Bafilipi 4:8—“Mambu Yonso Yina Kele ya Kieleka, . . . Beno Landa Kuyindula Mambu Yai”

“Nsuka-nsuka bampangi, mambu yonso yina kele ya kieleka, mambu yonso yina bo lenda zitisa, mambu yonso yina kele ya lunungu, mambu yonso yina kele ya bunkete, mambu yonso yina ke pusaka na kuzola, mambu yonso yina kele ya lukumu, mambu yonso yina kele ya mbote, mpi mambu yonso yina me fwana na kubaka lukumu, beno landa kuyindula mambu yai.”—Bafilipi 4:8, Mbalula ya Nsi-Ntoto ya Mpa.

“Bampangi, na kumanisa, beno yindula mambu yina kele ya kieleka, ti ya luzitu, ti ya kufwana, ti ya kinzambi, ti ya kiese, ti ya lukumu, ti ya mbote, ti ya bo fweti zitisa.”—Bafilipi 4:8, Bible en Kituba.

Ntendula ya Bafilipi 4:8

Nzambi ke tulaka dikebi na bangindu ya bantu, mingi-mingi sambu bangindu na beto ke kima yina ke pusaka beto na kusala mambu. (Nkunga 19:14; Marko 7:20-23) Yo yina, bantu yina ke zola kusepedisa Nzambi fwete buya bangindu yina kele ya mbi na meso ya Nzambi kansi bo fwete yindula mambu yina yandi ke zolaka.

Verse yai ke tubila mambu nana ya mbote yina Bakristu fwete “landa kuyindula,” disongidila, kuvanda ti kikalulu ya kuyindula.

• “Kieleka.” Ngogo yai ke tendula mambu yina kele ya mbote mpi ya bo lenda tudila ntima, mu mbandu bansangu yina kele na Ndinga ya Nzambi, Biblia.—1 Timoteo 6:20.

• “Yina bo lenda zitisa.” Bangogo yai ke tadila mambu yina kele mpenza mfunu. Yo kele ve mambu ya mpamba-mpamba to ya kukonda mfunu. Kansi, yo ke sadisaka na kukumisa ngolo lukanu yina Mukristu ke vandaka ti yo ya kusala mambu ya mbote.—Tito 2:6-8.

• “Lunungu.” Ngogo yai ke tubila mambu ya muntu ke kana kusala mpi mambu ya muntu ke sala yina ke wakana ti bansiku ya Nzambi ya ke tadila mambu ya mbote kansi ve na kutadila mayele ya bantu.—Bingana 3:5, 6; 14:12.

• “Bunkete.” Ngogo yai ke tadila bangindu mpi bikuma ya ke pusaka muntu na kusala mambu; bangindu mpi bikuma yango ya bo ke tubila kele ya bunkete mpi ya santu, kaka ve na mambu ya me tala kuvukisa nitu, kansi na mambu yonso.—2 Bakorinto 11:3.

• “Yina ke pusaka na kuzola.” Bangogo yai ke tubila mambu yina kele ya kitoko, yina ke pusaka bantu na kuzola bantu ya nkaka kansi ve yina ke pusaka na kumenga bantu to yina ke basisaka kimbeni mpi mavwanga.—1 Piere 4:8.

• “Lukumu.” Ngogo yai ke tubila mambu yina ke yikaka valeur na lukumu ya muntu mpi yina bantu ya ke zitisaka Nzambi ke ndimaka.—Bingana 22:1.

• “Mbote.” Ngogo yai ke tubila mambu yina bansiku ya Nzambi ke monaka nde yo kele mambu ya mbote na yina me tala bikalulu ya mbote. Yo kele mambu ya mbote kibeni.—2 Piere 1:5, 9.

• “Yina me fwana na kubaka lukumu.” Bangogo yai ke tubila mambu yina bo lenda kumisa to kusikisa, mingi-mingi na meso ya Nzambi. Yo ke tadila mpi mambu ya kuyituka yina Nzambi me salaka, yina bantu fwete yindula.—Nkunga 78:4.

Mambu ya Bo Ke Tubila na Baverse ya Kele na Ntwala mpi na Nima ya Bafilipi 4:8

Bo kangaka ntumwa Polo na boloko na Roma ntangu yandi sonikilaka Bakristu ya Filipi mukanda yai. Ata mpidina, bantu ya ke tendulaka Biblia ke tuba nde mukanda yai kele “mukanda ya kiese” sambu yo ke tubila mambu ti kiese mpi yo ke sadila bangogo mingi ya ke monisa zola mpi kusepela.—Bafilipi 1:3, 4, 7, 8, 18; 3:1; 4:1, 4, 10.

Polo vandaka kuzola bampangi na yandi ya Filipi, mpi yandi vandaka kuzola nde bo vanda ti kiese mpi ngemba ya mutindu mosi ti yina yandi vandaka ti yo. (Bafilipi 2:17, 18) Yo yina, na kitini ya nsuka ya mukanda na yandi, yandi siamisaka bo na kuvanda na kiese, na kuvanda ve makambu ngolo, na kusambaka Nzambi mbala na mbala, mpi na kuyindula mambu yina ke sadisaka na kuvanda ti ngemba ya mbanza mpi na kuvanda na ngemba ti Nzambi.—Bafilipi 4:4-9.

Tala video yai ya nkufi sambu na kumona na bunkufi mambu yina kele na mukanda ya Bafilipi.