Mfunu ya kusadila Nsangu ya Mbote na kisika ya nge kezinga

NA INZA ya beto kezinga bubu yai, mbala mingi beto kewaka bangindu ya mutindu yai: “Minsiku ya Bukristu kele mfunu ve. Yo tasala kima mosi ve na luzingu ya bubu yai ya kele na mambu ya mutindu na mutindu.” Kansi, dibanza mosi ya kuswaswana kubasikaka na rapore ya disolo mosi yina kulutaka na kati ya mfumu ya ba Hindu, Mohandas K. Gandhi, ti Kilandi ya ntotila ya Grande-Bretagne na Inde, Lord Irwin. Lord Irwin yulaka Gandhi nde yandi keyindula nde inki lenda manisa mavwanga yina kele na kati ya Grande-Bretagne ti Inde. Gandhi kubakaka Biblia, yandi kangulaka yau na kapu ya tanu ya Matayo mpi yandi tubaka nde: “Kana insi na nge ti ya mono kusala kuwakana yina talanda malongi ya Kristu kulongaka na Disolo yai na zulu ya Ngumba, beto tamanisa bampasi ya bansi na beto mpamba ve kansi mpi yina ya inza ya mvimba.”

Disolo yango ketubila kusosa mambu ya kimpeve mpi kuvanda muntu ya pima, ya ngemba, ya kewilaka bankaka mawa, mpi ya kezolaka lunungu. Yo kebuya kufwa bantu mpamba ve, kansi mpi kuwila bantu yankaka makasi ya kuluta ngolo, bizumba mpamba ve, kansi mpi kuvanda na bangindu ya mbi. Yo kebuya kikalulu ya kufwa makwela kukonda kikuma ya kyeleka, sambu yo kepanzaka mabuta mpi kesalaka nde bana kuyantika kumona mpasi. Yo ketubila beto nde: ‘Beno zola ata bayina kezolaka beno ve, beno kabila bansukami, beno vanda ntima ngolo ve na kusambisa bankaka, beno sadila bankaka mutindu beno kezola nde bau sadila beno.’ Kana beto kesadila ndongisila yai yonso, yo tanatila beto mambote mingi. Kana bantu ya bwala na beno kesadila bandongisila yai, bwala na beno takuma ti bantu ya mbote mpenza!

Bambangi ya Yehowa kesongaka mbandu ya mbote na kulanda nzila yai. Biblia kelonga bo na kuzitisa makwela. Bo kelongaka bana na bo minsiku ya lunungu. Bo ketubilaka mingi mfunu ya dibuta. Mabuta yina kele na bumosi kele lusakumunu sambu na bwala na nge, ye mpi sambu na insi na nge. Nkenda mefuluka ti bambandu ya bangolo ya inza yina kubwaka sambu kuwakana kuvandaka dyaka ve na mabuta mpi mansoni kukumaka mingi. Kana bantu ti mabuta yina Bambangi ya Yehowa kesadisa na kulanda minsiku ya Bukristu kele mingi, mubulu ya baleke, mansoni, mpi kufwa bantu tavanda dyaka mingi ve na bwala na beno.

Mosi na kati ya mambu ya mpasi yina kenyokula babwala ti bansi kele kukonda kuzola bantu ya mpusu ya nitu yankaka. Kansi, ntumwa Piere kutubaka nde: “Ya kieleka, mono me bakisa nde Nzambi ke zolaka bantu yonso mutindu mosi. Na konso dikanda ya bantu yandi ke ndimaka bantu yina ke zitisaka yandi ti ke salaka mambu ya mbote.” Mpi ntumwa Polo kusonikaka nde: “Diswaswanu kele ve na kati ya Bayuda ti bantu yina kele Bayuda ve, na kati ya bampika ti bantu yina kele bampika ve, na kati ya babakala ti bankento: beno yonso beno kele bonso muntu mosi, sambu beno kele na kimvuka ti Yesu Kristo.” (Bisalu 10:​34, 35; Galatia 3:28) Bambangi ya Yehowa kendimaka dyambu yai. Bantu ya makanda mpi ya bampusu yonso kesalaka kumosi na ntu-mbanza na bo, na bafiliale na bo, mpi na mabundu na bo.

Na Afrika, makanda yankaka lenda vukana ve kumosi kukonda mindondo. Kansi, na balukutakanu ya Bambangi ya Yehowa, bantu ya makanda mingi ya mutindu na mutindu kedyaka, kelalaka, mpi kesambilaka kumosi na kuwakana mpenza mpi na kinduku ya mbote. Bamfumu ya luyalu keyitukaka mingi ntangu bo kemonaka mambu yai. Zulunalu mosi ya New York na zina ya Amsterdam News ya Augusti 2, 1958, tubilaka mbandu mosi yina kemonisa nde Bukristu ya kyeleka kele ti ngolo ya kuvukisa bantu. Komantere yango kubasikaka na ntangu bo vandaka kutala mutindu lukutakanu ya bansi mingi ya beto tubilaka dezia yina kusalamaka na Mbanza ya New York kisika Bambangi kuluta mafunda nkama zole na makumi tanu kuvukanaka.

“Bisika yonso Bantu Ndombe, mindele ti bantu ya bansi ya Esti, bamvwama ti bansukami mpi ya kukatukaka na bandambu yonso ya inza, kuvukanaka ti kyese mpi na ngemba yonso . . . kusamba ya Bambangi yina mekatuka na bansi 120 mesamba kisika mosi na ngemba, mesonga bantu ya Amerika inki mutindu dyambu yango lenda salama kukonda mpasi. . . . Lukutakanu yina kele mbandu mosi ya nene ya kumonisaka mutindu bantu lenda sala mpi kuzinga kisika mosi.”

Bantu mingi lenda tuba nde minsiku ya Bukristu lenda soba luzingu ya bantu bubu yai na inza. Kansi, inki kima yankaka mefwana to tafwana na kusoba luzingu ya bantu mutindu yina? Minsiku ya Bukristu lenda vanda na mfunu mingi kana beno kesadila yo sesepi yai na bwala na beno, mpi yo tavanda fondasio mosi ya tavukisa bantu ya ‘makanda yonso, ya bandinga yonso ti ya bansi yonso’ ya ntoto ya mvimba ntangu luyalu ya Kimfumu ya Nzambi tayala bantu.​—⁠Kusonga 7:​9, 10.

[Bangogo sambu na kubenda dikebi ya kele na lutiti 23]

Bantu ya bampusu ya nitu yonso kesala kisika mosi

[Bangogo sambu na kubenda dikebi ya kele na lutiti 24]

Bukristu kesobaka luzingu ya bantu. Inki kima yankaka lenda sala mutindu yina?