Inki Mutindu Biblia​—Ke Tadilaka Lutaninu ya Bankento?

Madhua yina ke zingaka na Inde ke tuba nde: “Ntangu mono vandaka mwana ya fioti, mbuta na mono ya bakala bebisaka mono mpi yandi vandaka kutubila mono mambu ya mbi konso kilumbu. Ntangu mono kwelaka, mama ya bakala na mono landaka kusadila mono mambu ya mbi. Yandi ti papa ya bakala na mono, bo vandaka kusadila mono mambu bonso nde mono vandaka mpika. Mono kumaka ti bangindu ya kudifwa.”

Kimvuka Yina Ke Talaka Mambu ya Sante (organisation mondiale de la santé) ke tuba nde: “Na ntoto ya mvimba, bo ke sadilaka bankento mambu na nku.” Yo ke monana nde, bo ke bulaka bankento to bo ke vukisaka nitu ti bo na kingolo-ngolo na ntangu mosi buna na luzingu na bo. Mambu yai ke kuminaka nkento mosi na kati ya bankento tatu.

Kana mambu yai me kuminaka nge, nge lenda mona nde nge kele ve na lutaninu, nde konso kisika yina nge ke kwenda, bantu lenda tubila nge mambu ya mbi to bo lenda bula nge to kupesa nge mpasi na nitu to mpi kuvukisa ti nge nitu na kingolo-ngolo. Mutindu nge kele nkento, nge lenda yantika kumona nde bantu mingi ke yindulaka nde ‘Bankento kele ve mfunu.’ Kansi sambu na Nzambi, keti bankento kele kibeni mfunu?

Inki mutindu Nzambi ke tadilaka bankento?

Verse: “[Nzambi] gangaka bo bakala mpi nkento.”​—Kuyantika 1:27.

Ntendula: Nzambi salaka babakala mpi bankento. Yandi ke monaka nde babakala mpi bankento me fwana na kubaka luzitu. Katula yo, yandi ke lombaka nde bakala ‘kuzola nkento na yandi mutindu yandi ke kudizolaka.’ Yandi fwete sosa ve kuyala yandi. Yandi fwete tubila yandi ve mambu ya mbi to kusadila yandi mambu na nku. (Baefezo 5:33; Bakolosai 3:19) Yo ke monana pwelele nde sambu na Nzambi, bankento kele mfunu.

Maria yina ke zingaka na Argentine ke tuba nde: “Ntangu mono vandaka mwana ya fioti, bampangi na mono vukisaka nitu ti mono na kingolo-ngolo. Ntangu mono lungisaka bamvula 17, mfumu na mono ya kisalu vandaka kusonga mono nde yandi ta bula mono masasi, kana mono vukisa ve nitu ti yandi. Ntangu mono kumaka mbuta bakala na mono, bibuti na mono mpi bantu ya kartie vandaka kusadila mono mambu kukonda luzitu. Kansi na nima, mono longukaka mambu ya Yehowa,b Muntu Yina Me Salaka bantu. Yandi ke zitisaka bankento. Diambu yai kitisaka mono ntima sambu mono zabaka nde, yandi ke zolaka mono mpi nde mono kele mfunu mingi na meso na yandi.”

Inki lenda sadisa nge na kuyantika kukuma kuditadila diaka na mutindu ya mbote?

Verse: “Kele ti nduku yina ke kangamaka ngolo kuluta mpangi.”​—Bingana 18:24.

Ntendula: Nduku ya kieleka ta sadisa nge. Kana mpila kele, songa muntu mosi ya nge ke tudilaka ntima mutindu nge ke kudiwa.

Elif yina ke zingaka na Turquie ke tuba nde: “Bamvula 20 ya mvimba, mono bikaka kusonga ve ata muntu mosi nde bo me vukisaka nitu ti mono na kingolo-ngolo. Yo yina mono vandaka diaka ve ti kiese, mono kumaka kudiyangisa mpi kuniokwama na mabanza. Kansi nsuka-nsuka ntangu mono songaka muntu mosi ya zolaka kuwa mambu yina mono kutanaka ti yo, mono kudiwaka mbote mingi kibeni.”

Verse: ‘Beno losa basusi na beno yonso na [Nzambi] sambu yandi ke kudibanzaka sambu na beno.’​—1 Piere 5:7.

Ntendula: Ntangu nge ke sambaka, Nzambi ke waka kibeni. (Nkunga 55:22; 65:2) Yandi ke kudibanzaka sambu na nge. Yo yina, yandi ke zola kusadisa nge na kubakisa nde nge kele kibeni mfunu.

Ana yina ke zingaka na Belize ke tuba nde: “Kuzaba mambu ya Yehowa yantikaka kusadisa mono na kubeluka na mpasi ya ngolo yina mono vandaka ti yo na mabanza. Sesepi mono lenda samba Nzambi mpi kusonga yandi konso mpila ya mono ke kudiwa. Yandi kele bonso nduku yina ke bakisa mbote-mbote mutindu mono ke kudiwa.”

Keti Nzambi ta sala nde bo niokula diaka ve bankento?

Verse: “Yehowa . . . ta zenga mambu na lunungu sambu na mwana yina me konda tata mpi bantu yina bo me bedisaka, sambu muntu ya ntoto kupesa bo diaka boma ve.”​—Nkunga 10:17, 18.

Ntendula: Nzambi ta manisa mambu yonso ya kukonda lunungu, yo vanda mubulu mpi kusadila bankento mambu na nku.

Roberto yina ke zingaka na Mexique ke tuba nde: “Kuzaba nde ntama mingi ve Yehowa ta manisa bampasi yonso yina bo ke pesaka bankento mpi baleke ya bankento, vandaka sambu na mono bonso nkisi mosi ya ke belulaka. Yo pesaka mono ngemba ya mabanza.”

Sambu na kuzaba mambu mingi na yina me tala kivuvu yina Biblia ke pesa, sambu na nki nge lenda tudila balusilu na yo ntima, mpi inki mutindu Bambangi ya Yehowa ke sadisaka bantu bubu yai na nzila ya Biblia, lomba viziti ya ofele.

Baka kopi ya kuniema ya disolo yai.