Yezu Ke Kwisa Bonso Ntotila

NA NIMA ya kubelula bifwa meso yina zole, Yezu fulaka nzila na yandi mpi kumaka na bwala mosi yina vandaka mfinama na Yerusaleme. Yandi tubilaka bantumwa na yandi zole nde: ‘Beno kwenda na bwala yai, beno tamona mwana ya mpunda. Beno natila mono yau.’

Ntangu bau nataka mwana ya mpunda, Yezu vandaka na zulu na yau mpi kwendaka na Yerusaleme. Ntangu yandi finamaka na mbanza, kibuka ya bantu mingi basikaka sambu na kuyamba yandi. Bantu mingi tulaka bilele na bau na nzila. Bankaka zengaka mandalala mpi fikaka nzila. Bau bokaka nde: ‘Ozana ntotila yai kekwisa na zina ya Jéhovah!’

Na ntangu ya ntama, nsiku ya Israele zolaka nde bantotila ya mpa kudisonga na bantu na kukotaka na Yerusaleme ya kuvanda na zulu ya mwana mpunda. Yezu salaka mutindu yina. Mpi bantu mingi zolaka nde yandi vanda ntotila na bau. Kansi bau yonso vandaka kuzola yandi ve. Mambu yina kubwaka ntangu yandi kumaka na tempelo kesonga beto yau.

Na tempelo, Yezu belulaka bifwa meso na bifwa makulu. Bana ya fyoti yantikaka na kukembisa yandi ngolo na kumonaka mambu yina. Kansi banganga-Nzambi yina kumonaka mbi sambu na makelele yina, mpi bau tubilaka Yezu nde: ‘Nge kewa yina bau keboka?’

Yezu vutudilaka bau nde: ‘Mbote kibeni. Keti beno metangaka ntete ve mambu yai na Bible: “Na munoko ya bana fyoti Nzambi tabasisila lukumu?” ’ Bana fulaka na kukembisa ntotila ya Nzambi.

Beto kezola kusala bonso bana yina. Bantu yankaka kezola kubuyisa beto na kusamuna Kimfumu ya Nzambi, kansi beto lenda banga ve. Beto tafula kaka na kusamuna mambu ya mbote yonso yina Yezu kusalaka.

Yau vandaka ve na ntangu yina ya yandi vandaka awa na ntoto ya Yezu zolaka kuyantika na kuyala. Yau tavanda nki ntangu? Bau yulaka yandi sambu na dyambu yai na nkenda ya kelanda.