Bansobana yina nsangu ya mbote lenda sala na bantu yonso
Na nsi ya bubu yai ya beto ke na kuzinga, yau ke mpasi ve na kuwa bantu kebasisa bangindu ya mutindu yai nde: “Minsiku ya bukristu kefwana ata fyoti ve na kubalula bantu. Yau lenda sala ata kima mosi ve na nsungi na beto yai ya mefuluka na mambu ya mpila na mpila.” Kansi bantu yonso kendima ve bangindu ya mpidyai. Kilumbu mosi, Gandhi vandaka solula na kilandi-ntotila Lord Irwin. Mbuta muntu yai yufulaka ntwadisi ya ba hindou, inki mambu, na kutadila ngindu nandi, lenda manisa mavwanga na kati ya Grande-Bretagne mpi Inde. Gandhi, bakaka Bible, yandi kangulaka yau na mukapu 5 ya evanzile ya Matai ebuna yandi tubaka nde: “Kana nsi na nge mpi nsi na mono kundima na kusadila minsiku yina Kristu longaka na Disolo nandi ya zulu ya Ngumba, mpidina, beto tamanisa kaka ve mavwanga ya ba nsi na beto, kansi mpi mavwanga ya ntoto ya mvimba.”
Na disolo nandi, Yezu kebenda dikebi ya bawi nandi na kusosa mambu ya kimpeve, na kudimonisa na bikalulu ya mawete, ya nkenda mpi ya lunungu. Kana yandi kebuya kikalulu ya kufwa bantu, yandi kebuya mpi kikalulu ya konso nani yina kebumbila nkweno nandi makasi. Katula pite, yandi kebuya mpi mpusa ya imbi. Yandi kebuya na kufwa makwela mpambampamba, sambu kufwa makwela kebebisaka mabuta mpi mingimingi kebebisaka bana. Kuwa yina yandi tubilaka beto: ‘Beno zola ata bayina kezolaka beno ve, beno kabila bansukami, beno vanda ntima ngolo ve na mfundusu na beno, beno sadila nkweno mutindu beno kezodila bau sadila beno.’ Kusadila minsiku yai yonso lenda natila beno lusadisu mosi ya nene. Kana bantu mingi ya nzyunga na beno kumona bikalulu yai, bamfinangani ya nzyunga na beno takuma mbote mingi.
Kisalu ya ba Témoins de Jéhovah kesalamaka na nsansa yai. Bible kelomba na bau na kuzitisa makwela mpi na kusansa bana na bau na kulanda minsiku ya bukristu. Mingimingi bau ketubilaka mambu ya mfunu yina ketadila dibuta. Mabuta yina kesalaka mambu na bumosi mpi na ngwakana ya mbote kele nto ya mambote sambu na bantu yonso. Nkenda ya bantu mefuluka na bambandu ya ba nsi mingi ya ngolo ya ntoto ya mvimba yina kubwaka sambu ngwakana mpi ngwizani na kati ya mabuta kuvandaka dyaka mbote ve mpi bizumba vandaka kusalama mutindu mosi ya ntitisa. Ntangu yonso kana bikalulu ya ba Témoins kebenda bantu mpi mabuta na kutwadisa luzingu na bau na kulanda minsiku ya bukristu, mubulu ya batoko, kufwa bantu mpi bizumba tayantika na kumana na nzyunga to na kartyé na beno.
Mosi ya mitungisi ya kenyokula bambanza mpi ba nsi mingi kele luvwezo to ba préjugés ya bantu yankaka. Kansi kuwa yina ntumwa Petelo tubaka: “Kyeleka, mono meza zaba nde Nzambi ketalaka luse ya muntu ve. Kansi na makanda yonso ya bantu, muntu yina kezitisa yandi mpi kesala lunungu, Nzambi tasepela na yandi.” Paulo mpi sonikaka nde: “Luswaswanu kele ve kati na ba Yuda mpi ba Greke, kati na bampika mpi bamfumu, kati na babakala mpi bankento; sambu beno yonso mevukana na Kristu Yezu.” (Bisalu 10:34, 35; Galatia 3:28) Ba Témoins de Jéhovah kendima ndinga yina. Na ntu-mbanza na bau, kati na bafilyali mpi na mabundu bau kekutanaka mpi kewakanaka mbotembote na bantu ya mitindu yonso mpi ya bampusu yonso ya nitu.
N’Afrika, ke na makanda yankaka yina lenda vukana sika mosi ve nde yau konda basisa mindondo. Kansi, inki dyambu kemonanaka ntangu ba Témoins de Jéhovah kesalaka balukutakanu na kontina to na nsi yina? Nge tamona bantu ya mekatuka na makanda ya mutindu na mutindu mevanda sika mosi. Na ngituka ya bamfumu ya nsi, bau yonso kewakana mbote kibeni na kimpangi, sambu bau mevukana sika mosi na lusambu mosi kaka. Zulunalu mosi ya New York (Amsterdam News ya le 2 août 1958) basisaka disolo mosi sambu na ngolo ya bukristu ya kyeleka ya kuvukisa bantu sika mosi. Munkwa zulunalu yina pesaka mbandu ya lukutakanu ya nene yina beto yitaka kutubila, ya kuvukisaka na New York ba Témoins kuluta 250 000 (na Yankee Stadium mpi na Polo Grounds). Tala mambu yina yandi sonikaka:
“Bisika yonso beto monaka bau kevanda sika mosi na kyese mpi na mawete yonso, Bandombe, Mindele, Bazyone ya mutindu na mutindu mpi bau katukaka bandambu yonso ya ntoto. . . . Ba Témoins yina katukaka na ba nsi 120 vandaka sika mosi, ye bau landaka masolo na ngemba yonso, bau songaka mpidina na b’Amerikè yonso nde yau ke dyambu ya mpasi ve. . . . Lukutakanu yina ke mbandu ya nene ya ngwakana mpi ya bumpangi.”
Bamingi tatuba nde minsiku ya bukristu kefwana mpenza ve na kutambwisa bantu na nsungi na beto ya bubu yai. Beto lenda vutula na bau mpidyai nde: Inki yankaka menunga to tanunga? Yau ke mbote na kusadila minsiku ya bukristu sambu na kuzaba mbalu na yau ya kyeleka. Ikele na lusadisu ya kisalu na bau nde talunganaka bumosi ya ‘ba nsi yonso, ya bandinga yonso mpi ya makanda yonso’ na nsungi yina Kimfumu ya Nzambi tayala bantu.—Nzayikusu 7:9, 10.
[Bangogo sambu na kubenda dikebi ya kele na lutiti 24]
Bantu ya makanda yonso mpi ya mpusu ya nitu ya mitindu yonso kewakana
[Bangogo sambu na kubenda dikebi ya kele na lutiti 24]
Bukristu kesala bansobana. Inki yankaka menunga?