Luzitu Sambu na Nge Mosi Me Kwendaka na Wapi?

**SAMBU NA NKI KUDIPESA LUZITU KELE MFUNU?**

Bantu yina ke kudipesaka luzitu lenda kanga ntima na mambu ya mpasi ti kivuvu. Bo ke yambulaka ve mambu na pete.

Bansosa ke monisa nde bantu yina ke kudimonaka mpamba ke kumaka ti basusi, bo ke niokwamaka na mabanza mpi bo ke waka kibeni ve nzala ya madia. Diaka, bo ke kumaka bampika ya malafu mpi ya bima ya ke lawusaka.
Bantu yina kudipesaka luzitu ke kudifwanisaka ve ti bantu ya nkaka. Yo yina bo ke wakanaka mbote ti bantu ya ke zingaka ti bo mpi bo ke taka kinduku ya ngolo ti bantu. Kansi, bayina ke kudipesaka ve luzitu ke tubaka mingi mambu ya mbi sambu na bantu ya nkaka mpi kikalulu yai lenda bebisa kinduku na bo ti bantu.
Bantu yina ke kudipesaka luzitu ke vandaka kaka kikesa ata ntangu bo ke kutanaka ti bampasi; bo ke bikaka ve nde bampasi kukanga bo nzila ya kulungisa lukanu na bo. Kansi, bantu yina ke kudipesaka ve luzitu ke kumisaka mambu ya fioti-fioti bonso makambu ya nene. Yo lenda sala nde bo yambula na pete.

MAMBU YA NGE LENDA SALA

Pona banduku yina ta pesa nge kikesa. Kangama ti bantu yina ke vandaka luzitu, bayina ke sosaka kibeni mambote na nge mpi bayina ta pesa nge kikesa.

“Nduku ya kieleka ke zolaka konso ntangu, mpi yandi kele mpangi yina me butukaka sambu na bantangu ya mpasi.”—Bingana 17:17.

Sadisa bantu ya nkaka. Kana nge kele ntima-mbote mpi nge ke sadisa bantu ya nkaka mingi-mingi bantu yina ta sadisa nge ve na nima, nge ta vanda na kiese ya masonga yina kikalulu ya kukaba ke pesaka. Nge ta vanda na kiese ata bantu ke mona ve mambu ya mbote ya nge ke salaka.

“Kiese ke vandaka mingi na kupesa, kansi na kubaka kiese ke vandaka fioti.”—Bisalu 20:35.

Sadisa bana na nge na kukuma ti kikalulu ya kudipesa luzitu. Mu mbandu, bika bo bo yidika bo mosi mambu na bo na kutadila makuki na bo. Yo ta sadisa nge na kuzaba mutindu bo lenda nunga bampasi ya luzingu yina bo ta kutanaka ti yo mpi kukangila yo ntima. Kusala mpidina ta sadisa bana na kudipesa luzitu bubu yai mpi ntangu bo ta kuma bambuta.

“Longa mwana na nzila yina yandi fwete kwenda; ata ntangu yandi ta kuma mbuta, yandi ta yambula yo ve.”—Bingana 22:6, noti na nsi ya lutiti.

Mbangi mosi ya Yehowa ya nkento ke longuka Biblia ti nkento mosi na restora.

MAMBU YA BETO KE SALAKA

Bambangi ya Yehowa ke salaka balukutakanu ya dibundu mpi bo ke longaka bantu Biblia. Mambu yina ke sadisaka bantu na kutomisa luzingu na bo mpi na kudipesa luzitu.

BALUKUTAKANU NA BETO YA KONSO MPOSO

Na balukutakanu na beto ya konso mposo, beto ke vandaka na kiese ya kulanda masolo yina ke tendulaka malongi ya Biblia mpi mbala mingi yo ke tubilaka mambu ya kusala sambu na kudipesa diaka luzitu ya mingi. Beto ke lombaka ve mbongo na balukutakanu na beto mpi kukota ke vandaka ya ofele. Mu mbandu, na balukutakanu na beto nge ta longuka . . .

sambu na nki nge kele mfunu na meso ya Nzambi
mambu ya nge lenda sala sambu na kuzinga kibeni na kiese
mutindu nge lenda sala kinduku ya ngolo mpi ya ta wumela mingi

Nge ta kutana mpi ti banduku ya mbote yina ‘ke kudibanzaka sambu na bantu ya nkaka.’—1 Bakorinto 12:25, 26.

Sambu na kulonguka mambu mingi ya me tala balukutakanu na beto, tala video yai ya nkufi Inki Ke Salamaka na Nzo ya Kimfumu? na jw.org.

KULONGUKA YA BIBLIA

Beto ke sadilaka mukanda Zinga Mvula na Mvula! sambu na kulonguka Biblia ya ofele ti bantu. Mukanda yai ya kulongukila kele ti baverse ya Biblia, yo ke tendula mambu pwelele, yo kele ti bangiufula ya bo me yula mbote, bavideo ya ke simba ntima mpi bifwanisu ya kitoko. Kulonguka ya Biblia ke sadisaka bantu na kudipesa luzitu mpi yo ke tomisaka luzingu na bo.

Sambu na kumona mutindu kulonguka ya Biblia ti Bambangi ya Yehowa lenda natila nge mambote, tala video yai ya nkufi Sambu na Nki Beto Fwete Longuka Biblia? na jw.org.