Inki Biblia Ke Tubaka Sambu na Malafu? Keti Kunwa Malafu Kele Disumu?
Mvutu ya Biblia
Kunwa malafu kukonda kulutisa ndilu kele ve disumu. Biblia ke monisaka nde vinu kele dikabu ya Nzambi mpi yo lenda sala nde muntu kusepela diaka mingi ti luzingu. (Nkunga 104:14, 15; Longi 3:13; 9:7) Biblia ke ndimaka mpi nde vinu ke salaka mpi bonso nkisi yina ke belulaka bamaladi.—1 Timoteo 5:23.
Yezu nwaka vinu ntangu yandi vandaka awa na ntoto. (Matayo 26:29; Luka 7:34) Yandi kumisaka masa vinu. Diambu yai ya kuyituka kele na kati ya mambu ya kuyituka yina me zabanaka mingi ya yandi salaka. Yandi pesaka dikabu yina ya vinu na nkinsi mosi ya makwela.—Yoane 2:1-10.
Bigonsa ya kunwa malafu mingi
Ata Biblia ke monisaka nde vinu kele mbote, yo ke buyisaka kunwa malafu mingi mpi kulawuka. Yo yina, Mukristu yina me sepela kunwa malafu fwete lutisa ve ndilu ntangu yandi ke nwa yo. (1 Timoteo 3:8; Tito 2:2, 3) Biblia ke pesa bikuma mingi ya kubuya kulutisa ndilu na kunwa malafu.
Yo ke bebisaka mayele ya kuyindula mpi ya kubaka balukanu. (Bingana 23:29-35) Muntu yina me lawuka malafu lenda zitisa ve nsiku ya Biblia ya ‘kupesa nitu na yandi bonso kimenga ya moyo, ya santu, ya Nzambi ke ndimaka, na mutindu yina yandi ta sala kisalu ya santu ti mayele na yandi ya kuyindula.’—Baroma 12:1.
Kunwa malafu mingi ke salaka nde muntu kudiyala diaka ve mpi yandi vanda diaka ve ti “mabanza ya kusala mambu ya mbote.”—Ozea 4:11; Baefezo 5:18.
Yo lenda kumisa muntu nsukami mpi kubebisa sante na yandi.—Bingana 23:21, 31, 32.
Kunwa malafu mingi mpi kulawuka ke sepedisaka ve Nzambi.—Bingana 23:20; Bagalatia 5:19-21.
Bandilu yina beto lenda luta ve
Kana malafu me kuma kutula luzingu ya muntu yina ke nwana yo mpi ya bantu ya nkaka na kigonsa, yo ke monisa nde yandi me nwa mingi. Na kutadila Biblia, bantu ke zabaka nde muntu me lawuka malafu, ve sambu yandi ke kudizaba diaka ve, kansi na bikalulu na yandi. Mu mbandu yandi ke zaba ve kima ya kusala, yandi ke tambula bonso muntu ya ke zola kubwa, yandi ke wa makasi mpamba-mpamba to mpi yandi ke basisa ve bangogo pwelele na munoko. (Yobi 12:25; Nkunga 107:27; Bingana 23:29, 30, 33) Ata bantu yina ke buyaka kulawuka malafu, bo mpi bo lenda ‘kuma kizitu na kulutisa ndilu na kunwa malafu’ mpi bo lenda kutana ti mambu mingi ya mpasi.—Luka 21:34, 35.
Kubuya kunwa malafu ata fioti
Biblia me tubila ntangu yina Mukristu fwete buya kunwa malafu:
Kana yo me kuma kubudisa bantu ya nkaka dibaku.—Baroma 14:21.
Kana bansiku ya bwala me buyisa yo.—Baroma 13:1.
Kana muntu ke zaba ve kisika yandi fwete suka. Bantu yina me kumaka bampika ya malafu mpi bayina ke niokwamaka sambu bo ke lutisaka ndilu na kunwa malafu fwete baka balukanu ya ngolo.—Matayo 5:29, 30.