Mpunda-Buluku ya Balaam Tubaka

KETI nge mewaka ntete mpunda-buluku kutuba? ‘Ikele ve. Bambisi ketubaka ve.’ Kansi Bible ketubila beto nkenda ya mpunda-buluku tubaka. Beto tala nki mutindu yau salamaka.

Bana ya Israele yina kumaka kufinama na insi Kana, tungaka camp na bau na nseke ya Moab. Balaka, ntotila ya Moab waka boma sambu na bau. Yandi tindaka nganga Balaam sambu na kuloka bau, na kulakaka yandi mbongo. Balaam ndimaka na kukwisa. Yandi mataka na zulu ya mpunda-buluku mpi yandi yantikaka na kukwisa.

Kansi Jéhovah buyilaka Balaam na kuloka bantu na Yandi. Sambu na yau, yandi tindaka wanzyo mosi sambu na kutelama na nzila mpi kukanga yau. Balaam kumonaka ve wanzyo, kansi mpunda-buluku na yandi kumonaka mpi vandaka kusosa na kutina wanzyo yina. Na nsuka yau vandaka na ntoto, mpi Balaam yina waka makasi yantikaka na kubula yau nti na ntu.

Na ntangu yina, na ngolo ya Jéhovah, Balaam waka mpunda-buluku na yandi ketuba nde: ‘Inki mono mesala nge na kubula mono mutindu yina?’

Balaam vutulaka nde: ‘Sambu nge kezola kusakana na mono. Kana mono vandaka na mbele, nga mono mefwa nge!’

Mpunda-buluku kuyufulaka nde: ‘Keti mono mesalaka nge ntete mutindu yina?’

Balaam vutudilaka yandi nde: ‘Ikele ve.’

Na ntangu yina, Jéhovah kangulaka meso ya Balaam mpi yandi monaka wanzyo metelama na nzila na mbele na maboko. Wanzyo kutubilaka yandi nde: ‘Sambu na nki nge mebula mpunda-buluku na nge mutindu yina? Mono mekwisa kukangisa nge nzila sambu nge kwenda ve kuloka bana ya Israele. Kana mpunda na nge kutinaka mono ve, nga mono zolaka kufwa nge, kansi mono zolaka kubika yau na luzingu.’

Balaam kutubaka nde: ‘Mono mesumuka. Mono vandaka kuzaba ve nde nge telamaka na nzila.’ Wanzyo bikaka Balaam na kukwenda kukutana na Balaka. Yandi sosaka na kuloka bana ya Israele kansi Jéhovah kubuyilaka yau yandi, mpi Jéhovah kutindaka yandi sambu na kusakumuna bana ya Israele mbala tatu.