Bau Vingilaka na Yerusaleme

BANTU yai ya beno kemona awa kele balongoki ya Yezu. Bau mebikala na Yerusaleme bonso Yezu tubilaka bau. Bau yonso kevingila. Na mbala mosi, mazu ya ngolo bonso yina ya kitembo kunikisaka nzo yina bau vandaka na kati, na nima baludimi ya tiya basikaka na zulu ya ntu ya konso muntu na kati na bau. Mambu yai yonso kesonga inki?

Yau vandaka kidimbu ya nkumbwa! Yezu vutukaka na zulu na lweka ya Tata na yandi, mpi yandi kepesa mpeve santu yina yandi lakaka na balongoki na yandi. Inki mambu lutaka? Balongoki yonso yantikaka na kutuba na bandinga ya mutindu na mutindu.

Bantu mingi na Yerusaleme kuwaka mazu yina mpi bau kwisaka ntinu sambu na kutala mambu ya vandaka kusalama. Bantu ya bansi mingi kwisaka na Yerusaleme sambu na nkinsi ya Pentecôte. Bau yitukaka mingi sambu konso muntu waka balongoki kutubila yandi na ndinga na yandi mambu ya kitoko yina Nzambi salaka.

Bau tubaka nde: ‘Keti bantu yai yonso kele ya Galilée ve? Inki mpila bau ketuba na bandinga yina beto ketubaka na bansi yina beto mekatuka?’

Ebuna Pierre telamaka sambu na kutendudila bau. Yandi tendulaka nde bantu kufwaka Yezu mpi Jéhovah kufutumunaka yandi. Yandi yikaka nde: ‘Ntangu yai, Yezu kele na zulu, na diboko ya kitata ya Nzambi, mpi yandi mepesa mpeve santu yina yandi lakaka. Yau yina beno mewa mpi memona mambu yai ya kuyituka.’

Na kuwaka mambu yina, bantu mingi kuwaka ntantu na mambu yina bau salaka Yezu. Bau yulaka Pierre nde: ‘Inki beto fwete sala?’ Pierre vutudilaka bau nde: ‘Beno fwete balula ntima na beno mpi kubaka mbotika.’ Kilumbu yina, bantu kiteso ya 3 000 bakaka mbotika mpi kumaka balongoki ya Yezu.