Mutindu ya Kumonisa Ntonda

DIAMBU YA MPASI

Sambu makwela kununga bankwelani fwete monisaka ntonda na kati na bo. Kansi, babakala ti bankento mingi ke monaka diaka ve bikalulu ya mbote ya bankwelani na bo, mpi bo ke monisilaka bo diaka ve ntonda ya mingi. Na mukanda mosi L’infidélité affective (Kingelesi), muntu mosi yina ke pesaka bandongisila ke tuba nde bankwelani mingi yina ke kwisaka kukutana ti yandi “ke kudiyangisaka mingi sambu na mambu yina ke salama ve [na makwela na bo] kansi bo ke tubilaka ve mambu yina ke salama. Bo ke kwisaka na biro na mu sambu na kusonga mu mambu yina fwete soba, kansi bo ke kwisaka ve sambu na kusonga mu mambu yina fwete soba ve. Kifu yina bankwelani yai ke salaka kele nde bo ke monisaka ve ntonda, yina kele mutindu mosi ya kumonisa zola.”

Inki mutindu nge ti nkwelani na nge, beno lenda tina mutambu yai?

MAMBU YA NGE FWETE ZABA

Kumonisa ntonda lenda fiotuna basusi na makwela. Ntangu bakala ti nkento ke sala kikesa ya kumona mpi kundima bikalulu ya mbote ya nkwelani na yandi, mbala mingi bangwisana na bo ke tomaka. Kana konso nkwelani ke mona nde nkwelani na yandi ke zola yandi, yo lenda kumisa bampasi ya ngolo pete.

Sambu na bankento. Mukanda yina beto tubilaka dezia L’infidélité affective (Kingelesi) ke tuba nde: “Bankento mingi ke monaka mpamba mpasi ya mingi yina babakala ke vandaka na yo sambu na kulungisa bampusa ya mabuta na bo.” Na bansi ya nkaka, mpasi yina lenda vanda ata na mabuta yina bankwelani yonso zole ke salaka.

Sambu na babakala. Mbala mingi babakala ke monaka mpamba bikesa yina bankento ke salaka sambu na kusadisa dibuta, yo vanda kusala kisalu, kusansa bana, to kusala bisalu ya nzo. Fiona,a yina me kwelaka kiteso ya bamvula tatu me luta, ke tuba nde: “Beto yonso ke salaka bifu, mpi kana mu sala kifu, mu ke kudiwaka mbi. Yo yina kana bakala na mono kuzabisa mono nde mono me sala kima mosi ya mbote na nzo, mu mbandu na yina me tala bisalu ya nzo, mu ke bakisaka nde yandi ke landa kuzola mono ata mono kele ti bifu. Mu ke monaka nde yandi ke sadisa mono mpi yo ke pesaka mono kiese mingi!”

Kansi, kana nkwelani mosi ke bakisa nde bo ke mona yandi mpamba, yo lenda lembisa kwikama ya makwela. Nkento mosi, zina na yandi Valerie, ke tuba nde: “Kana nge ke mona nde nkwelani na nge ke zola nge ve, yo kele ve mpasi nde nge kuma kuzola muntu yina ke sala nde nge kudiwa nde bo ke zola nge.”

MAMBU YA NGE LENDA SALA

Tulaka dikebi. Na mposo ya ke landa, tala bikalulu ya mbote yina nkwelani na nge ke monisa. Diaka, tala mambu yina yandi ke sala sambu mambu kutambula mbote na nzo—ziku mambu yina nge vandaka ntete kumona mpamba. Na nsuka ya mposo, sala lisiti ya (1) mambu ya nkwelani na nge me sala yina nge me sepela na yo (2) mambu yina yandi salaka sambu na dibuta.—Munsiku ya Biblia: Bafilipi 4:8.

Sambu na nki kutula dikebi kele mfunu? Nkento mosi, zina na yandi Erika, ke tuba nde: “Na nima ya kulutisa mwa bamvula na makwela, nge lenda yantika kumona nkwelani na nge mpamba. Nge ta yambula kumona mambu ya mbote yina yandi ke sala mpi nge ta kuma ti kikalulu ya kutula dikebi mingi na mambu yina yandi ke sala ve.”

Kudiyula nde: ‘Keti mono ke monaka mpamba kisalu ya ngolo yina nkwelani na mono ke salaka?’ Mu mbandu, kana bakala na nge me yidika bima na nzo, keti nge ke vandaka ti keti-keti sambu na kupesa yandi mersi sambu nge ke yindulaka nde kusala bisalu yina kele mukumba na yandi? Kana nge kele bakala, keti nge ke yindula nde bikesa yina nkento na nge ke salaka sambu na kusansa bana me fwana ve nde nge sikisa yandi sambu yandi ke sala kaka mambu yina yandi fwete sala? Baka lukanu ya kumona mpi ya kumonisa ntonda sambu na mambu yonso, ya nene to ya fioti, yina nkwelani na nge ke salaka sambu na dibuta na beno.—Munsiku ya Biblia: Baroma 12:10.

Kumisa na luzolo yonso. Biblia ke tuba pwelele nde “beno pesa matondo.” (Bakolosai 3:15) Yo yina, sala ngolo na kukuma ti kikalulu ya kupesa nkwelani na nge matondo. Bakala mosi, zina na yandi James, ke tuba nde: “Ntangu nkento na mono ke pesaka mono ntonda sambu na mambu yina mono me sala, yo ke pusaka mono na kusala ngolo sambu na kuvanda bakala ya mbote mpi kusala diaka mingi sambu na makwela na beto.”—Munsiku ya Biblia: Bakolosai 4:6.

Babakala ti bankento yina ke monisaka ntonda na kati na bo ke kumisaka bangwisana na bo ngolo. Bakala mosi, zina na yandi Michael, ke tuba nde: “Mu ke yindula nde makwela mingi zolaka kufwa ve kana bankwelani bikaka na kisika ya ntete mambu yina bo vandaka kuzola na bankwelani na bo. Kana matata kubasika, bo ta fwa ve makwela nswalu sambu bo ke yibukaka mbala na mbala mambu ya mbote yina bo kele na yo.”