Lubutuku ya Yezu

KETI beno zaba nani mwana yai ya fyoti? Inga, ikele Yezu. Yandi mekatuka na kubutuka na nzo-bitwisi. Awa beno kemona Maria kezola kutula mwana na kati ya kidikilu ya kufuluka matiti. Kansi, sambu na nki Maria na Joseph kele na kati ya nzo-bitwisi kumosi na bambisi? Yai kele kisika ve ya bana kebutukilaka.

Yau kele sambu Kaisala Augustu, ntotila ya Rome tulaka nsiku nde bantu yonso kusonikisa bazina na bau konso muntu na mbanza na yandi ya kisina yina bau butukilaka. Sambu na yau, Joseph kwendaka na Betleheme sambu yau kele na mbanza yina Joseph butukilaka. Ntangu yandi ti Maria kumaka na Betleheme, bisika ya kulala kuvandaka dyaka ve. Yau yina bau kwendaka na nzo-bitwisi sambu na kulala na bambisi. Na kilumbu yina, Maria butaka Yezu! Kansi, mutindu nge kemona, yandi vandaka mbote.

Keti beno kemona bangungudi na kyelo ya nzo-bitwisi? Bonso bampimpa yonso, bau vandaka na bilanga ya nzyunga na kulangidilaka bitwisi na bau, mpi na mbala mosi, wanzyo basikilaka bau. Bau waka boma mingi. Kansi wanzyo bwisaka bau ntima. Yandi tubilaka bau nde: ‘Beno wa boma ve, bubu yai, na Betleheme, mebutuka Kristu, Ngulusi. Yandi tagulusa bantu! Beno tamona mwana ya fyoti na kati ya kidikilu.’ Na kintulumukina, bawanzyo kwisaka mingi mpi yantikaka na kukembila Nzambi. Ntangu bawanzyo katukaka, bangungudi sosaka Yezu. Bau mekatuka na kumona yandi.

Keti beno zaba sambu na nki Yezu kele mfunu mingi? Kyeleka, yandi kele nani? Na nkenda na beto ya ntete, beto tubilaka Mwana ya ntete ya Nzambi. Mwana yina vandaka kusala kisika mosi na Jéhovah, na kusadisaka yandi na kuganga zulu, ntoto na bima yankaka. Mwana yina, yandi yina Yezu!

Ya kyeleka, Jéhovah bakaka luzingu ya Mwana na yandi na zulu mpi yandi tulaka yau na divumu ya Maria. Mbala mosi, mwana yantikaka na kuyela na kati ya divumu ya Maria mutindu bana yonso keyelaka na mavumu ya bamama na bau. Yau vandaka Mwana ya Nzambi. Kilumbu kumaka yina Yezu butukaka na nzo-bitwisi na Betleheme. Beno kezaba ntangu yai sambu na nki bawanzyo vandaka na kyese mingi sambu na kusamuna lubutuku ya Yezu?