1. Keti Bampasi na Beto Ke Katukaka na Nzambi?

Sambu na Nki Beto Fwete Baka Mvutu na Ngiufula Yai?

Bantu mingi ke zolaka ve kusambila Nzambi sambu bo ke yindulaka nde bampasi na bo ke katukaka na yandi.

Mambu Yina Beto Fwete Zaba

Na mutindu ya pwelele to ya kubumbana, bamfumu mingi ya mabundu ke longaka nde bampasi na beto ke katukaka na Nzambi. Mu mbandu, bankaka ke tubaka mambu yai:

• Bisumbula ya lugangu kele ndola ya Nzambi.

• Bana ke fwaka sambu Nzambi ke vandaka ti mfunu ya bawanzio mingi na zulu.

• Nzambi ke pusaka bantu na kunwana bitumba sambu yo natila bo bampasi mingi.

Keti mambu yina bamfumu ya mabundu ke longaka sambu na Nzambi kele ya kieleka? Keti Nzambi ke ndimaka bo?

Mambu Yina Biblia Ke Longaka

Bampasi na beto ke katukaka ve na Nzambi.

Kana bampasi ke katukaka na Nzambi, yo ta wakana ve ti bikalulu ya Nzambi yina Biblia ke tubilaka. Mu mbandu:

“Banzila na yandi yonso kele lunungu. . . . yandi kele muntu ya lunungu mpi ya mbote.”—KULONGA 32:4.

“Ngindu lenda kwisila ve ata fioti Nzambi ya kieleka na kusala mambu na nku yonso, ngindu lenda kwisila ve ata fioti Nkwa-Ngolo Yonso na kusala mambu ya mbi!”—YOBI 34:10.

“Nkwa-Ngolo Yonso ke sambisaka ve mambu na mutindu ya mbi.”—YOBI 34:12.

Nzambi ke buyaka mabundu yina ke tubaka mambu ya luvunu sambu na yandi.

Disongidila, mabundu yina ke longaka nde bampasi na beto ke katukaka na Nzambi mpi mabundu yina ke kotaka na mambu ya bitumba mpi ya mubulu.

“Bambikudi ke bikula mambu ya luvunu na zina [ya Nzambi]. Mono me tinda bo ve, mono me songa bo ve, mpi mono me tubila bo ve. Mambu yina bo ke tubila beno kele mbona-meso ya luvunu, . . . ya bo ke zabisa na ntwala, mpi luvunu ya ntima na bo.”—YEREMIA 14:14.

Yezu monisaka pwelele luvunu ya bamfumu ya mabundu.

“Bantu yonso ve yina ke tubilaka mono nde, ‘Mfumu, Mfumu,’ ta kota na Kimfumu ya zulu, kansi muntu yina ke salaka luzolo ya Tata na mono yina kele na zulu, yandi mpamba muntu ta kota. Bantu mingi ta songa mono na kilumbu yina nde: ‘Mfumu, Mfumu, keti beto bikulaka ve na zina na nge mpi basisaka ve bademo na zina na nge mpi salaka ve bidimbu mingi ya nkumbwa na zina na nge?’ Kansi mono ta songa bo nde: ‘Mono me zaba beno ve ata fioti! Beno katuka na ntwala na mono, beno bantu ya ke fwaka bansiku!’”—MATAYO 7:21-23.