelaka ti mukanda yai. Yo yina, beto ke ndima kibeni nde Yehowa ta sadisa beto na kulanda kulonga bankento mingi yina bo ke niokula nsangu ya mbote.”