Mono Nungaka Bakala na Mono ‘Kukonda Kutuba Ata Kima Mosi’

Mono butukaka na Roumanie na 1952. Na ntangu yina, mama na mono vandaka Mbangi ya Yehowa. Kansi yandi vandaka diaka ve ngolo na kimpeve. Yo yina mono vandaka ve kukwenda na balukutakanu ya Bukristu. Katula yina, Roumanie vandaka na nsi ya luyalu ya ba communiste. Yo yina leta buyisaka bisalu ya bambangi ya Yehowa mu mbandu kubasisa mikanda mpi kusala kisalu ya kulonga. Yo yina tii ntangu mono lungisaka bamvula 36, mono vanaka ve kuzaba Yehowa mpi mambu yina Biblia ke longaka. Kansi na 1988, ntangu mono kwendaka kuzinga na mbanza Satu Mare ti bakala na mono István, kima mosi sobaka luzingu na mono.

Emvitasio Mosi ya Mono Lendaka ve Kubuya

Kilumbu mosi mama kwisaka kutala mono. Yandi songaka mono nde: “Mono ke kwenda kutala mama na nge ya mbuta. Keti nge lenda fidisa mono? Na nima beto lenda kwenda kusumba bima.” Sambu mono vandaka ve ti kima ya kusala mono ndimaka.

Ntangu beto kumaka na nzo ya mama mbuta, mono monaka bo ke sala lukutakanu ya Bambangi ya Yehowa pana. Bantu ya nkaka uvwa vukanaka pana babakala mpi bankento. Mono bakisaka mpi nde mama kumaka diaka kusala mambu ya kimpeve mpi yandi kumaka diaka kikesa. Mambu ya mono waka na suka yina yitukisaka mono mingi kibeni.

Ntangu lukutakanu yina manaka, mpangi yina vandaka kutwadisa pusanaka pene-pene na mono mpi yandi songaka mono nde: “Zina na mono János. Mono monaka mutindu nge vandaka kutula dikebi ya mingi ntangu lukutakanu vandaka kusalama. Keti nge me sepela na mambu yina nge me wa bubu?” Mono songaka yandi nde, mono me kotaka ntete ve na lukutakanu mosi bonso yai mpi mono ta sepela kukota yo diaka. Yandi yulaka mono nde: “Keti nge ta zola kulonguka Biblia? Yo vandaka emvitasio mosi ya mono lendaka ve kubuya. Mono bakisaka nde Nzambi tudilaka mono dikebi na nzila ya bantu yina.

Na kilumbu yina landaka, János nataka mono na mpangi-nkento Ida mpi mono yantikaka kulonguka Biblia ti yandi. Kansi mono waka boma sambu na mutindu István ta bakila yo kana yandi me zaba nde mono ke longuka Biblia ti Bambangi ya Yehowa. Mbala mingi, mono vandaka kusonga yandi mambu ya mono vandaka kulonguka, kansi yandi vandaka kutula ve dikebi na mambu ya mono vandaka kusonga yandi. Mono zabaka nde yandi vandaka ve kusepela ti mambu ya mono vandaka kusala.

Ata mpidina, mono landaka kulonguka Biblia mpi mono bakaka mbotika na août 1989. Bangonda iya na nima, luyalu ya ba communiste bwaka mpi bo fwaka mfumu ya luyalu.

Mbangika Mosi ya Ngolo

Ntangu luyalu yina bwaka, bantu kumaka ti kimpwanza ya mingi. Bambangi ya Yehowa kumaka diaka ti nswa ya kusala balukutakanu mpi ya kulonga bantu na pwelele yonso. Kansi sambu na mono, kimpwanza yina nataka mbangika ya ngolo. István songaka mono nde: “Mambu ya nge ke kwikila me tela mono ve, kansi mono ke zola ve nde nge kwendaka kulonga nzo na nzo.”

Mono lendaka ve kuyambula kulonga ata fioti. (Bisalu 4:20) Yo yina sambu na mwa ntangu, mono vandaka kulonga ya kubumbana. Kansi kilumbu mosi, banduku ya István monaka mono na kisalu ya nzo na nzo mpi bo kwendaka kusonga yandi. Ntangu mono vutukaka na nzo, bakala na mono nganinaka mono mpi songaka mono nde: “Nge me pesa mono ti dibuta na beto nsoni.” Yandi tulaka mono mwana mbele na mungungu mpi yandi songaka mono nde yandi ta fwa mono kana mono me yambula ve kisalu ya kulonga.

Mono mekaka kusolula ti István mpi mono songaka yandi nde mono ke zolaka yandi mingi kibeni. Mambu yina mono tubaka lembikaka makasi na yandi sambu na mwa ntangu. Kansi ntangu mpangi na beto mosi buna ya nkento kwelaka mpi mono buyaka kukwenda na nkinsi na yandi ya makwela ya vandaka kusalama na dibundu mosi, yandi waka diaka makasi ya ngolo. Banda kilumbu yina, yandi kumaka kutubila mono mambu ya mbi kuluta.

Diambu ya mawa kele nde, yo lombaka nde mono kanga ntima sambu na makasi yina ya István bamvula 13. Na bamvula yina yonso, yandi vandaka kusonga mono nde beto fwete fwa makwela. Bantangu ya nkaka, yandi vandaka kukanga kielo mpi kubuya nde mono kota ve na nzo. Bilumbu ya nkaka, yandi vandaka kusonga mono na kukanga bima na mono mpi kukwenda.

Inki sadisaka mono na kukanga ntima na mambu yai yonso ya mpasi? Mono vandaka kusamba Yehowa sambu yandi sadisa mono na kuvanda na ngemba ya ntima mpi mono vandaka kuwa nde yandi ke sadisa mono kibeni. (Nkunga 55:22) Dibundu mpi sadisaka mono mingi kibeni. Bankuluntu mpi bampangi bankento ya kuyela na kimpeve pesaka mono kikesa sambu mono yambula ve kisalu na mono. Bo yibukisaka mono mambu yina Biblia ke tubaka sambu na bankento yina me nungaka babakala na bo ‘kukonda kutuba ata kima mosi’ na nsadisa ya kwikama na bo na Yehowa. (1 Piere 3:1) Na nima ya bamvula, mambu salamaka mutindu yina sambu na mono.

Ntangu Mambu Yonso Sobaka

Na 2001, István salaka AVC mpi yandi vandaka kukuka diaka ve kutambula. Yandi kotaka lupitalu mpi yandi salaka ngonda mosi ti bamposo mingi, mingi-mingi sambu bo sadisa yandi na kukuma diaka kutambula. Na ntangu yina, mono vandaka na lweka na yandi konso ntangu yina. Mono vandaka kudisa yandi, kusolula ti yandi mpi kuzikisa nde yandi kele ti konso kima yina yandi kele ti yo mfunu.

Bampangi-babakala mpi bankento ya dibundu vandaka mpi kukwisa kutala yandi. István monaka yandi mosi zola yina bampangi ke vandaka ti yo mpi dikebi yina bo ke tudilaka bantu. Bampangi mingi lombaka na kusadisa beto. Bankuluntu vandaka ntangu yonso ya kuyilama sambu na kusadisa beto mpi kupesa beto kikesa.

Mambu yina simbaka ntima ya István, mpi yandi waka nsoni sambu na mutindu yandi vandaka kusadila mono mambu. Yandi monaka mpi nde ata nduku na yandi mosi ve kwisaka kutala yandi. Yo yina ntangu yandi basikaka na lupitalu, yandi tubaka nde: “Mono ke zola kulonguka Biblia mpi kukuma Mbangi ya Yehowa.” Mono waka kiese ya mingi mpi mono yantikaka kudila.

Na mai 2005, István bakaka mbotika. Sambu yandi lendaka ve kutambula, bampangi tulaka yandi na velo ya bikata mpi bo nataka yandi na kisika yina bantu vandaka kubaka mbotika. Bo kotisaka yandi na masa mpi botikaka yandi. István kumaka nsamuni ya kikesa ya Kimfumu. Mono ke yibuka bantangu mingi ya mbote ya mono lutisaka ti yandi na kisalu ya kusamuna. Yo kele kima ya kuyituka kibeni. Beno yindula fioti: muntu yina vandaka kutelamina mono sambu mono longa ve Ndinga ya Nzambi kumaka sesepi na lweka na mono, mpi yandi vandaka kulonga bantu ya nkaka nsangu ya mbote ti kiese yonso.

István kumaka kuzola Yehowa mingi mpi yandi vandaka kulutisa ntangu na yandi na kulonguka Biblia mpi kukanga baverse na ntu. Yandi vandaka kuzola mingi kutubila baverse yina yandi kangaka na ntu ti bampangi-babakala mpi bankento na dibundu. Yandi vandaka kusadila dibaku yai sambu na kupesa bo kikesa.

Mavimpi ya István landaka kubeba. Na nima ya kusala ba AVC mingi ya fioti-fioti, yandi vandaka kutuba diaka ve mpi yandi kangamaka kaka na mbeto. Keti diambu yai kangaka yandi nzila ya kusadila Yehowa? Ata fioti ve. Yandi landaka kutanga mpi kulonguka Biblia na kiteso yina yandi vandaka kukuka. Ntangu bampangi vandaka kukwisa kutala yandi, yandi vandaka kusadila apareyi mosi ya vandaka ti ekran sambu na kusolula ti bo mpi kukumisa lukwikilu na bo ngolo. Mpangi mosi ya bakala tubaka nde: “Mono vandaka kuzola kukwisa kutala István. Mono vandaka ntangu yonso kuvutuka na nzo ti kikesa mpi ngolo.”

Diambu ya mawa kele nde, na décembre 2015, István fwaka. Kuvudisa yandi pesaka mono mpasi mingi kibeni. Kansi mono lenda tuba mpi nde mono kumaka ti ngemba mingi ya ntima. Sambu bamvula mingi na ntwala nde bakala na mono kufwa, yandi kumaka dezia nduku ya Yehowa. Yo kele na kati ya mambu ya ke pesaka mono kiese mingi. István ti mama na mono kele ntangu yai na mabanza ya Yehowa. Yo ta vanda dibaku mosi ya kiese mingi ntangu mono ta yamba bo diaka mpi ta zodila bo kukwisa ya mbote na ntoto ya mpa ya lununu ya Yehowa.

Bamvula kuluta 35 me lutaka banda mono ti mama, beto kwendaka kutala mama mbuta na mono, mpi yo kele viziti yina mono lenda vila ve ata fioti. Mono kele sesepi yai ti bamvula 70 ti ndambu mpi mono ke sadilaka Yehowa bonso mupasudi nzila ya ntangu yonso. Sambu na mono, yo kele ve ti mutindu mosi ya kuluta mbote yina mono lenda pesa Yehowa mersi sambu na mambu ya mbote yina yandi me sadilaka mono. (Nkunga 116:12) Yandi sadisaka mono na kulanda kuvanda ya kukangama na yandi mpi na kuzwa ngemba ya ntima ntangu mono kutanaka ti mbangika. Na nzila ya mbangika yina, mono bakisaka nde mambu lenda soba. Ata mono vandaka kuyindula ve nde kilumbu kele mambu ta soba, mono nungaka bakala na mono kukonda kutuba ata kima mosi.