INKI BETO LENDA SALA KANA NTALU YA BIMA KE MATA?

Ndima Nde Mambu Ta Bonga

Keti bima ke mata ntalu mingi na bwala na beno kuluta mbongo yina nge ke zwaka? Keti nge ke kudiyangisaka na kuzaba mutindu nge ta lungisa bampusa na nge mpi ya dibuta na nge? Kana mpidina, nge lenda kuma kudiyangisa sambu na bilumbu ke kwisa. Ata na bantangu ya mpasi, kana nge ke ndima nde mambu ta bonga, yo ta sadisa nge mingi.

SAMBU NA NKI YO KELE MFUNU?

Bantu ya kele ti kivuvu ke zolaka kaka ve nde mambu ya mbote kukumina bo. Kivuvu ke sadisaka bo na kuzinga mbote. Mu mbandu, bansosa ke monisa nde bantu ya ke vandaka ti kivuvu . . .

ke kangaka ntima na mambu ya mpasi
ke yikamaka nswalu ti mambu ya ke soba
ke bakaka balukanu ya mbote yina ke sadisaka bo na kuvanda ti sante ya mbote

INKI NGE LENDA SALA?

Ya ntete, tadila mutindu Biblia lenda sadisa nge bubu. Biblia kele ti bandongisila ya mfunu ya lenda sadisa nge na kuyikama ti mpila bima ke mata ntalu. Bandongisila yango lenda sadisa nge na kuzinga mbote mpi kuzaba mambu ya nge fwete sala bubu mpi na bilumbu ke kwisa kana mambu kukuma mpasi.

“Mayele ya kuyindula ta landa kukeba nge, mpi [mayele ya kutadila mambu] ta tanina nge.”—Bingana 2:11.

Ya zole, tadila mambu yina Biblia ke tubaka sambu na bilumbu ke kwisa. Kana nge me bakisa mfunu ya bandongisila ya kele na Biblia, yo ta pusa nge na kulonguka mambu yina yo ke tubaka sambu na bilumbu ke kwisa. Mu mbandu, nge ta longuka nde Nzambi ke zolaka nde nge zinga mbote na bilumbu ke kwisa mpi yandi ke pesaka bikuma ya mbote ya kundima yo. (Yeremia 29:11) Kikuma yango kele Kimfumu ya Nzambi.

KIMFUMU YA NZAMBI KELE NKI MPI INKI MAMBU YO TA SALA?

Kimfumu ya Nzambi kele guvernema yina ta yala ntoto ya mvimba. (Daniele 2:44; Matayo 6:10) Yo ta yala katuka na zulu mpi yo ta manisa bampasi mpi kinsukami. Yo ta tula mpenza ngemba mutindu baverse yai ke monisa yo.

“Nge ta vanda na kiese mpi nge ta toma.”—Nkunga 128:2.

“Bo (bantu ya Kimfumu ya Nzambi) ta sala ve kisalu ya ngolo sambu na mpamba.”—Yezaya 65:23.

“Mbuma ta vanda mingi kibeni na ntoto.”—Nkunga 72:16.

Bamilio ya bantu ke kwikilaka na mambu yai sambu bo ke ndimaka nde ‘Nzambi lenda kusa ve.’ (Tito 1:2) Beto ke lomba nge mpi na kutadila nge mosi mambu yina Biblia ke tubaka. Kivuvu yina yo ke pesaka ta sadisa nge na kukanga ntima na bampasi mpi na kundima nde mambu ta bonga na bilumbu ke kwisa.