Kapu 5
Lubutuku ya Yezu—Na Wapi mpi Inki Ntangu?
NTINU ya Kintinu ya Roma, Kaisali Auguste, mepesa nsiku nde konso muntu fwete kuvutuka na mbanza ya yandi butukaka sambu na kusonikisa bazina. Ebuna Yozefi kekwenda kisika yandi butukaka, mbanza ya Betelemi.
Bantu mingi kele na Betelemi sambu na kusonikisa bazina, mpi kisika mosi kaka ya Yozefi ti Maria lenda kuzwa sambu na kuvanda kele na nzo ya bambisi. Awa, na kisika ya bau ketulaka bampunda ti bambisi yankaka, Yezu mebutuka. Maria mefika yandi na bitemba ya bilele mpi melekisa yandi na kidikilu, kisika bau ketulaka madya sambu na bambisi.
Ya kyeleka, Kaisali Auguste kusalaka nsiku ya kusonikisa bazina na lutwadisu ya Nzambi. Yau sadisaka nde Yezu kubutuka na Betelemi, mbanza ya Masonuku kutubilaka na ntwala kubanda ntama nde yau tavanda kisika ya lubutuku ya mfumu ya kusilamaka.
Mpimpa ya mfunu ya inki mutindu! Na bilanga nsemo ya ngolo kesema na nzyunga ya kibuka ya bangungudi. Yau kele nkembo ya Yehowa! Mpi wanzio ya Yehowa metubila bau nde: “Beno kuwa boma ve, sambu mono me kwisa kuzabisa beno nsangu ya mbote yina ta pesa kiese mingi na bantu yonso. Na mpimpa yai, bo me butila beno Ngulusi na bwala ya Davidi. Yandi kele Kristo, Mfumu na beno. Beno ta zaba yandi mutindu yai: beno ta mona mwana ya mpa ya bo me kangisa na bilele; yandi me lala na kima ya bambisi kedilaka madia na bo.” Na mbala mosi, bawanzyo mingi mekwisa kumonana mpi keyimba nde: “Lukumu kele na Nzambi kuna na zulu, ngemba kele awa na nsi-ntoto na kati ya bantu yina ya yandi ke ndimaka.”
Ntangu bawanzyo mekatuka, Bangungudi metuba bau na bau nde: “Beto kwendeno na Betelemi sambu na kutala mambu yina me bwa kuna, mutindu Mfumu Nzambi me zabisa beto.” Bau mekwenda nswalu mpi bau memona Yezu kaka kisika ya wanzyo kutubaka nde bau tamona yandi. Ntangu bangungudi keta mambu ya wanzyo kutubilaka bau, bayina yonso kewa mambu yango keyituka. Maria kelunda mambu yai yonso na ntima mpi yandi keyangalala na yau na kati ya ntima na yandi.
Bantu mingi bubu yai kekwikilaka nde Yezu kubutukaka na Desembri 25. Kansi Desembri kele ngonda ya mvula, nsungi ya madidi na Betelemi. Bangungudi lendaka ve kuvanda na bilanga na mpimpa ti mameme na bau na ntangu yina ya mvula. Dyaka, yau kemonana nde Kintinu ya Roma, Kaisali, lendaka ve kulomba na bantu ya vandaka penepene na kubendumukila yandi nde bau kusala nzyetolo na kati ya hiver sambu na kusonikisa bazina. Ya kyeleka, yai yonso kemonisa nde Yezu kubutukaka na luyantiku ya nsungi ya automne ya mvula yango yina. Luka 2:1-20; Mishe 5:2.
▪ Sambu na inki Yozefi ti Maria kekwenda na Betelemi?
▪ Inki dyambu ya ngituka mesalama na mpimpa ya Yezu mebutuka?
▪ Inki mutindu beto kezaba nde Yezu butukaka ve na Desembri 25?