Bana ya Israele Me Kuma Bampika

BANTU yai ya beno kemona kesala bisalu ya kingolo-ngolo. Tala mosi kebaka fimbu! Bansukami yai yonso kele bantu ya Israele, bantu mebutuka na dibuta ya Jacob. Bantu yina kemonisa bau mpasi kele bantu ya Egypte. Bantu ya Israele mekuma bampika na bau.

Bamvula mingi meluta, bantu ya dibuta ya Jacob kuzingaka na ngemba na Egypte. Joseph, muntu ya kuluta mfunu na nima ya Faraon, vandaka kuvila ve bantu na yandi. Joseph kufwaka. Na nima, Faraon yankaka yina vandaka kuzola ve bantu ya Israele kukumaka ntotila na Egypte.

Faraon yai ya mpa kukumisaka bantu ya Israele bampika. Yandi tulaka bantu ya kingolo-ngolo sambu na kusadisa bau bisalu ya mpasi mpi ya nku ya kutunga bambanza sambu na Faraon. Kansi ata kunyokwama yina vandaka, bantu ya Israele vandaka kukuma kaka mingi. Ntalu na bau mpi ngolo na bau kumonisaka bantu ya Egypte boma.

Sambu na yau, Faraon kusalaka inki? Yandi tubaka na bankento yina vandaka kubutisa bankento nde: ‘Ntangu beno tabutisaka bankento ya Israele, beno fwa bana yonso ya babakala.’ Kansi bankento yina kulemfukaka ve na nsiku ya Faraon.

Sambu na yau, Faraon pesaka nsiku nde: ‘Beno baka bana yonso ya babakala yina bankento ya Israele kebuta mpi beno fwa bau, kansi beno bika bana ya bankento.’ Tala nsiku ya mbi. Beto tala nki mpila mwana mosi ya bakala na kati ya bana yina taguluka.