Kilanga ya Kitoko

TALA ntangu yai ntoto! Inki kitoko yina! Tala matiti, bintuntu, banti na bambisi yonso. Ndjoku na ntambu kele na wapi?

Inki mutindu kilanga yai ya kitoko kubasikaka? Beto tala ntete nki mpila Nzambi yidikaka ntoto.

Nzambi basisaka ntete matiti na banti. Nzambi salaka ntete banti ya fyoti-fyoti ya mutindu na mutindu, na banti ya nene; yonso yina vandaka kukumisa ntoto kitoko kansi yau kepesa beto bambuma ya kitoko kibeni.

Na nima Nzambi salaka bambisi ya masa, na bandeke. Yandi salaka mpi bambisi bonso mbwa, nyau, mpunda, na yankaka ya mutindu na mutindu. Inki bambisi kemonanaka mingi na bisika yina beno kele? Keti beto kele ve na kyese na mpila Nzambi mesalaka bima yai yonso sambu na beto?

Na nsuka, Nzambi kuyidikaka kisika mosi mbote-mbote awa na ntoto. Yandi bingaka yau kilanga ya Eden. Yau vandaka kilanga mosi ya kukuka kibeni. Bima yonso ya vandaka na kati kuvandaka kitoko. Nzambi zolaka nde ntoto yonso kukuma bonso kilanga yai ya kitoko.

Kansi tala dyaka kifwanisu ya kilanga yai. Nzambi monaka nde kima mosi kukondaka na kati ya kilanga. Beno zaba kima yina? Beto tala nkenda kelanda.