Bakala ya Kikesa

BONSO bantu yantikaka na kukuma mingi na ntoto, bamingi na kati na bau vandaka kusala mambu ya mbi bonso Kaina. Kansi muntu mosi kuswaswanaka na bankaka. Zina na yandi Henok. Ata bantu yonso ya vandaka na lweka na yandi vandaka kusala mambu ya mbi ya nki mutindu, bakala yai ya kikesa fulaka kaka na kusadila Nzambi.

Keti beno zaba sambu na nki bantu yina vandaka kusala mambu ya mbi mutindu yina? Yindula fyoti, Nani kupusaka Adamu na Eva na kukolama na Nzambi mpi na kudya mbuma yina Nzambi kubuyisaka na kudya? Yau kele wanzyo yina ya mbi. Bible kebinga yandi Satana. Yandi muntu kepusa bantu na kusala mambu ya mbi.

Kilumbu mosi, Henok zabisaka bantu kima mosi yina kupesaka bau makasi mingi. Tala mambu ya yandi tubaka: ‘Kilumbu kele Nzambi tafwa bantu ya mbi yonso.’ Ya kyeleka bantu kuwaka makasi mingi na kuwa mambu yina. Ziku bau yunsaka na kufwa Henok. Na yau, yo lombaka nde Henok kuvanda na kikesa mingi sambu na kuzabisa bantu mambu yina Nzambi tasala.

Nzambi kubikaka ve nde Henok kuzinga bamvula mingi na kati ya bantu ya mbi ya mutindu yina. Henok kuzingaka kaka bamvula 365. Sambu na nki beto ketuba nde “kaka bamvula 365”? Sambu na ntangu yina, bantu vandaka ngolo mingi mpi bau vandaka kuzinga bamvula mingi. Metusela, mwana ya Henok, kuzingaka bamvula 969!

Ntangu Henok kufwaka, bantu kumaka mbi mingi kibeni. Bible ketuba nde ‘ngindu na bau vandaka kutinda bau na kusala mambi ntangu yonso’ mpi ‘ntoto fulukaka na mavwanga.’

Keti beno zaba sambu na nki ntoto fulukaka dyaka na mavwanga na bilumbu yina? Yau kele sambu Satana kumaka kusadila mwaye yankaka ya kubebisa bantu. Balutiti yina kelanda tatubila beto yau na nda na yau.