Kapu 3

Mubongisi Nzila Mebutuka

ELISABETI mefinama na kubuta. Na bangonda yai tatu ya mekatuka kuluta, Maria mevanda ti yandi. Kansi sesepi, ntangu melunga sambu Maria kukwenda mpi kusala nzyetolo ya nda sambu na kuvutuka na Nazareti. Na nima ya kiteso ya bangonda sambanu yandi mpi tabuta.

Ntama ve na nima ya kukwenda ya Maria, Elisabeti mebuta. Kyese ya inki mutindu yau kele ntangu lubutuku mesalama mbote mpi Elisabeti ti mwana-ndwelo kele na mavimpi ya mbote! Ntangu Elisabeti mesonga mwana ya fyoti na bamfinangani na yandi ti na bampangi na yandi, bau yonso meyangalala ti yandi.

Na kilumbu ya nana na nima ya lubutuku na yandi, na kutadila Nsiku ya Nzambi, mwana-ndwelo ya bakala na Izraele fwete kuyotisama. Sambu na okazyo yai, banduku ti bampangi mekwisa kutala yandi. Bau ketuba nde bau fwete kupesa mwana ya bakala zina ya tata na yandi, Zakaria. Kansi Elisabeti meboka ngolo. Yandi metuba nde: “Ve. Zina na yandi fweti vanda Yoane.” Yibuka nde, yai kele zina ya wanzyo Gabriele kutubaka nde bau fwete kupesa mwana.

Kansi, banduku na bau kebuya nde: “Kansi na fami na nge ata muntu mosi ve ke na zina yina.” Na nima, na kusadilaka ndinga ya kidimbu, bau meyufula inki zina tata na yandi kezola kupesa mwana. Yandi melomba dibaya ya kusonikila, Zakaria mesonika nde: “Zina na yandi: Yoane.” Bantu yonso meyituka.

Na yau, ndinga ya Zakaria mevutuka na mutindu mosi ya kuyituka. Nge tayibuka nde yandi kuvidisaka kingangu ya kutuba ntangu yandi kwikilaka ve nsangu ya wanzyo yina kutubaka nde Elisabeti tabuta mwana. Ee, ntangu Zakaria metuba, bantu yonso yina kezingaka na mfinama keyituka mpi bau kekuditubila nde: “Mwana yai ta vanda nani?”

Ntangu yai, Zakaria mefuluka na mpeve santu mpi yandi ketuba na kyese nde: “Lukumu kuvanda na Mfumu Nzambi, Nzambi ya bantu ya Israele, sambu yandi me kwisa kusadisa bantu na yandi, yandi me gulusa bo. Yandi me basisila beto [kibongo ya luguluku, NW] ya ngolo na dikanda ya Davidi yina vandaka kusadila yandi.” Na ntembe ve, “kibongo ya luguluku” yai kele, Mfumu Yezu, yina mefinama na kubutuka. Zakaria ketuba nde na nsadisa na yandi, Nzambi “ta katula beto na maboko ya bambeni na beto na mpila nde beto [kusadila yandi kisalu ya santu nkatu kubanga na kwikama mpi na lunungu na ntwala na yandi bilumbu na beto yonso, NW].”

Na nima, Zakaria keyita kutuba mambu yina metala mwana na yandi, Yoane, nde: “Nge mwana na mono, zina na nge ta vanda profete ya [muntu ya Kuluta Kuzanguka, NW], sambu nge ta kwenda na ntwala ya [Yehowa, NW] sambu na kuyidika banzila na yandi, mpi na kuzabisa bantu na yandi nde ata bo salaka masumu kansi yandi ta lolula bo; mpidina, yandi ta gulusa bo. Sambu Nzambi na beto ke wilaka bantu mawa. Yo yina, yandi ta basisila beto mwini na zulu, bonso mwini yina ke basikaka na ntangu na suka, sambu na kutemuna bantu yina ke vandaka na mpimpa ti na boma ya lufwa, sambu na kunata beto na nzila ya ngemba.”

Na ntangu yai Maria, yina na ntembe ve kele kaka nkento ya mekwelaka ntete ve, mekuma na Nazareti. Inki takumina yandi ntangu yau tazabana nde yandi kele na divumu? Luka 1:​56-80; Levi 12:​2, 3.

▪ Yoane meluta Yezu na bamvula ikwa?

▪ Inki mambu mebwa ntangu Yoane melungisa bilumbu nana?

▪ Inki mutindu Nzambi mebalula dikebi na yandi na bantu na yandi?

▪ Inki kisalu meyita kutubama nde Yoane tasala?