Nzambi Salaka Zulu ti Ntoto

Yehowa Nzambi kele Ngangi na beto. Yandi salaka bima yonso, bima yina beto ke monaka ti bima yina beto ke monaka ve. Na ntwala ya kusala bima yina beto ke monaka, yandi salaka bawanzio mingi kibeni. Keti nge me zaba kana bawanzio kele banani? Bawanzio kele bigangwa yina Yehowa salaka; bo kele bonso yandi mosi. Beto lenda mona bo ve, kaka mutindu beto ke monaka ve Nzambi. Wanzio ya ntete yina Yehowa salaka kumaka nsadisi na yandi. Wanzio yango sadisaka Yehowa ntangu yandi salaka bambwetete, baplanete, mpi bima yonso ya nkaka. Planete mosi, ntoto, kele kisika ya kitoko ya beto ke zingaka.

Na nima, Yehowa yidikaka ntoto sambu bambisi mpi bantu kuzinga kuna. Yandi salaka nde nsemo ya mwini kusema na ntoto. Yandi salaka bangumba, banzadi mungwa, mpi banzadi.

Inki salamaka na nima? Yehowa tubaka nde: ‘Mono ke sala matiti, bimenina, mpi banti.’ Bambuma, bandunda, mpi bintuntu ya mutindu na mutindu yantikaka kuyela. Na nima, Yehowa salaka bambisi yonso—bambisi yina ke pumbukaka, yina ke kasaka, mpi yina ke tambulaka divumu na ntoto. Yandi salaka bambisi ya fioti bonso lape, mpi bambisi ya nene bonso banzioko. Inki mbisi nge ke zolaka mingi?

Na nima, Yehowa songaka wanzio ya ntete nde: “Beto sala muntu na kifwani na beto.” Bantu zolaka kuswaswana ti bambisi. Bo lendaka kuganga bima. Bo lendaka kutuba, kuseka, mpi kusamba. Bo zolaka kukeba ntoto mpi bambisi. Keti nge me zaba zina ya muntu ya ntete? Bika beto tala yo.