Keti Biblia Lenda Sadisa Nge Kana Nge Ke Belaka Maladi Yina Ke Manaka Ve?

Mvutu ya Biblia

Ee. Nzambi ke sadisaka bansadi na yandi yina ke bela. Biblia ke tuba mambu yai sambu na nsadi mosi ya Nzambi: “Yehowa ta sadisa yandi na mbeto na yandi ya maladi.” (Nkunga 41:3) Kana nge ke belaka maladi yina ke manaka ve, mambu yai tatu lenda sadisa nge na kukangila yo ntima:

1. Samba Nzambi sambu yandi pesa nge ngolo ya kukangila yo ntima. Nge lenda baka “ngemba ya Nzambi yina me luta mayele yonso ya kubakisa mambu.” Yo lenda sadisa nge na kuvanda ve ti basusi mingi mpi na kukanga ntima.—Bafilipi 4:6, 7.

2. Vanda ti mabanza ya mbote. Biblia ke tubaka nde: “Ntima ya kiese kele bonso nkisi na kubelula bantu, kansi ntima ya mawa kele bonso ndikila.” (Bingana 17:22 Bible en Kituba) Vanda ti kikalulu ya kusekisa bantu sambu yo lenda sadisa nge na kuvanda ve mawa-mawa mpi yo kele mbote sambu na sante na nge.

3. Tula ntima na mambu yina Nzambi ta sala na bilumbu ke kwisa. Kana nge ke tula mpenza ntima na mambu yina Nzambi ta sala na bilumbu ke kwisa, yo ta sadisa nge na kuvanda kaka na kiese ata nge ke belaka maladi ya ke manaka ve. (Baroma 12:12) Biblia ke tuba nde na bilumbu ke kwisa “ata muntu mosi ve ya ke zingaka na insi ta tuba nde: ‘Mono ke bela.’” (Yezaya 33:24) Nzambi ta katula bamaladi ya ke manaka ve yina baminganga ke kuka ve kusansa bubu. Mu mbandu, Biblia ke tubaka nde minunu ta vutukila sante na bo ya kileke. Yo ke tubaka nde: “Bika nde nsuni na yandi kukuma ya mpa kuluta na kileke; bika nde yandi vutuka na bilumbu ya ngolo ya kileke na yandi.”—Yobi 33:25.

Noti: Beto bambangi ya Yehowa, beto ke ndimaka nde Nzambi ke sadisaka beto. Ata mpidina beto ke kwendaka na minganga kana beto ke bela maladi mosi ya ke manaka ve. (Marko 2:17) Beto ke songaka ve bantu na kubaka lusansu mosi buna sambu beto ke zabaka nde konso muntu fwete baka balukanu sambu na sante na yandi.