Sosa Kuzaba Kieleka

Kikuma ya Ke Salaka nde Bantu Kuvanda ti Bangindu ya Mbi Sambu na Bantu ya Nkaka

Bantu ke vandaka ti bangindu ya mbi sambu na bantu ya nkaka sambu mbala mingi bo ke waka bansangu ya luvunu sambu na bantu yango. Beto tadila bambandu yai:

Bamfumu mingi ya kisalu ke yindulaka nde bankento lenda kuka ve kusala bisalu yina ke lombaka mayele to ngolo mingi. Kansi yo ke vandaka ve masonga.
Na ntangu ya ntama na Europe, bo kusilaka Bayuda makambu nde bo tulaka ndikila (poison) na mabulu ya masa mpi nde bo panzaka maladi. Na luyalu ya Nazi, bantu kusilaka diaka Bayuda makambu. Bo tubaka nde Bayuda bantu salaka nde insi Allemagne kuvanda diaka ve ti mbongo. Mambu yai zole me salaka nde bantu kukuma ti bangindu ya mbi sambu na Bayuda mpi nkutu bantu ya nkaka ke vandaka ti bangindu yango tii bubu yai.
Bantu mingi ke yindulaka nde bantu yina kele ti bifu na nitu ke vandaka bantu ya mawa-mawa to ya makasi-makasi.

Bantu yina ke ndimaka mambu yai ya luvunu ke pesaka bikuma ya ke monisaka nde bo ke tuba masonga. Mpi bo ke yindulaka nde bantu yina ke buyaka kundima mambu ya bo ke tuba me zaba ve ata kima.

Mambu Yina Biblia Ke Tubaka

“Muntu yina me konda nzayilu kele mbote ve.”—BINGANA 19:2.

Verse yai ke tendula nki? Kana beto me zaba ve kieleka na diambu mosi, beto lenda baka badesizio ya mbi. Kana beto ke ndima mambu ya luvunu kukonda kusosa kuzaba kieleka, beto ta bakila bantu bangindu ya mbi.

Sambu na Nki Kuzaba Kieleka Sambu na Bantu ya Nkaka Kele Mfunu?

Kana beto me zaba kieleka sambu na bantu ya nkaka, yo ta vanda mpasi nde beto ndima mambu ya luvunu yina bantu ke tubaka sambu na bo. Mpi ntangu beto ta zaba nde bantu ke kusilaka bo makambu, beto ta kuma ve kundima mbala mosi mambu ya bantu ke tubaka sambu na bo.

MBANDU: Jovica (Balkans)

Jovica ya beto me katuka kutubila na disolo ya me luta yelaka na kisika yina bantu vandaka kutuba mambu ya mbi sambu na mwa kimvuka mosi ya bantu. Diaka, yandi vandaka kuwa yo na bansangu mpi na manaka ya televizio. Yandi ke tuba nde: “Mono kumaka ti bangindu ya mbi sambu na bantu yina mpi nkutu mono kumaka kuzola bo ve. Mono vandaka kuyindula nde mono vandaka ti bikuma ya mbote ya kuyindula mutindu yina.”

“Kansi ntangu mono vandaka soda, mono kumaka kuzinga mpi kusala kisika mosi ti basoda ya mwa kimvuka yina. Na ntangu yina, mono longukaka mambu mingi ya me tala bo. Nkutu mono kumaka kulonguka ndinga na bo mpi miziki ya ndinga na bo. Mono kumaka kuwakana mbote ti bo mpi mono katulaka bangindu ya mbi yina mono vandaka ti yo sambu na bo. Ata mpidina, mono ke zabaka nde bangindu yai ya mbi lenda vutukila mono diaka. Yo yina, mono ke landaka diaka ve bansangu ya ke tubaka mambu ya mbi sambu na bo. Mono ke talaka mpi ve bafilme to bansaka ya ke monisaka mutindu bantu ke sekaka bo. Mono ke zabaka nde kana muntu kele ti bangindu ya mbi sambu na bantu ya nkaka, yo lenda pusa yandi na kuwila bo makasi to na kuzola bo ve.”

Mambu Yina Nge Lenda Sala

Bantu lenda tuba nde kimvuka mosi ya bantu ke vandaka ti bikalulu ya mbi. Kansi kuvila ve nde bantu ya nkaka ya kimvuka yina kele bantu ya mbote.
Kuvila ve nde mbala ya nkaka nge me zaba kaka mambu fioti sambu na bantu yango.
Sosa kuzaba kieleka ya me tala kimvuka yina ya bantu na mikanda to na bantu yina ke tubaka masonga.