Nkabisa ya Kimfumu

SAMBU na nki muntu yai kepasula mvwela na yandi? Yau kele sambu Jéhovah mepesa yandi nswa. Muntu yai kele mbikudi Abija. Mbikudi kele nani? Keti beno zaba yandi? Yandi kele muntu yina Nzambi kezabisa na ntwala mambu yina tabwa na bilumbu kekwisa.

Mbikudi Abija ketubana awa ti Jeroboam, muntu mosi yina Salomon tulaka nkengidi ya ndambu ya bisalu ya kutunga nzo. Ntangu mbikudi kutanaka na Jeroboam, yandi salaka kima ya kuyituka. Yandi katulaka mvwela na yandi mpi pasulaka yau na bitini 12. Na nima, yandi tubaka na Jeroboam nde: ‘Baka bitini 10.’ Sambu na nki Abija pesaka na Jeroboam bitini 10?

Mbikudi Abija tubaka na Jeroboam nde Jéhovah tabotula kimfumu na Salomon mpi tapesa Jeroboam makanda 10. Yau tabikala kaka makanda zole na Roboam mwana ya Salomon mpi nkitani na yandi na kimfumu.

Ntangu Salomon waka yau, yandi wilaka Jeroboam makasi mpi sosaka na kufwa yandi. Jeroboam tinaka na Egypte. Na nima ya bamvula, Salomon kufwaka. Salomon yalaka bamvula 40. Mwana na yandi Roboam yingaka yandi na kimfumu. Ntangu Jeroboam waka nde Salomon mefwa, yandi katukaka na Egypte mpi vutukaka.

Roboam vandaka ntotila ya mbi. Yandi lutaka mbi ya tata na yandi Salomon. Jeroboam na bambuta yankaka kwisaka kumona yandi mpi tubilaka yandi na kubika kunyokula bantu. Kansi Roboam wilaka bau ve. Yandi kumaka dyaka mbi ya kuluta. Ebuna makanda 10 ya Israele solaka Jeroboam bonso ntotila. Kaka makanda zole yina ya Yuda mpi ya Benjamin bikalaka na Roboam.

Jeroboam vandaka kuzola ve nde bantu na yandi kwenda na Yerusaleme sambu na kusambila na tempelo ya Jéhovah. Sambu na yau, yandi salaka biteki zole ya bana bangombe ya wolo mpi yandi pusaka bantu na yandi na kukembisa yau. Nsi fulukaka na kamwa ntangu na mavwanga.

Kintinu ya makanda zole mpi yantikaka na kukolama na minsiku ya Nzambi. Ebuna, na mvula tanu ya kimfumu ya Roboam, ntotila ya Egypte kwisaka kunwanisa Yerusaleme. Yandi botulaka ndambu ya bima ya tempelo. Sambu na yau, tempelo bikalaka ve mutindu yau vandaka ntete bamvula lutaka.